Read Iloko Mark 14 Bible Online

Mark 14 - Iloko bible

Mark 14

¹Dua pay nga aldaw, dumtengen ti Paskua ken ti Fiesta ti Tinapay nga awan Lebadurana. Agsapsapul dagiti panguloen a papadi ken mamaestro iti Linteg iti nalimed a panangtiliw ken panangpapatayda ken ni Jesus.

²“Ditay iranrana iti fiesta, amangan no rumsua ti riribuk,” kinunada.

³Adda idi ni Jesus idiay Betania iti balay ni Simon nga agkukutel. Idi madama a mangmangan, dimteng ti maysa a babai a nakaiggem iti sangabotelia a nardo, maysa a nangina a bangbanglo. Binuongna ti botelia sana imbukbok ti bangbanglo iti ulo ni Jesus.

⁴Nakapungtot ti sumagmamano a tattao nga adda sadiay ket kinunada iti maysa ken maysa, “Apay a sinayangna ti bangbanglo?

⁵Nailako koma iti nasurok a tallogasut a denario a maited kadagiti napanglaw.” Kasta unay ti panangbabalawda iti babai,

⁶ngem kinuna ni Jesus, “Baybay-anyo! Apay a babalawenyo? Nasayaat unay ti impaayna kaniak.

⁷Kankanayon nga adda dagiti napanglaw iti dennayo, ket uray ania a kanito matulonganyo ida. Ngem saan a kankanayon nga addaak iti arpadyo.

⁸Inaramidna ti kabaelanna. Sinapsapoannan toy bagik a maisagana iti pannakaitanem.

⁹Kinapudnona, kunak kadakayo: Sadinoman iti entero a lubong a pakaikaskasabaanto ti Naimbag a Damag, masarsaritanto ti inaramid daytoy a babai a pakalaglagipan kenkuana.”

¹⁰Maysa ni Judas Iscariote kadagiti sangapulo ket dua nga adalan. Napan kadagiti panguloen a papadi tapno makitulag a yawatna ni Jesus kadakuada.

¹¹Naragsakanda a nakangngeg iti imbagana, ket inkarida nga ikkan iti kuarta. Isut' gapuna a binirbiroken ni Judas ti gundawayna a mangliput ken ni Jesus.

¹²Umuna idi nga aldaw ti Fiesta ti Tinapay nga awan Lebadurana ket maidaton dagiti urbon a karnero nga agpaay iti Paskua. Sinaludsod dagiti adalan ni Jesus, “Sadino ti kayatmo a pangisaganaanmi iti pangrabiim iti Paskua?”

¹³Imbaon ni Jesus ti dua kadagiti adalanna. Kinunana, “Inkayo idiay siudad ket masabatyonto ti maysa a tao a nakaawit iti sangakaramba a danum.

¹⁴Surotenyo iti balay a serkanna ket kunaenyonto iti akimbalay: ‘Kuna ti Maestro, Sadino ti kuarto a pangananminto kadagiti adalan iti pangrabii ti Paskua?’

¹⁵Ipakitananto kadakayo ti maysa a nalawa a kuarto nga akingngato, naisagana ken addaan kadagiti masapsapul. Sadiay ti pangisaganaanyo iti pangrabiitayo.”

¹⁶Pimmanaw dagiti adalanna. Napanda iti siudad ket nasarakanda amin kas imbaga ni Jesus ket insaganada ti pangrabii a pangrambak iti Paskua.

¹⁷Idi rumabiin, dimteng sadiay ni Jesus ken dagiti sangapulo ket dua nga adalanna.

¹⁸Kabayatan ti pannanganda, kinuna ni Jesus, “Ibagak kadakayo ti pudno: maysa kadakayo a makilanglanglang kaniak ita ti mangliputto kaniak.”

¹⁹Nagliday dagiti adalanna ket maysa-maysa ti nagsaludsod kenkuana, “Siak kadi dayta kunkunam?”

²⁰Insungbat ni Jesus, “Maysa kadakayo a sangapulo ket dua a makisawsawsaw kaniak iti tinapay iti malukongko.

²¹Matayto ti Anak ti Tao kas naisurat maipapan kenkuana, ngem kaasinto pay ti mangliput iti Anak ti Tao. Naim-imbag pay koma a saan a nayan-anak dayta a tao!”

²²Idi mangmanganda, nangala ni Jesus iti tinapay ket kalpasan ti panagyamanna iti Dios, pinisina sana inted kadagiti adalanna. “Alaenyo ket kanenyo. Daytoy ti bagik,” kinunana.

²³Nangala ni Jesus iti kopa, nagyaman iti Dios sana inyawat kadakuada, ket imminumda amin.

