Read Iloko Mark 11 Bible Online

Mark 11 - Iloko bible

Mark 11

¹Idi sumungsungadda idiay Jerusalem, ket addadan idiay Bantay Olivo, iti nagbaetan dagiti ili a Betfage ken Betania, pinauna ni Jesus dagiti dua nga adalanna.

²Imbilinna, “Inkayo iti masungad a barrio. Apaman a makadanonkayo sadiay, masarakanyonto ti sigagalut nga urbon ti asno a di pay nasaksakayan. Warwaranyo ket yegyo ditoy.

³No adda agsaludsod kadakayo no apay a warwaranyo ti urbon, ibagayo kenkuana, ‘Ti Apo masapulna a pagsakayan; paisublinanto met laeng a dagus.’”

⁴Napanda ngarud ket nasarakanda ti maysa nga urbon ti asno nga adda iti kalsada ken sigagalut iti ridaw ti maysa a balay. Idi warwarwaranda ti urbon,

⁵sinaludsod kadakuada ti sumagmamano a tattao nga agtaktakder sadiay, “Apay a warwaranyo ti urbon?”

⁶Imbaga dagiti adalanna ti imbilin ni Jesus kadakuada ket pinalubosan ida dagiti tattao.

⁷Impanda ti urbon iti yan ni Jesus. Inikkatda dagiti kagayda ket inyap-apda iti bukot ti urbon sa nagsakay ni Jesus.

⁸Adu a tattao ti nangyaplag kadagiti kagayda iti dalan. Nangala met dagiti dadduma kadagiti narukbos a sangsanga nga adda iti taltalon ket inyaplagda iti dalan.

⁹“Madaydayaw ti Dios!” impukpukkaw dagiti tattao a magmagna iti sangoanan ni Jesus, ken dagiti adda iti likudanna. “Bendisionan koma ti Dios ti umay iti nagan ti Apo!

¹⁰Bendisionan koma ti Dios ti umay a pagarian ni amatayo a David! Madaydayaw ti Dios!”

¹¹Simrek ni Jesus idiay Jerusalem. Napan iti Templo ket kinitana dagiti amin nga adda iti aglawlaw. Ngem gapu ta mumalemen, napan idiay Betania agraman dagiti sangapulo ket dua nga adalan.

¹²Iti sumuno nga aldaw, idi agsubsublida a naggapu idiay Betania, nabisinan ni Jesus.

¹³Nakitana iti adayo ti narukbos a kayo nga igos. Inasitganna ti kayo bareng no adda masarakanna a bunga. Ngem pasig met a bulong ti nakitana agsipud ta saan pay idi a panagbubunga ti igos.

¹⁴“Manipud ita,” kinuna ni Jesus iti kayo, “dikanto agbungan!” Nangngeg dagiti adalanna ti sinaona.

¹⁵Idi dumtengda idiay Jerusalem, napan ni Jesus idiay Templo. Pinapanawna dagiti agtagtagilako ken aggatgatang iti uneg ti Templo. Binalintuagna dagiti lamisaan dagiti agsuksukat iti kuarta, kasta met dagiti tugaw dagiti aglaklako iti kalapati.

¹⁶Pinaritanna pay ti siasinoman nga adda awitna a lumasat iti paraangan ti Templo.

¹⁷Kalpasanna, insurona dagiti tattao, “Nailanad iti Nasantoan a Surat a kuna ti Dios, ‘Managananto ti balayko iti balay a pagkararagan nga agpaay kadagiti amin a tattao.’ Ngem pinagbalinyo a rukib dagiti tulisan!”

¹⁸Nadamag dagiti panguloen a papadi ken dagiti mamaestro iti Linteg daytoy a pasamak. Ngarud, impampamuspusanda ti panangpapatayda ken ni Jesus. Nagbutengda kenkuana agsipud ta nagsidsiddaawan dagiti amin a tao ti pannursurona.

¹⁹Idi sumipngeten, pimmanaw ni Jesus iti siudad agraman dagiti adalanna.

²⁰Iti agsapa, idi magmagnada iti dalan, nakitada ti kayo nga igos a nagangon agraman dagiti ramutna.

²¹Nalagip ni Pedro ti pannakailunod ti kayo. “Maestro,” kinunana ken ni Jesus, “kitaem! Nagangon ti igos nga inlunodmo idi kalman!”

²²Insungbat ni Jesus kadakuada, “Laglagipenyo daytoy! No adda pammatiyo iti Dios,

²³mabalinyo a kuna iti daytoy a bantay, ‘Umaliska ditoy ket tumpuakka idiay baybay.’ No saankayo la ket nga agduadua, ngem patienyo a matungpalto ti kunayo, maaramidto kadakayo.

²⁴Gapu iti daytoy, ibagak kadakayo: Tunggal agkararagkayo ket adda dawatenyo, patienyo a naawatyon, ket maitedto ti aniaman a dawatenyo.

²⁵Tunggal tumakderkayo nga agkararag, pakawanenyo ti siasinoman a nakabasol kadakayo tapno pakawanento met ni Amayo sadi langit dagiti basbasolyo.”

²⁷Nagsublida manen idiay Jerusalem. Idi agpagnapagna ni Jesus iti uneg ti Templo, inasitgan dagiti panguloen a papadi, dagiti mamaestro iti Linteg ken dagiti panglakayen.

²⁸Sinaludsodda kenkuana, “Ania ti kalintegam a mangaramid kadagitoy? Siasino ti nangted kenka iti turay a mangaramid kadagitoy?”

²⁹Insungbat ni Jesus, “Adda saludsodek kadakayo, ket no masungbatandak, ibagak met no siasino ti nangted iti kalintegak nga agaramid kadagitoy.

³⁰Ibagayo man, naggapuan ti turay ni Juan a mangbuniag: naggapu iti Dios wenno iti tao?”

³¹Nagsisinnaludsodda, “Ania ti isungbattayo? No kunatayo a naggapu iti Dios, kunananto, ‘Apay ngarud a dikay namati ken ni Juan?’

³²Ngem no kunatayo a naggapu iti tao…” (Nagbutengda kadagiti tattao, ta bigbigenda ni Juan a maysa a profeta.)

³³Iti kasta, insungbatda ken Jesus, “Dimi ammo.” “Diak met ngarud ibaga kadakayo no ania ti kalintegak nga agaramid kadagitoy,” kinuna ni Jesus.