Read Iloko Mark 10 Bible Online

Mark 10 - Iloko bible

Mark 10

¹Kalpasan ti ipapanaw ni Jesus iti dayta a lugar, napan idiay Judea ken binallasiwna ti karayan Jordan. Adu manen a tattao ti napan iti yanna ket insurona ida a kas iti masansan nga ar-aramidenna.

²Immasideg kenkuana ti sumagmamano a Fariseo tapno suotenda. Sinaludsodda, “Ibagam man: Ipalubos aya ti Linteg nga isina ti lalaki ti asawana?”

³Simmungbat ni Jesus babaen ti maysa met a saludsod, “Ania kadi ti imbilin ni Moises kadakayo?”

⁴Insungbatda, “Impalubos ni Moises a mangisurat ti lalaki iti pakakitaan iti panagsina sana papanawen ti asawana.”

⁵Kinuna ni Jesus kadakuada: “Insurat ni Moises daytoy a linteg nga agpaay kadakayo gapu ta narigatkayo a makasursuro.

⁶Ngem idi punganay, idi pinarsua ti Dios daytoy lubong, naisao, ‘Inaramid ti Dios ida a lalaki ken babai,’ kas kuna ti Nasantoan a Surat.

⁷‘Ket daytoy ti gapuna a panawanto ti lalaki dagiti nagannak kenkuana ket makitiponto iti asawana;

⁸agbalindanton a maymaysa. Iti kasta, saandan a dua, no dida ket maymaysa a bagi.’

⁹Ngarud, saan a pagsinaen ti tao ti pinagtipon ti Dios.”

¹⁰Idi nagsublida iti balay, pinalutpot dagiti adalan kenkuana daytoy a banag.

¹¹Kinuna ni Jesus kadakuada, “Ti lalaki a mangisina iti asawana ket kalpasanna mangasawa iti sabali, makabasol iti pannakikamalala a maikaniwas iti umuna nga asawana.

¹²Kasta met, ti babai a mangisina iti asawana sa makiasawa iti sabali, makabasol iti pannakikamalala.”

¹³Adda tattao a nangyeg kadagiti ubbing ken ni Jesus tapno ipatayna koma ti imana kadakuada, ngem pinaritan ida dagiti adalan.

¹⁴Idi madlaw ni Jesus ti inaramid dagiti adalanna, nakaunget ket kinunana kadakuada, “Palubosanyo dagiti ubbing nga umay kaniak. Diyo paritan ida ta dagiti kas kadakuada ti agtagikua iti Pagarian ti Dios.

¹⁵Laglagipenyo a dinto makastrek iti Pagarian ti Dios ti siasinoman a di umawat iti daytoy a Pagarian a kas iti panangawat ti maysa nga ubing.”

¹⁶Kalpasanna, sinaklotna dagiti ubbing ket impatayna ti imana iti tunggal maysa kadakuada sana binendisionan ida.

¹⁷Agrubrubbuat ni Jesus a pumanaw sadiay idi adda maysa a lalaki a nagtaray a napan kenkuana. Nagparintumeng iti sangoananna, ket sinaludsodna, “Naimbag a Maestro, ania ti aramidek tapno magun-odko ti biag nga agnanayon?”

¹⁸Kinuna ni Jesus, “Apay nga awagannak iti naimbag? Awan ti naimbag no di laeng ti Dios.

¹⁹Ammom dagiti bilbilin: ‘Dika mamapatay. Dika makikamalala. Dika agtakaw. Dika agsaksi iti ulbod. Dika agsuitik. Agraemka kadagiti nagannak kenka.’”

²⁰“Maestro,” insungbat ti tao, “manipud kinaubingko tinungtungpalko amin dagitoy a bilbilin.”

²¹Minatmatan ni Jesus a siaayat ket kinunana kenkuana, “Adda maysa a pagkurangam. Inka ilako ti amin a sanikuam samo ited ti paglakoam kadagiti napanglaw, ket addanto kinabaknangmo sadi langit. Kalpasanna, umayka sumurot kaniak.”

²²Idi nangngegna daytoy, limmiday ti rupana ti lalaki ket silaladingit a pimmanaw agsipud ta nabaknang unay.

²³Inwaras ni Jesus ti panagkitana sana kinuna kadagiti adalanna, “Nagrigat ketdin a sumrek dagiti nabaknang iti Pagarian ti Dios!”

²⁴Nasdaaw dagiti adalan gapu kadagitoy a saona, ngem intuloy ni Jesus ti nagkuna, “Annakko, anian a nagrigat ti sumrek iti Pagarian ti Dios!

²⁵Nalaklaka ti ilulusot ti kamelio iti abut ti dagum ngem ti iseserrek ti baknang iti Pagarian ti Dios.”

²⁶Ad-adda manen ti siddaaw dagiti adalan, ket nagsisinnaludsodda, “Siasino ngaruden ti maisalakan?”

²⁷Minatmatan ni Jesus ida sana kinuna: “Saan a maaramid ti tao daytoy, ngem kabaelan ti Dios. Ta kabaelan nga aramiden ti Dios dagiti amin a bambanag.”