²⁴Kinunana kadakuada: “Daytoy ti darak a mamatalged iti tulag ti Dios, ti darak a maiparukpok nga agpaay iti adu a tattao.

²⁵Kinapudnona, kunak kadakayo, diakto uminumen iti arak ti ubas agingga iti dayta nga aldaw nga uminumak iti baro a tubbog ti ubas iti Pagarian ti Dios.”

²⁶Kalpasanna, nagkantada iti maysa nga himno sada rimmuar a napan idiay Bantay Olivo.

²⁷Kinuna ni Jesus kadakuada: “Dakay amin panawandakto ta kuna ti Nasantoan a Surat, ‘Patayento ti Dios ti agpaspastor ket mawarawaranto dagiti karnero.’

²⁸Ngem kalpasan ti pannakapagungarko, umun-unaakto ngem dakayo a mapan idiay Galilea.”

²⁹“Uray pumanawdanto amin,” insungbat ni Pedro, “dikanto panawan.”

³⁰Kinuna ni Jesus kenkuana, “Laglagipem daytoy: Sakbay ti maikadua a panagtaraok ti kawitan iti daytoy a rabii, namitlonton nga imbagam a dinak am-ammo.”

³¹“Uray no matayak a mairaman kenka,” sipapasnek nga insungbat ni Pedro, “pulos a dikanto paglikudan.” Kasta met ti kinuna dagiti dadduma nga adalan.

³²Dimteng ni Jesus ken dagiti adalanna iti maysa a disso a managan Getsemani. Kinunana kadakuada, “Agtugawkayo ditoy bayat ti panagkararagko.”

³³Inkuyogna da Pedro, Santiago ken Juan. Nagdanag ken nariribukan.

³⁴“Arigna a matayak gapu iti nakaro a ladingit,” kinunana kadakuada. “Agbatikayo ditoy ket agbantaykayo.”

³⁵Immadayo bassit sa nagpakleb iti daga, ket inkararagna a no mabalin koma maliklikanna dayta nga oras ti panagsagaba.

³⁶“Ama,” indawatna, “Ama, no mabalin koma, ilisinak iti daytoy kopa ti panagsagaba. Ngem saan a ti pagayatak ti maaramid, no di ket ti pagayatam.”

³⁷Idi agsubli ni Jesus, nadanonna a matmaturog dagiti tallo nga adalan. “Simon,” kinunana ken ni Pedro, “matmaturogka kadi? Dika aya makapagpuyat iti maysa nga oras?”

³⁸Kinunana kadakuada: “Agpuot ken agkararagkayo tapno saankayo a matnag iti sulisog. Natudio ti espiritu, ngem nakapuy ti lasag.”

³⁹Immadayo manen ni Jesus ket nagkararag. Inulitna ti dawatna.

⁴⁰Nagsubli manen kadagiti adalan ket nadanonna ida a nakaturog, ta makaturturogda la unay. Dida ammo no ania ti ibagada kenkuana.

⁴¹Idi kapamitlo ni Jesus ti agsubli, kinunana kadakuada: “Ania? Matmaturog ken agin-inanakayo pay laeng? Husto daytan! Dimtengen ti oras! Kitaenyo, mayawaten ti Anak ti Tao kadagiti managbasol.

⁴²Bumangonkayo ta intayon. Kitaenyo, adtoyen ti mangliput kaniak!”

⁴³Agsasao pay laeng ni Jesus idi sumangpet ni Judas, maysa kadagiti sangapulo ket dua nga adalan. Kimmuyog kenkuana dagiti adu a tattao a nagtagikampilan ken nagtagipang-or. Imbaon ida dagiti panguloen a papadi, dagiti mamaestro iti Linteg, ken dagiti panglakayen.

⁴⁴Sakbay ti ipapanda, inted ti mangliput daytoy a pagilasinan kadagiti kimmuyog kenkuana: “Daydiay agekak isu ti sapsapulenyo. Tiliwen ken ipanawyo ket guardiaanyo a naimbag.”

⁴⁵Immasideg a dagus ni Judas ken ni Jesus. “Maestro!” kinunana sana inagkan iti namin-adu.

⁴⁶Tiniliwda ni Jesus ket tinengngelda a nalaing.

⁴⁷Ngem inasut ti maysa kadagiti agtaktakder sadiay ti bunengna sana tinagbat ti adipen ti Kangatoan a Padi ket napingasan ti lapayagna.

⁴⁸Nagsao ni Jesus ket kinunana kadakuada, “Tulisanak aya, ta nagtagikampilan ken nagtagipang-orkayo nga umay mangtiliw kaniak?

