Read Iloko Mark 2 Bible Online

Mark 2 - Iloko bible

Mark 2

¹Nagsubli ni Jesus idiay Capernaum kalpasan ti sumagmamano nga aldaw. Nagdinamag a simmangpeten iti balayna,

²ket adu a tattao ti natipontipon sadiay. Awan payen ti pagpisipisan, uray pay iti asideg ti ridaw. Madama nga ikaskasaba ni Jesus ti Naimbag a Damag

³idi simmangpet ti uppat a lallaki a nagbaklay iti maysa a paralitiko nga ipanda kenkuana.

⁴Ngem gapu iti kaadu ti tao, dida mayasideg ken ni Jesus ti masakit. Winangwanganda ngarud ti atep iti ngatoen ni Jesus sada imbaba ti paralitiko a nakaidda iti papag.

⁵Idi makita ni Jesus ti pammatida, kinunana iti paralitiko, “Anakko, napakawanen dagiti basbasolmo.”

⁶Sadiay, adda nga agtugtugaw ti sumagmamano a mamaestro iti Linteg. Kinunada iti nakemda,

⁷“Apay a kasta ti sao daytoy a tao? Maibusor iti Dios ti sasawenna! Ni laeng Apo Dios ti makapakawan iti basol!”

⁸Ammo a dagus ni Jesus ti adda iti panunotda ket kinunana, “Apay a kasta ti pampanunotenyo?

⁹Ania ti nalaklaka nga isao iti daytoy a paralitiko: ‘Napakawanen dagiti basbasolmo’ wenno ‘Bumangonka, alaem ta iddam ket magnaka’?

¹⁰Paneknekak ngarud kadakayo a ti Anak ti Tao adda pannakabalinna ditoy daga a mamakawan kadagiti basbasol.”

¹¹Kinunana iti paralitiko, “Ibilinko kenka: bumangonka, bagkatem ta iddam ket agawidkan.”

¹²Iti imatangda amin, bimmangon ti lalaki, binagkatna ti iddana ket nagdardaras a nagawid. Nagsiddaawda amin, ket indaydayawda ti Dios. “Dikam pay nakaimatang iti kastoy a pasamak,” kinunada.

¹³Nagsubli manen ni Jesus iti igid ti Dan-aw ti Galilea. Napan kenkuana dagiti adu a tattao ket insurona ida.

¹⁴Idi magmagna, nakitana ti maysa nga agsingsingir iti buis, ni Levi nga anak ni Alfeo. Agtugtugaw ni Levi iti ofisinana a pagbayadan iti buis. “Surotennak,” kinuna ni Jesus. Timmakder ni Levi ket simmurot kenkuana.

¹⁵Idi mangmangan ni Jesus iti balay ni Levi, nakilanglang kenkuana ken kadagiti adalanna ti adu nga agsingsingir iti buis ken tattao a managbasol. Ngamin, adu dagiti simmurot kenkuana.

¹⁶Adda sumagmamano a mamaestro iti Linteg a kamkameng ti grupo dagiti Fariseo. Idi makitada a makipangpangan ni Jesus kadagiti managbasol ken agsingsingir iti buis, sinaludsodda kadagiti adalanna, “Apay a kalanglangna dagiti agsingsingir iti buis ken dagiti managbasol?”

¹⁷Nangngeg ida ni Jesus ket kinunana: “Saan a dagiti nasalun-at ti makasapul iti mangngagas, no di ket dagiti masaksakit. Diak immay tapno ayabak dagiti nalinteg a tattao. Immayak tapno ayabak dagiti managbasol.”

¹⁸Iti naminsan, agay-ayunar dagiti adalan ni Juan a Mammuniag ken dagiti Fariseo. Napan ti sumagmamano a tattao ken ni Jesus ket sinaludsodda, “Apay nga agayunar dagiti adalan ni Juan a Mammuniag ken dagiti adalan dagiti Fariseo, ngem dagiti adalam saan?”

¹⁹Simmungbat ni Jesus, “Mabalin aya a di mangan dagiti sangaili iti paboda? Manganda! Saanda nga agayunar no adda ti nobio iti sidongda.

²⁰Ngem dumtengto ti tiempo a maipanaw ti nobio kadakuada. Isunton ti panagayunarda.

²¹“Saan nga itakup ti baro a lupot iti daan a pagan-anay, ta no kumsen ti naitakup, dumakdakkel ti pigis.

²²Saan met nga ikabil ti baro nga arak iti daan a supot a lalat, ta bettaken ti arak ti supot ket agpadada a madadael. Ikarga ketdi ti baro nga arak iti baro a supot a lalat!”

²³Iti maysa nga Aldaw a Panaginana, magmagna ni Jesus ken dagiti adalanna iti kataltalonan a namulaan iti trigo. Bayat ti pannagnada, nagruros dagiti adalanna kadagiti dawa ti trigo.

²⁴Sinaludsod dagiti Fariseo ken ni Jesus, “Kitaem, apay nga ar-aramiden dagiti adalam ti maisalungasing iti Aldaw a Panaginana?”

²⁵Insungbat ni Jesus, “Diyo pay aya nabasa ti inaramid ni David ken dagiti tattaona idi mabisinda?

²⁶Simrek ni David iti balay ti Dios sa nangan iti tinapay a naidaton iti Dios. Napasamak daytoy idi ni Abiatar ti Kangatoan a Padi. Iti paglintegantayo, dagiti laeng papadi ti mapalubosan a mangan iti dayta a tinapay. Ngem nangan ni David ket inikkanna pay dagiti tattaona.

²⁷“Naaramid ti Aldaw a Panaginana nga agpaay iti pagimbagan ti tao. Saan a naaramid ti tao nga agpaay iti Aldaw a Panaginana.

²⁸Ngarud, ti Anak ti Tao isu ti Apo uray pay ti Aldaw a Panaginana.”