Read Iloko Matthew 8 Bible Online

Matthew 8 - Iloko bible

Matthew 8

¹Simmalog ni Jesus iti bantay ket sinurot ti adu a tattao.

²Immasideg kenkuana ti maysa a lalaki nga agkukutel ket nagparintumeng iti sangoananna. Kinunana, “Apo, no pagayatam, mapaimbagnak.”

³Sinagid ni Jesus ti lalaki sana kinuna, “Kayatko. Umimbagkan!” Dagus nga immimbag ti lalaki.

⁴Ket kinuna ni Jesus kenkuana, “Denggem! Awan pangibagbagaam iti daytoy, ngem inka a dagus iti padi tapno kitaenna no naimbagkan. Kalpasanna, kas mayannatup iti Linteg ni Moises, ipaaymo ti daton a pammaneknek kadagiti tattao nga immimbagkan.”

⁵Idi sumungsungad ni Jesus idiay Capernaum, sinabat ti maysa a kapitan ti armada ti Roma ket nagdawat iti tulong.

⁶“Apo,” kinunana, “masakit ti adipenko idiay balay; naparalitiko ket marigatan unay.”

⁷“Umayko paimbagen,” kinuna ni Jesus.

⁸Insungbat ti kapitan, “Saan a masapul nga umayka, Apo. Diak maikari nga umawat kenka iti balayko. Agsaoka laeng ket umimbag ti adipenko.

⁹Ta uray siak, addaak iti babaen dagiti naturturay ngem siak a pagtungpalak ket adda met dagiti soldado a mangtungpal kadagiti bilinko. No kunak iti maysa, ‘Mapanka idiay,’ mapan. No kunak iti sabali, ‘Umayka,’ umay. Ket no ibilinko iti tagabuk, ‘Aramidem daytoy,’ aramidenna.”

¹⁰Nasdaaw ni Jesus idi nangngegna daytoy ket kinunana kadagiti sumursurot kenkuana: “Ibagak kadakayo, diak pay nakasarak iti Israel iti siasinoman nga addaan iti kastoy a pammati.

¹¹Laglagipenyo nga adunto ti aggapu iti laud ken daya a makisango iti panganan kada Abraham, Isaac ken Jacob iti Pagarian ti langit.

¹²Ngem dagiti naituding nga agtawid iti Pagarian, maipurruakdanto iti ruar a nasipnget, ket agsangit ken agngaretngetdanto gapu iti rigatda.”

¹³Kinuna ni Jesus iti kapitan, “Agawidkan. Maaramidto kenka a kas iti panamatim.” Immimbag ti adipen ti kapitan iti daydi met la nga oras.

¹⁴Napan ni Jesus iti balay ni Pedro, ket nakitana a nakaidda ti babai a katugangan ni Pedro, ta aggurigor.

¹⁵Sinagid ni Jesus ti ima ti babai ket awanen ti gurigorna. Bimmangon ket rinugianna ti nagserbi kenkuana.

¹⁶Idi dumteng ti rabii, inyeg dagiti tattao ken ni Jesus dagiti adu a linuganan dagiti demonio. Babaen iti balikas, pinaksiat ni Jesus dagiti dakes nga espiritu ket pinaimbagna amin a masakit.

¹⁷Inaramidna dagitoy tapno matungpal ti sinao ni profeta Isaias: “Isu a mismo ti nangikkat kadagiti sagubanittayo ken nangibaklay kadagiti sakittayo.”

¹⁸Idi makita ni Jesus dagiti adu a tattao a nangaribungbong kenkuana, imbilinna kadagiti adalanna, “Bumallasiwtayo.”

¹⁹Immasideg kenkuana ti maysa a maestro iti Linteg ket kinunana, “Maestro, sisasaganaak a sumurot kenka iti sadinoman a papanam.”

²⁰Simmungbat ni Jesus kenkuana, “Adda rukib dagiti musang, ken adda umok dagiti tumatayab, ngem awan pagiddaan ken paginanaan ti Anak ti Tao.”

²¹Kinuna ti maysa a lalaki nga adalan met, “Apo, agawidak man pay a mangipumpon ken ni amak.”

²²Insungbat ni Jesus, “Bay-am dagiti natay a mangipumpon kadagiti minatayda; umayka ket surotennak.”

²³Limmugan ni Jesus iti bangka agraman dagiti adalanna.

²⁴Pagammoan, dimteng ti napigsa nga angin iti dan-aw ket sinabbuasabbuagan dagiti dalluyon ti bangka. Ngem matmaturog idi ni Jesus.

²⁵Napanda riniing ket kinunada, “Umarayatka, Apo! Lumnedtayon!”

²⁶“Apay nga agbutengkayo?” kinuna ni Jesus. “Nagbassit ketdin ti pammatiyo!” Bimmangon ni Jesus. Pinagtalnana ti angin ken dagiti dalluyon ket nagkalma iti kasta unay.

²⁷Nagsiddaawda amin ket kinunada, “Ania ti katataona daytoy? Uray ti angin ken ti dalluyon agtulnogda kenkuana!”

²⁸Idi dumteng ni Jesus iti daga dagiti Gadareno, iti ballasiw ti dan-aw, sinabat ti dua a lallaki a rimmuar kadagiti rukib a pagitantaneman. Linuganan ida dagiti demonio ket napalalo ti rungsotda, isu nga awan makaitured a magna iti dayta a dalan.

²⁹Idi makaasidegda ken Jesus, nagikkisda a dagus ket kinunada kenkuana, “Anak ti Dios, ania ti kayatmo nga aramiden kadakami? Umaynakami kadi dusaen sakbay ti naituding a tiempo?”

³⁰Iti saan unay nga adayo kadakuada, adda dakkel nga arban ti baboy a mangmangan.

³¹Nagpakpakaasi dagiti demonio ket kinunada ken Jesus, “No paksiatennakami, ibaonnakami ngarud iti dayta nga arban ti baboy.”

³²“Inkayo,” kinuna ni Jesus. Pimmanawda ngarud ket simrekda kadagiti baboy. Nagtataray ti entero nga arban a nagturong iti teppang sada timmappuak iti dan-aw ket nalmesda amin.

³³Nagtataray dagiti agtartaraken kadagiti baboy a napan idiay ili. Impadamagda ti napasamak agraman ti naaramid kadagiti dua a lallaki a linuganan dagiti demonio.

³⁴Isut' gapuna a napan simmabat ken ni Jesus ti amin nga umili. Idi makitada ni Jesus, dinawatda kenkuana a panawanna ti ilida.