Read Iloko Matthew 3 Bible Online

Matthew 3 - Iloko bible

Matthew 3

¹Iti dayta a tiempo, napan ni Juan a Mammuniag idiay let-ang ti Judea ket nangaskasaba.

²“Agbabawikayo kadagiti basbasolyo,” kinunana, “agsipud ta asidegen ti Pagarian ti langit.”

³Ni Juan ti kayat a sawen ni profeta Isaias idi kinunana, “Idiay let-ang, adda mangipukpukkaw: ‘Isaganayo ti dalan ti Apo, Pasayaatenyo ti pagnaanna!’”

⁴Naabel a dutdot ti kamelio ti kawes ni Juan. Sinturon a lalat ti barikesna. Dudon ken diro ti taraonna.

⁵Napan kenkuana dagiti tattao a naggapu idiay Jerusalem ken entero a probinsia ti Judea, agraman amin a dagdaga iti agsumbangir iti karayan Jordan.

⁶Nagbabawida a silalatak kadagiti basbasolda ket binuniagan ida ni Juan idiay karayan Jordan.

⁷Idi makita ni Juan dagiti adu a Fariseo ken Saduceo tapno agpabuniagda kenkuana, kinunana kadakuada: “Dakayo a kaputotan ti uleg, siasino ti nangibaga a malisianyo ti dusa a dandanin idissuor ti Dios?

⁸Ipakitayo babaen iti aramidyo a nagbabawikayon kadagiti basbasolyo.

⁹Diyo ipagarup a makalisikayo iti panagkunayo, ‘Uray ta amami ni Abraham.’ Ibagak kadakayo a kabaelan ti Dios a pagbalinen dagitoy a bato nga annak ni Abraham.

¹⁰Naisaganan ti wasay a pangpukan kadagiti kayo agingga iti ramut; mapukan ket maipuor amin a kayo a di agbunga iti nasayaat.

¹¹Buniagankayo iti danum kas pakakitaan ti panagbalbaliwyo. Ngem ti umay a sumarsaruno kaniak buniagannakayto iti Espiritu Santo ken iti apuy. Dakdakkel ti pannakabalinna ngem siak; diak pay maikari a mangbitbit iti sandaliasna.

¹²Adda kenkuana ti bigao a pangtaep iti irik. Urnongen ken idulinnanto ti irikna iti kamalig; ngem puorannanto ti taep iti apuy a di maiddep.”

¹³Dimteng ni Jesus idiay Jordan a naggapu idiay Galilea tapno pabuniagan ken ni Juan.

¹⁴Ngem kayat a lapdan ni Juan ket kinunana ken Jesus, “Siak koma ti rebbengna a buniagam, ngem apay nga umayka kaniak?”

¹⁵“Bay-am a maaramid ita daytoy tapno matungpalta ti amin a pagayatan ti Dios,” insungbat ni Jesus. Immanamong ngarud ni Juan.

¹⁶Apaman a nabuniagan ni Jesus, simmang-at a dagus manipud iti danum ket adtoy, naglukat kenkuana ti langit. Nakitana ti Espiritu ti Dios a bumabbaba a kas maysa a kalapati ket nagdisso kenkuana.

¹⁷Ket kinuna ti maysa a timek a naggapu sadi langit, “Daytoy ti dungdungngoek nga Anak a pakaragsakak unay.”