Read Iloko Mark 13 Bible Online

Mark 13 - Iloko bible

Mark 13

¹Idi pumampanaw ni Jesus idiay Templo, maysa kadagiti adalanna ti nagkuna kenkuana, “Maestro, kitaem! Nagpipintas ketdin dagiti bato ken dagiti patakder!”

²“Makitam dagitoy dadakkel a patakder?” insungbat ni Jesus. “Awanto ti uray maysa a bato ditoy a mabati iti yanna. Marbadanto amin.”

³Idi agtugtugaw ni Jesus idiay Bantay Olivo a kasumbangir ti Templo, sililimed a napan kenkuana da Pedro, Santiago, Juan ken Andres.

⁴“Ibagam man kadakami no kaanonto a mapasamak daytoy?” insaludsodda kenkuana. “Anianto ti mapasamak a pakakitaan a dimtengen ti tiempo a pannakatungpal amin dagitoy?”

⁵Imballaag ni Jesus, “Agannadkayo! Diyo ipalubos nga adda mangallilaw kadakayo.

⁶Adunto ti umay ket aramatenda ti naganko a kunkunada, ‘Siak ti Cristo!’ ket adunto ti allilawenda.

⁷Dikay agdanag inton mangngegyo ti arimbangaw ti gubat ken damdamag maipapan kadagiti dadduma a gubgubat iti adayo. Masapul a mapasamak dagitoy, ngem dida kayat a sawen a dimtengen ti panungpalan.

⁸Aggugubatto dagiti nasion, kasta met dagiti pagpagarian. Addanto ginggined kadagiti nadumaduma a lugar. Umayto ti bisin. Pangrugian laeng dagitoy ti panagsagaba a kas iti panagpasikal ti agpasngay.

⁹“Agannadkayo. Tiliwen ken idarumdakayto. Saplitendakayto iti uneg dagiti sinagoga. Maisaklangkayto kadagiti agtuturay ken ar-ari gapu kaniak tapno paneknekanyo kadakuada ti Naimbag a Damag.

¹⁰Ngem sakbay a dumteng ti panungpalan, masapul a maikasaba ti Naimbag a Damag kadagiti amin a tattao.

¹¹No matiliw ken maidarumkayo, saanyo a pakadanagan no anianto ti sawenyo. Maipaltiing kadakayo iti dayta a kanito. Ta dagiti isaoyonto saan nga agtaud kadakayo no di ket iti Espiritu Santo.

¹²Dagiti tattao papapataydanto dagiti mismo a kakabsatda, ket kastanto met ti aramiden dagiti amma kadagiti annakda. Dagiti annak busorendanto dagiti nagannak kadakuada ket papapataydanto ida.

¹³Guraendakayto dagiti amin a tattao gapu kaniak. Ngem maisalakanto ti siasinoman a makaibtur agingga iti panungpalan.”

¹⁴“Makitayonto ‘Ti Nakabutbuteng a Mangdadael’ nga adda iti di rumbeng a pagsaadanna (maawatan koma ti agbasa ti kaipapanan daytoy). No agnaedkayo idiay Judea iti dayta a tiempo, masapul a kumamangkayo kadagiti bambantay.

¹⁵Umulog a dagus ti adda iti tuktok ti balay ket saanen a sumrek iti balayna a mangala iti mabalinna nga itugot.

¹⁶Ti adda iti taltalon saanen nga agawid a mangala iti kagayna.

¹⁷Kadagita nga aldaw, kakaasinto dagiti masikog ken dagiti agpaspasuso.

¹⁸Ikarkararagyo iti Dios a saan koma a mapasamak dagitoy iti tiempo ti nepnep.

¹⁹Ta ti rigat kadagita nga aldaw, saan pay a napaspasamak manipud pannakaparsua ti lubong. Dinto met masunotanen iti uray kaanoman.

²⁰Ngem pinabassit ti Apo ti bilang dagita nga aldaw, ta no saan, awan koma ti tao a makalasat. Ngem gapu kadagiti pinilina, kinissayanna ti bilang dagita nga aldaw.

²¹“Daytoy ti gapuna a no adda agkuna, ‘Kitaenyo, adda ditoy ti Cristo!’ wenno ‘Kitaenyo, adda sadiay!’ diyo patpatien.

²²Ta agparangto dagiti sinan-cristo ken dagiti sinan-profeta, ket agipakitadanto kadagiti pagilasinan ken datdatlag tapno yaw-awanda dagiti pinili ti Dios.

²³Agannadkayo! Impakaammokon kadakay amin dagitoy sakbay a mapasamakda.”

²⁴“Kadagita nga aldaw, kalpasan ti panawen ti rigat, agsipngetto ti init, dinto agraniag ti bulan,

²⁵agtinnagto dagiti bituen, ket dinto agsusurot ti urnos dagiti pannakabalin iti tangatang.

²⁶Kalpasanna, agparangto ti Anak ti Tao iti rabaw ti ulep nga umay a napnoan iti pannakabalin ken dayag.

²⁷Ibaonnanto dagiti angheles a mapan kadagiti uppat a suli ti daga tapno ummongendanto dagiti tattao a pinili ti Dios manipud iti amin a paset ti lubong.”

²⁸“Adalenyo ti sursuro a maadaw iti kayo nga igos: no aguggot ken agrusingen dagiti bulongna, ammoyo nga agbaliwen ti panawen.

²⁹Kasta met nga inton makitayo a mapasamak dagitoy, ammoyo nga asidegen ket dandanin mangrugi.

³⁰Laglagipenyo a mapasamakto amin dagitoy sakbay a matay dagiti amin a tattao iti daytoy a kaputotan.

³¹Mapukawto ti langit ken ti daga, ngem pulos a dinto mapukaw dagiti saok.”

³²“Ngem no maipapan iti yaay dayta nga aldaw wenno oras, awan ti makaammo. Saan nga ammo dagiti angheles sadi langit wenno ti Anak. Ti laeng Ama ti makaammo.

³³Agannadkayo. Agsaganakayo, ta diyo ammo no kaano a dumteng dayta a tiempo.

³⁴“Mayarig daytoy iti maysa a tao nga agbiahe iti adayo a lugar. Sakbay a pumanaw, italekna ti balayna kadagiti adipenna. Ikkanna ti tunggal maysa iti pagrebbengan ket bilinenna nga agridam ti agaywan iti ruangan.

³⁵“Agridamkayo ngarud, ta diyo ammo no kaano ti isasangpet ti akimbalay: mabalin nga iti sardam wenno iti tengnga ti rabii wenno iti parbangon wenno iti agsapa.

³⁶Wen, agsaganakayo amangan no sumangpet a kellaat ket madanonnakayo a matmaturog.

³⁷“Ti ibagak kadakayo, isaok met kadagiti amin a tattao: Agsaganakayo!”