Read Iloko Matthew 7 Bible Online

Matthew 7 - Iloko bible

Matthew 7

¹“Diyo ukomen dagiti sabali tapno dinakayto met ukomen ti Dios,

²ta ukomennakayto ti Dios a kas iti panangukomyo kadagiti sabali. Ti pangrukodyo iti sabali isunto met laeng ti pangrukod ti Dios kadakayo.

³Apay a dillawem ti puling iti mata ni kabsatmo, no dimo pay madlaw ti troso iti matam?

⁴Kasano nga ibagam nga ikkatem ti puling iti mata ni kabsatmo no dimo pay madlaw ti troso iti matam?

⁵Aginsisingpet! Ikkatem pay nga umuna ti troso iti matam, tapno nalawag ti panagkitam a mangikkat iti puling iti mata ni kabsatmo.

⁶“Diyo ited kadagiti aso ti aniaman a nasantoan, amangan no darupen ken kagatendakayo. Diyo met ipurruak dagiti perlasyo kadagiti baboy—ta baddebaddekandanto laeng.”

⁷“Agdawatkayo ket maikkankayto; agsapulkayo ket makabirokkayto; agtuktokkayo ket mailukatto ti ruangan kadakayo.

⁸Ta ti amin nga agdawat, maikkan; ti agsapul, makabirok; ti agtuktok, mailukatto kenkuana ti ruangan.

⁹Siasino kadakayo nga amma ti mangted iti bato iti anakna no dumawat iti tinapay?

¹⁰Wenno ikkanna aya iti uleg no dumawat iti ikan?

¹¹No dakayo idinto a dakeskayo, ammoyo ti mangted iti naimbag kadagiti annakyo, dinto ket ad-addan ti pannangted ni Amayo sadi langit iti naimbag kadagiti agdawat kenkuana?

¹²“Aramidenyo kadagiti tattao ti kayatyo nga aramidenda kadakayo; ta daytoy ti kaipapanan ti Linteg ken ti pannursuro dagiti profeta.”

¹³“Sumrekkayo iti nailet a ruangan, ta nalawa ti ruangan ken kasta met ti dalan nga agturong iti agnanayon a pakadadaelan, ket adu ti magna sadiay.

¹⁴Ngem nailet ti ruangan ti biag ken narigat ti dalan nga agturong iti biag, ket manmano ti makasarak.”

¹⁵“Agannadkayo kadagiti sinan-profeta. Umayda kadakayo ket agparangda a kas karnero, ngem iti kinapudnona, narawetda a lobo.

¹⁶Mailasinyonto ida babaen kadagiti aramidda. Adda aya kalkalunay nga agbunga iti ubas, wenno sisiitan a kayo nga agbunga iti igos?

¹⁷Ti nasayaat a kayo nasayaat ti bungana; ti dakes a kayo dakes ti bungana.

¹⁸No nasayaat ti kayo, saan nga agbunga iti dakes; no dakes ti kayo, saan nga agbunga iti nasayaat.

¹⁹Ti kayo a saan nga agbunga iti nasayaat, mapukan ket maisungrod.

²⁰Ngarud, mailasinyonto dagiti sinan-profeta babaen kadagiti aramidda.”

²¹“Saan a ti tunggal maysa nga agkuna kaniak iti ‘Apo, Apo,’ makastrekto iti Pagarian ti langit, no di laeng dagiti mangtungpal iti pagayatan ni Amak sadi langit.

²²Inton dumteng dayta nga Aldaw, adunto ti agkuna kaniak, ‘Apo, Apo! Iti naganmo, dimi aya inwaragawag ti Naimbag a Damag? Iti naganmo, dikam aya nagpaksiat iti adu a demonio? Iti naganmo, dikam aya nagaramid kadagiti milagro?’

²³Ngem kunakto kadakuada, ‘Dikay am-ammo! Umadayokayo kaniak, dakayo a managdakdakes!’ ”

²⁴“Ngarud, siasinoman a dumngeg kadagitoy saok ket tungpalenna ida, mayarig iti masirib a tao a nagpatakder iti balayna iti rabaw ti bato.

²⁵Nagtudo ken nagangin iti napigsa ken naglayus, ngem saan a narba dayta a balay, agsipud ta naipatakder iti rabaw ti bato.

²⁶Ngem ti siasinoman a dumngeg kadagitoy saok ket dina tungpalen ida, mayarig iti maag a tao a nagpatakder iti balayna iti kadaratan.

²⁷Nagtudo ken nagangin iti napigsa ken naglayus ket narba dayta a balay. Nakaam-amak ti pannakarbana!”

²⁸Idi naisaon ni Jesus dagitoy, nasdaaw dagiti tattao iti wagas ti panangisurona.

²⁹Ta nangisuro a kas maysa nga addaan turay, saan a kas kadagiti mamaestroda iti Linteg.