²⁸“Adtoy,” kinuna ni Pedro, “binaybay-anmi amin ket simmurotkami kenka.”

²⁹Kinuna ni Jesus kadakuada, “Pudno dayta ket ibagak kadakayo, siasinoman a mangpanaw iti balay wenno kakabsat wenno nagannak wenno annak wenno dagdagana gapu kaniak ken iti Naimbag a Damag,

³⁰ad-adunto ti awatenna ditoy a biag. Awatennanto ti nasursurok pay ngem ginasgasut a balbalay, kakabsat, nagannak, annak ken dagdaga—agraman pannakaidadanes; ket iti mapasungad a panawen, awatennanto ti biag nga agnanayon.

³¹Ngem adu dagiti umun-una ita a maud-udinto, ket adu dagiti maud-udi ita nga umun-unanto.”

³²Addan idi da Jesus ken dagiti adalanna iti dalan a sumang-at idiay Jerusalem. Immun-una ni Jesus ngem dagiti madandanagan nga adalan ket sumarsaruno met dagiti sibubuteng a tattao. Inyadayo manen ni Jesus dagiti sangapulo ket dua nga adalan sana sinarita dagiti mapasamakto kenkuana.

³³Kinunana, “Denggenyo, sumang-attayo idiay Jerusalem ket mayawatto sadiay ti Anak ti Tao kadagiti panguloen a papadi ken kadagiti mamaestro iti Linteg. Ikeddengdanto a mapapatay sadanto yawat kadagiti Hentil

³⁴a mangang-angaw, mangtuptupra, mangsapsaplit ken mangpapatay kenkuana. Ngem agungarto kalpasan ti tallo nga aldaw.”

³⁵Immasideg ken ni Jesus da Santiago ken Juan nga annak ni Zebedeo, ket kinunada, “Maestro, adda koma dawatenmi kenka.”

³⁶“Ania ti kayatyo nga ipaayko kadakayo?” sinaludsod ni Jesus.

³⁷“Ipalubosmo koma nga inton agtugawka iti tronom idiay nadayag a Pagarian, makikatugawkamto kenka, ti maysa iti makannawanmo ket ti sabali iti makannigidmo,” indawatda.

³⁸“Diyo ammo ti dawdawatenyo,” imbaga ni Jesus. “Kabaelanyo kadi ti uminum iti kopa a paginumak? Kabaelanyo aya ti mabuniagan a kas iti pannakabuniagko?”

³⁹“Wen, kabaelanmi,” insungbatda. Kinuna ni Jesus kadakuada, “Kabaelanyo ti uminum iti kopa a paginumak ken mabuniagan a kas iti pannakabuniagko.

⁴⁰Ngem awan ti karbengak a mangpili no siasinonto ti agtugaw iti makannawanko wenno iti makannigidko. Ti Dios ti mangted kadagitoy kadagiti nakaisaganaanna.”

⁴¹Nakapungtot dagiti sangapulo nga adalan kada Santiago ken Juan idi nadamagda daytoy.

⁴²Isut' gapuna nga inayaban ni Jesus dagiti sangapulo ket dua ket kinunana, “Pagaammoyo a dagiti maibilang nga agturay kadagiti Hentil adipenenda dagiti iturayanda, ket dagiti panguloda adipenenda met dagitoy nga agturay.

⁴³Ngem saan koma a kasta ti aramidenyo. Ti agtarigagay nga agpangulo, masapul nga agserbi kadakayo amin.

⁴⁴Ket ti agtarigagay nga isu ti kangrunaan, masapul nga isu ti adipenyo.

⁴⁵Ta uray ti Anak ti Tao saan nga immay a pagserbian, no di ket tapno agserbi ken yawatna ti biagna a pangsubbot kadagiti adu a tattao.”

⁴⁶Dimteng ni Jesus ken dagiti adalanna agraman dagiti adu a tattao idiay Jerico. Idi a pumampanawda sadiay, adda nga agtugtugaw iti igid ti dalan ti maysa nga agpalpalama, ni Bartimeo a bulsek nga anak ni Timeo.

⁴⁷Apaman a nangngegna nga adda ni Jesus a taga-Nazaret, impukkawna, “Jesus nga Anak ni David, kaasiannak kadi!”

⁴⁸Adu kadagiti tattao ti nagunget kenkuana ket imbagada nga agulimek, ngem inyad-addana ketdi ti nangipukkaw, “Anak ni David, kaasiannak kadi!”

⁴⁹Nagsardeng ni Jesus. “Ayabanyo man ditoy,” kinunana. Inayabanda ngarud ti bulsek. “Agragsakka!” kinunada kenkuana. “Tumakderka, ta paayabannaka.”

⁵⁰Inwarsi ni Bartimeo ti kagayna, timmakder a dagus ket immasideg ken ni Jesus.

⁵¹“Ania ti kayatmo nga aramidek kenka?” sinaludsod ni Jesus. “Maestro, makakitaak koma!” insungbat ti bulsek.

⁵²“Inkan,” kinuna ni Jesus. “Pinaimbagnaka ti pammatim.” Nakakita a dagus ti bulsek ket simmurot ken ni Jesus.