Read Iloko Mark 12 Bible Online

Mark 12 - Iloko bible

Mark 12

¹Inrugi ni Jesus ti nagsao kadakuada babaen kadagiti pangngarig: “Adda idi maysa a tao a nagmula iti adu nga ubas. Inaladanna ti kaubasan, nangaramid iti pagpespesan iti ubas sa nangipatakder iti torre a pagwanawanan. Kalpasanna, impaabangna ti kaubasan kadagiti makitaltalon sa nagbiahe iti sabali a daga.

²“Idi dumteng ti panagbuburas iti ubas, imbaonna ti maysa nga adipenna a mapan kadagiti makitaltalon tapno alaenna ti bingayna.

³Ngem tiniliw dagiti makitaltalon ti naibaon, kinabkabilda, ket pinagawidda nga ima-ima.

⁴“Sabali manen nga adipen ti imbaon ti akinkukua iti kaubasan, ket minalo dagiti makitaltalon ti ulona sada pinabpabainan.

⁵“Nangibaon manen iti sabali nga adipen, ket pinatayda. Kasta a kasta ti namay-anda kadagiti adu pay a naibaon. Pinangpang-orda dagiti dadduma, ket pinatayda dagiti sabali.

⁶Maymaysan ti natda a maibaonna. Isu ti dungdungngoenna nga anak a lalaki. Kamaudiananna, imbaonna kadakuada ta kinunana, ‘Awan duadua a raemendanto toy anakko.’

⁷Ngem kinuna dagiti makitaltalon iti maysa ken maysa kadakuada, ‘Daytoyen ti agtawid. Umaykayo ta papatayentayo, ket kukuatayton ti tawidenna!’

⁸“Tiniliwda ti anak ket pinatayda sada imbelleng ti bangkayna iti ruar ti kaubasan.

⁹“Anianto ngarud ti aramiden ti akinkukua iti kaubasan?” sinaludsod ni Jesus. “Mapannanto papatayen dagidiay a tattao ket ipasublatnanto ti kaubasan kadagiti sabali a makitaltalon.

¹⁰Nabasayo kadin daytoy a paset ti Nasantoan a Surat? ‘Ti bato nga imbelleng dagiti agipatpatakder, Nagbalin a kangrunaan a bato.

¹¹Inaramid daytoy ti Apo, Ket anian a nakaskasdaaw iti imatangtayo!’”

¹²Pinadas dagiti panguloen dagiti Judio a patiliw ni Jesus gapu ta naawatanda a sinaona daytoy a pangngarig a maibusor kadakuada. Ngem agsipud ta nagbutengda kadagiti adu a tattao, binaybay-anda ni Jesus ket pinanawanda.

¹³Naibaon ken ni Jesus ti sumagmamano a Fariseo ken Herodiano tapno palab-oganda babaen kadagiti saludsodda.

¹⁴Napanda kenkuana ket kinunada, “Maestro, ammomi a saanka nga agul-ulbod. Dimo ikankano no ania ti pampanunoten dagiti tattao agsipud ta awan idumdumam, no di ket isurom kadakuada ti pudno a pagayatan ti Dios. Ibagam man ngarud kadakami no maisalungasing iti Linteg ti panagbayad iti buis iti Emperador? Agbayadkami kadi wenno saan?”

¹⁵Ngem nadlaw ni Jesus ti sikapda ket kinunana, “Apay a suotendak? Ikkandak man iti bagi ti pirak ta kitaek.”

¹⁶Inikkanda iti bagi ti pirak. “Siasino ti akinladawan ken akinnagan iti daytoy?” sinaludsod ni Jesus. “Ti Emperador,” insungbatda.

¹⁷“Itedyo ngarud iti Emperador dagiti kukua ti Emperador,” kinuna ni Jesus. “Itedyo met iti Dios dagiti kukua ti Dios.” Ket nagsiddaawda kenkuana.

¹⁸Napan ken ni Jesus ti sumagmamano kadagiti Saduceo. (Saan a mamati dagiti Saduceo nga agungar dagiti natay.)

¹⁹Kinunada, “Maestro, insurat ni Moises daytoy a linteg kadatayo, ‘No matay ti maysa a lalaki ket mapanawanna ti asawana nga awan anakda, rebbeng ti kabsatna nga asawaen ti balo tapno aganakda iti pannakaanak daydi nagawan.’

²⁰“Adda idi pito nga agkakabsat a lallaki. Nangasawa ti inauna ngem natay nga awan putotna.

²¹Inasawa ngarud ti maikadua ti balo, ngem natay met nga awan putotna. Kasta met laeng ti naaramid iti maikatlo,

²²ken kadagiti sumarsaruno a kakabsatna. Nagsasaruno dagitoy pito nga agkakabsat a nangasawa iti babai ket natayda nga awanan annak. Kamaudiananna, natay met ti babai.