⁴⁹Inaldaw a nakipulpulapolak kadakayo ken nangisursuroak idiay Templo ket didak tiniliw. Ngem masapul a matungpal ti Nasantoan a Surat.”

⁵⁰Nagtataray amin dagiti adalan ket binaybay-anda ni Jesus.

⁵¹Sumursurot ken ni Jesus ti maysa nga agtutubo a lalaki a nakakagay laeng iti linen a lupot. Tiniliwda,

⁵²ngem nakalapsut iti kagayna ket timmaray a lamolamo.

⁵³Impanda ni Jesus iti balay ti Kangatoan a Padi a naguurnongan dagiti panguloen a papadi, dagiti panglakayen ken dagiti mamaestro iti Linteg.

⁵⁴Simmurot ni Pedro nga adda a sumarsaruno iti adayo. Simrek iti paraangan ti balay ti Kangatoan a Padi ket sadiay, nakitugaw kadagiti guardia ken nakiinudo.

⁵⁵Nagbirbirok dagiti panguloen a papadi ken ti entero a Sanhedrin kadagiti pammaneknek a maibusor ken ni Jesus tapno papapatayda, ngem awan ti nasarakanda.

⁵⁶Adu ti nagsao iti ulbod a maikontra kenkuana ngem saan a nagtutunos dagiti pammaneknekda.

⁵⁷Timmakder ti sumagmamano a lallaki ket kastoy ti ulbod a pammaneknek nga imbagada:

⁵⁸“Nangngegmi nga insaona, ‘Rebbaekto daytoy a Templo a binangon dagiti tattao, ket iti uneg ti tallo nga aldaw mangbangonakto iti sabali a saan nga aramid ti tao.’”

⁵⁹Uray isuda kaskasdi a saan a nagtutunos dagiti pammaneknekda.

⁶⁰Timmakder ti Kangatoan a Padi iti sangoananda. “Awan aya ti maisungbatmo kadagiti ipabpabasol dagitoy a tattao?” sinaludsodna ken ni Jesus.

⁶¹Ngem nagulimek ni Jesus ket saan a simmungbat. “Sika kadi ti Cristo nga Anak ti Nasantoan a Dios?” sinaludsod manen ti Kangatoan a Padi.

⁶²“Wen, siak!” insungbat ni Jesus. “Makitayonto ti Anak ti Tao a situtugaw iti makannawan ti Mannakabalin-amin. Makitayonto nga umay kadagiti ulep ti langit.”

⁶³Rinay-ab ti Kangatoan a Padi ti kagayna. “Ania pay la ti pakasapulantayo kadagiti saksi?” kinunana.

⁶⁴“Nangngegyon dagiti saona a maikaniwas iti Dios. Ania ti pangngeddengyo?” Sangsangkamaysa ti pangngeddengda: nakabasol ni Jesus ket masapul a mapapatay.

⁶⁵Sumagmamano kadakuada ti nangtupratupra ken ni Jesus ket inabbonganda ti rupana sada dinanogdanog. “Pugtoam man no siasino ti nangdisnog kenka?” kinunada. Kalpasanna, innala dagiti guardia sada ginagara iti tungpa.

⁶⁶Adda pay la ni Pedro iti paraangan idi umasideg ti maysa a babai nga adipen ti Kangatoan a Padi.

⁶⁷Idi makitana ni Pedro nga agin-inudo, miningminganna sana kinuna, “Uray sika, nakikadkaduaka met ken ni Jesus a taga-Nazaret.”

⁶⁸“Diak ammo ken diak maawatan ti ibagbagam,” inlibak ni Pedro. Ket rimmuar a nagturong iti ruangan. Apag-isu met a nagtaraok ti maysa a kawitan.

⁶⁹Nakita manen sadiay ti babai nga adipen ket inulitna kadagiti adda sadiay, “Maysa kadakuada daytoy a lalaki!”

⁷⁰Ngem naglibak manen ni Pedro. Iti saan a mabayag, kinuna met kenkuana dagiti adda sadiay, “Saanmo a mailibak a maysaka kadakuada, ta taga-Galileaka met.”

⁷¹“Uray dusaennak ti Dios no saan a pudno ti ibagbagak!” insapata ni Pedro. “Diak am-ammo dayta tao nga ibagbagayo!”

⁷²Pagammoan, nagtaraok manen ti kawitan ket nalagip ni Pedro ti kinuna ni Jesus kenkuana: “Sakbay ti maikadua a panagtaraok ti kawitan, namitlonton nga imbagam a dinak am-ammo.” Ket naganug-og gapu iti ladingitna.