Read Iloko Matthew 9 Bible Online

Matthew 9 - Iloko bible

Matthew 9

¹Limmugan ni Jesus iti bangka ket bimmallasiw iti dan-aw a napan iti ilina.

²Inyeg ti sumagmamano a tattao kenkuana ti maysa a paralitiko a nakaidda iti papag. Nabigbigna ti kaadda ti pammatida ket kinunana iti paralitiko, “Pakirdem ta pakinakemmo, anakko. Napakawanen dagiti basbasolmo.”

³Iti kasta, kinuna ti sumagmamano kadagiti mamaestro iti Linteg iti nakemda, “Agsasao daytoy a tao iti maibusor iti Dios.”

⁴Agsipud ta ammo ni Jesus ti pampanunotenda, kinunana, “Apay nga agpampanunotkayo iti dakes?

⁵Ania ti nalaklaka a sawen, ‘Napakawanen dagiti basbasolmo,’ wenno, ‘Bumangonka ket magnaka’?

⁶Paneknekak ngarud kadakayo a ti Anak ti Tao adda pannakabalinna ditoy daga a mamakawan kadagiti basbasol.” Ket kinunana iti paralitiko, “Bumangonka, bagkatem ta iddam ket agawidkan.”

⁷Timmakder ti paralitiko ket nagawid.

⁸Idi maimatangan dagiti tattao daytoy, nagbutengda ket indaydayawda ti Dios ta intedna ti kastoy a pannakabalin iti tao.

⁹Pimmanaw ni Jesus iti dayta a lugar. Idi magmagna, nakitana ni Mateo, maysa nga agsingsingir iti buis, nga agtugtugaw iti ofisinana. Kinuna ni Jesus kenkuana, “Surotennak.” Timmakder ni Mateo ket simmurot kenkuana.

¹⁰Idi mangmangan ni Jesus iti balay ni Mateo, dimteng ti adu nga agsingsingir iti buis ken dadduma pay a dakes a tattao. Nakisangoda kenkuana ken kadagiti adalanna iti panganan.

¹¹Nakita dagiti sumagmamano a Fariseo daytoy, ket kinunada kadagiti adalanna, “Apay a makipangan ti maestroyo kadagiti kakasta a tattao?”

¹²Nangngeg ni Jesus ida ket simmungbat: “Saan a dagiti nasalun-at ti makasapul iti mangngagas, no di ket dagiti masaksakit.

¹³Inkay adalen ti kaipapanan daytoy a paset ti Nasantoan a Surat, ‘Asi ti kalikagumak, saan a daton a mapuoran.’ Immayak tapno ayabak dagiti managbasol, saan a dagiti agkunkuna a naimbag.”

¹⁴Kalpasanna, napan ken ni Jesus dagiti pasurot ni Juan Bautista ket sinaludsodda, “Apay a masansan nga agayunarkami kasta met dagiti Fariseo, ngem pulos a di agayunar dagiti adalam?”

¹⁵Sinaludsod met ni Jesus, “Agladingit kadi dagiti makiboda no adda ti nobio iti arpadda? Saan a mabalin! Ngem dumtengto ti tiempo a maipanaw ti nobio kadakuada; isunton ti panagayunarda.

¹⁶“Awan ti tao a mangitakup iti baro a lupot iti daan a pagan-anay, agsipud ta no kumsen ti baro a lupot, lumawa ti pigis ti pagan-anay.

¹⁷Awan met ti mangikarga iti baro nga arak iti daan a supot a lalat, ta bumtak ti supot, maibelleng ti arak, ket madadael pay ti lalat. Ikarga ketdi ti baro nga arak iti baro a supot a lalat tapno agpadada nga awanto ti pakaan-anoanda.”

¹⁸Madama a sarsaritaen ni Jesus daytoy kadakuada idi immasideg ti maysa a pangulo a Judio. Nagparintumeng iti sangoanan ni Jesus sana kinuna, “Kapatpatay ti anakko a balasitang. Umaymo kadi ipatay ta imam kenkuana ket agbiagto.”

¹⁹Iti kasta, timmakder ni Jesus ket sinurotna ti pangulo. Kimmuyog met kenkuana dagiti adalanna.

²⁰Adda babai a sangapulo ket dua a tawenen a napalalo ti panagbulos ti darana. Napan iti likudan ni Jesus ket sinagidna ti gayadan ti kagayna.

²¹Ta kinunana iti bagina, “No masagidko la koma ti kagayna, umimbagakon.”

²²Timmalliaw ni Jesus ket nakitana ti babai. “Pakirdem ta pakinakemmo, anakko,” kinunana. “Pinaimbagnaka ti pammatim.” Iti dayta met la a kanito, immimbagen ti babai.

²³Ket dimteng ni Jesus iti balay ti pangulo. Idi makitana dagiti agtuktokar iti pamumpon a musika ken dagiti umariwawa a tattao,

²⁴kinunana, “Rummuarkayo amin! Saan a natay ti ubing—matmaturog laeng.” Kinatkatawaanda ni Jesus.

²⁵Apaman a nakaruar dagiti tattao, simrek ni Jesus iti kuarto a yan ti balasitang. Iniggamanna ti ima ti balasitang ket bimmangonen.

²⁶Nagdinamag daytoy iti amin a suli dayta a lugar.

²⁷Pimmanaw ni Jesus iti dayta a lugar. Idi magmagna, sinurot dagiti dua a bulsek a lallaki ket impukkawda, “Anak ni David, kaasiannakami!”

²⁸Idi nakastreken ni Jesus iti balay, immasideg kenkuana dagiti dua a bulsek. “Patienyo kadi a kabaelankayo nga agasan?” sinaludsodna kadakuada. “Wen, Apo,” insungbatda.

²⁹Iti kasta, sinagid ni Jesus dagiti matada sana kinuna, “Maaramid ngarud a kas iti panamatiyo.”

³⁰Ket naisubli ti panagkitada. Impaganetget ni Jesus kadakuada nga awan pangibagbagaanda iti naaramid.

³¹Ngem pimmanawda ket inwarasda ti damag maipapan ken ni Jesus iti isuamin a suli dayta a lugar.

³²Idi pumampanawda, impan ti sumagmamano a tattao ken ni Jesus ti maysa a lalaki nga umel agsipud ta linuganan ti demonio.

³³Apaman a napaksiat ti demonio nga adda kenkuana, nangrugin nga agsao ket nasdaaw ti tunggal maysa. Kinunada, “Ditay pay nakakita iti kastoy ditoy Israel!”

³⁴Ngem kinuna dagiti Fariseo, “Ti pangulo dagiti demonio ti mangmangted kenkuana iti pannakabalin a mangpaksiat kadagiti demonio.”

³⁵Sinursor ni Jesus dagiti amin nga il-ili ken barbarrio. Nangisuro kadagiti sinagogada, inkasabana ti Naimbag a Damag maipapan iti Pagarian ken pinaimbagna dagiti tattao kadagiti amin a kita ti sakit ken sagabaen.

³⁶Simnek ti kaasi ni Jesus kadagiti tattao idi makitana ida a mabutbuteng ken nakakaasi. Kasda la karnero nga awan pastorda.

³⁷“Adu ti anien, ngem bassit ti agani,” kinuna ni Jesus kadagiti adalanna.

³⁸“Agdawatkayo ngarud iti akinkukua iti maani tapno mangibaon kadagiti agani.”