²³“Ngarud,” sinaludsodda, “inton agungarda iti aldaw ti panagungar, siasinonto ti akin-asawa iti babai, idinto ta inasawa met amin dagiti pito nga agkakabsat?”

²⁴Insungbat ni Jesus, “Agbiddutkayo. Ammoyo no apay? Gapu ta diyo ammo ti Nasantoan a Surat wenno ti pannakabalin ti Dios.

²⁵Ta inton agungar dagiti natay, didanto agaassawa, ta kasladanto kadagiti angheles sadi langit.

²⁶No maipapan iti pannakapagungar dagiti natay, diyo aya nabasa iti Libro ni Moises ti maipapan iti sumsumged a kayo? Naisurat a kinuna ti Dios ken ni Moises, ‘Siak ti Dios ni Abraham, ti Dios ni Isaac, ken ti Dios ni Jacob.’

²⁷Kayatna a sawen nga isu ti Dios dagiti sibibiag, saan a Dios dagiti natay. Agbiddutkayo iti napalalo.”

²⁸Nangngeg ti maysa a maestro iti Linteg ti panagsusuppiatda. Nakitana a napintas ti sungbat ni Jesus kadagiti Saduceo, ket immasideg kenkuana. “Ania kadi ti kangrunaan kadagiti bilbilin?” sinaludsodna.

²⁹Insungbat ni Jesus, “Daytoy ti kangrunaan a bilin, ‘Denggem, Israel! Ti Apo a Diostayo isu laeng ti Apo.

³⁰Ayatem ti Apo a Diosmo iti amin a pusom, iti amin a kararuam, iti amin a panunotmo ken iti amin a pigsam.’

³¹Ti maikadua a kangrunaan a bilin isu daytoy: ‘Ayatem ti padam a tao a kas iti bagim.’ Awanen ti bilin a nangnangruna ngem dagitoy.”

³²Kinuna ti maestro iti Linteg, “Agpayso dayta, Maestro. Pudno ti kunam a ti Apo laeng ti Dios, ket awan sabali a dios no di isu.

³³Ket masapul a ti tao ayatenna ti Dios iti amin a puso, iti amin a panunot ken iti amin a pigsana; ket masapul nga ayatenna ti padana a tao a kas iti panagayatna iti bagina. Naim-imbag nga adayo a tungpalen dagitoy dua a bilin ngem ti mangidaton iti Dios kadagiti animal ken kadagiti dadduma pay a sakrifisio iti altar.”

³⁴Nadlaw ni Jesus a simmungbat a sisisirib ti maestro iti Linteg, isut' gapuna a kinunana kenkuana, “Saanka nga adayo iti Pagarian ti Dios.” Kalpasan daytoy, awanen ti nakaitured nga agsaludsod ken Jesus.

³⁵Kabayatan ti panangisuro ni Jesus idiay Templo, sinaludsodna daytoy: “Apay a kuna dagiti mamaestro iti Linteg a ti Cristo ket agtaud iti kaputotan ni David?

³⁶Kinuna ni David met laeng, babaen iti paltiing ti Espiritu Santo: ‘Kinuna ti Apo iti Apok: Agtugawka ditoy makannawanko, Agingga a maparmekko dagiti kabusormo. Ket addada iti babaem.’

³⁷No ‘Apo’ kuna ni David kenkuana, kasano ngarud ti panagtaud ti Cristo iti kaputotan ni David?” Siraragsak dagiti adu a tattao a nangdengngeg ken ni Jesus.

³⁸Bayat ti panangisursurona kadakuada, kinunana: “Annadanyo dagiti mamaestro iti Linteg. Magustoanda ti magna a sikakawes iti nagayad ken makablaawan a siraraem iti publiko.

³⁹Pilienda dagiti kangrunaan a tugaw kadagiti sinagoga ken katan-okan a lugar iti fiestaan.

⁴⁰Gundawayanda dagiti balo a babbai, ket takawenda dagiti sanikuada sada ipakpakita ti atiddog a panagkararagda. Nadagdagsento ti dusada.”

⁴¹Idi agtugtugaw ni Jesus iti asideg ti pagitintinnagan iti daton idiay Templo, pinalpaliiwna ti panagipisok dagiti tattao iti kuartada. Adu a babaknang ti nagitinnag iti nawadwad a kuarta.

⁴²Adda balo a babai a napanglaw a nangitinnag iti dua a siping.

⁴³Inayaban ni Jesus dagiti adalanna. Kinunana, “Ibagak kadakayo, ad-adu ti intinnag ti napanglaw a balo iti pagitintinnagan iti daton ngem ti intinnag dagiti dadduma.

⁴⁴Ta intinnagda dagiti sobra ti kinabaknangda. Ngem ti balo, numan pay napanglaw, intedna ti kakaisuna nga adda kenkuana—intedna ti amin a mabalinna a pagbiag.”