Read Iloko Mark 1 Bible Online

Mark 1 - Iloko bible

Mark 1

¹Daytoy ti pangrugian ti Naimbag a Damag maipapan ken ni Jesu-Cristo nga Anak ti Dios,

²kas nailanad iti libro ni profeta Isaias: “‘Sakbay a mapanka,’ kinuna ti Dios, ‘adtoy ti ibaonko a mangisagana iti dalanmo.’

³Idiay let-ang, adda mangipukpukkaw: ‘Isaganayo ti dalan ti Apo, pasayaatenyo ti pagnaanna!’”

⁴Nagparang ni Juan idiay let-ang a namumbuniag ken nangaskasaba. Impakaammona kadagiti tattao nga agbabawida kadagiti basbasolda ken mabuniaganda tapno pakawanen ti Dios dagiti basbasolda.

⁵Adu ti napan nagdengngeg kenkuana. Naggapuda iti entero a probinsia ti Judea ken iti siudad ti Jerusalem. Nagbabawida a silalatak kadagiti basbasolda ket binuniagan ida ni Juan idiay karayan Jordan.

⁶Naaramid iti dutdot ti kamelio ti kawes ni Juan. Lalat ti barikesna. Dudon ken diro ti pinagbibiagna.

⁷“Sumarsaruno kaniak ti addaan iti dakdakkel a pannakabalin ngem siak,” impakaammona kadagiti tattao. “Diak pay maikari nga agrukob a mangwarwar iti sandaliasna.

⁸Buniagankayo iti danum ngem buniagannakayo iti Espiritu Santo.”

⁹Iti saan a nabayag, simmangpet ni Jesus a naggapu idiay Nazaret, maysa nga ili iti probinsia ti Galilea. Binuniagan ni Juan idiay karayan Jordan.

¹⁰Apaman a nakasang-at ni Jesus iti danum, nakitana a naglukat ti langit ken ti Espiritu Santo a kas kalapati a bumabbaba kenkuana.

¹¹Adda maysa a timek a naggapu iti langit. “Sika ti Anakko a dungdungngoek,” kinunana. “Maay-ayoak unay kenka.”

¹²Ti Espiritu inturongna a dagus ni Jesus idiay let-ang.

¹³Nagyan sadiay ni Jesus iti 40 nga aldaw ket iti dayta a tiempo, sinulsulisog ni Satanas. Adda dagiti atap nga ayup sadiay, ngem napan dagiti angheles ket nagserbida ken ni Jesus.

¹⁴Kalpasan ti pannakaibalud ni Juan, napan ni Jesus idiay Galilea. Inkaskasabana ti Naimbag a Damag a naggapu iti Dios.

¹⁵“Dimtengen ti aldaw,” kinunana. “Asidegen ti Pagarian ti Dios. Agbabawikayo kadagiti basbasolyo ket mamatikayo iti Naimbag a Damag.”

¹⁶Idi magmagna ni Jesus iti igid ti Dan-aw ti Galilea, nakitana ti dua a mangngalap, da Simon ken Andres nga agkabsat, a mangiwaywayat iti iketda.

¹⁷“Surotendak ket pagbalinenkayto a mangngalap iti tao,” kinuna ni Jesus kadakuada.

¹⁸Pinanawanda a dagus dagiti iketda ket simmurotda kenkuana.

¹⁹Intuloy ni Jesus ti nagna. Idi makaadayo bassit, nakitana da Santiago ken Juan nga annak ni Zebedeo. Silulugan dagiti agkabsat iti bangkada ket isagsaganada dagiti iketda.

²⁰Inayaban a dagus ni Jesus ida. Pinanawanda ni amada iti bangka, agraman dagiti lallaki a natangdanan a tumulong kadakuada, ket simmurotda ken ni Jesus.

²¹Dimteng ni Jesus ken dagiti adalanna iti ili a Capernaum. Iti Aldaw a Panaginana, napan nangisuro ni Jesus iti sinagoga.

²²Nasdaaw dagiti nagdengngeg gapu iti wagas ti panangisurona. Insurona ida a kas maysa nga addan turay, saan a kas kadagiti mamaestro iti Linteg.

²³Pagammoan, simrek iti sinagoga ti maysa a lalaki a linuganan ti dakes nga espiritu.

²⁴“Ania ti gagaram kadakami, Jesus a taga-Nazaret?” inyikkisna. “Immayka kadi a mangdadael kadakami? Am-ammoka: sika ti nasantoan nga imbaon ti Dios!”

²⁵“Agulimekka!” intubngar ni Jesus iti dakes nga espiritu. “Rummuarka iti dayta a tao!”

²⁶Ti dakes nga espiritu pinagkuyegyegna ti lalaki, imkis iti napigsa ket rimmuar kenkuana.

²⁷Nasdaaw dagiti tattao ket nagsisinnaludsodda, “Ania daytoy? Maysa kadi a baro a pannursuro? Addaan daytoy a tao iti turay a mangbilin kadagiti dakes nga espiritu ket agtungpalda kenkuana!”

²⁸Dagus a nagdinamag ni Jesus iti amin a suli ti probinsia ti Galilea.

²⁹Pimmanawda a dagus iti sinagoga ket nagturongda iti balay da Simon ken Andres. Kaduada da Santiago ken Juan.

³⁰Aggurigor idi ti babai a katugangan ni Simon ket agid-idda. Apaman a simmangpet ni Jesus, imbagada kenkuana ti kasasaad ti masakit.

³¹Napan ni Jesus iti ayan ti masakit, iniggamanna ti imana ket tinulonganna a bumangon. Naawan a dagus ti gurigorna, ket sinerbianna ida.

³²Idi nakalneken ti init iti dayta nga aldaw, nagdudupudop dagiti tattao iti dayta a lugar iti sango ti balay nga ayan ni Jesus. Impanda kenkuana dagiti masaksakit ken dagiti linuganan ti demonio.

³⁴Pinaimbag ni Jesus dagiti adu nga agsagsagaba iti nadumaduma a kita ti sakit. Pinaksiatna ti adu a demonio. Ngem dina pinalubosan nga agsao dagiti demonio ta ammoda ti kinasiasinona.

³⁵Nasipnget pay laeng iti sumuno a bigat idi bumangon ni Jesus ket pimmanaw iti balay. Nagturong iti disso nga awan matagtagitao iti ruar ti ili, ket nagkararag sadiay.

³⁶Ngem napan binirok ni Simon ken dagiti kakaduana.

³⁷Idi masarakanda kinunada kenkuana, “Sapsapulendaka dagiti amin a tattao.”

³⁸“Intayo kadagiti kabangibang nga il-ili,” insungbat ni Jesus. “Masapul a mangasabaak met kadagita a lugar, ta daytoy ti gapuna a pimmanawak idiay Capernaum.”

³⁹Ngarud, sinursorna amin a paset ti Galilea. Nangaskasaba kadagiti sinagogada ken namakpaksiat kadagiti demonio.

⁴⁰Adda lalaki nga agsagsagaba iti kukutel. Napan ken ni Jesus, nagparintumeng ket nagpakpakaasi kenkuana. “No kayatmo, mapaimbagnak,” kinunana.

⁴¹Naasian ni Jesus, ket sinagidna ti masakit. Kinunana, “Kayatko. Umimbagkan!”

⁴²Dagus a naikkat ti sakit ti lalaki ket immimbagen.

⁴³Pinapanaw a dagus ni Jesus ti lalaki kalpasan ti nainget a panangbilinna:

⁴⁴“Denggem! Awan pangibagbagaam iti daytoy. Inka agparang iti padi tapno kitaennaka. Kalpasanna, kas imbilin ni Moises, mangipaayka iti daton a pammaneknekmo kadagiti tattao nga immimbagkan.”

⁴⁵Ngem idi nakapanawen ti lalaki, impadpadamagna iti amin a lugar ti napasamak kenkuana. Isut' gapuna a saanen a makastrek a silalatak ni Jesus iti uray ania nga ili. Nagyan ketdi kadagiti disso nga awan matagtagitao ngem uray no kasta, dinanon dagiti tattao a naggapu kadagiti nadumaduma a lugar.