Read Iloko Mark 3 Bible Online

Mark 3 - Iloko bible

Mark 3

¹Iti naminsan nga ipapan manen ni Jesus iti sinagoga, adda lalaki sadiay a paralitiko ti maysa nga imana.

²Adda tattao a mangpalpaliiw ken ni Jesus no paimbagenna ti lalaki iti Aldaw ti Panaginana tapno adda pangpabasolanda kenkuana.

³“Umayka ditoy,” kinuna ni Jesus iti lalaki.

⁴Ket sinaludsodna kadagiti tattao: “Ania ti ipalubos ti Linteg nga aramidentayo iti Aldaw a Panaginana? Tumulong wenno mangranggas? Mangispal iti tao wenno mangpatay?” Ngem nagulimekda.

⁵Sipupungtot ni Jesus a kimmita kadakuada. Nupay kasta, inay-ayna ida gapu iti kinatangken ti uloda. “Unnatem ta imam,” kinunana iti lalaki. Inunnat ti lalaki ti imana ket immimbag.

⁶Rimmuar dagiti Fariseo iti sinagoga. Nakiumanda a dagus iti sumagmamano a kameng ti partido Herodiano. Nagtutulaganda no kasano ti panangpatayda ken ni Jesus.

⁷Nagpakni ni Jesus ken dagiti adalanna iti igid ti Dan-aw ti Galilea ket simmurot kenkuana ti adu a tao. Naggapuda idiay Galilea, Judea,

⁸Jerusalem, Idumea, agraman kadagiti disso iti ballasiw ti Jordan ken kadagiti luglugar nga asideg iti siudad ti Tiro ken Sidon. Napan amin dagitoy a tattao ken Jesus ta adu ngamin ti nadamagda nga ar-aramidenna.

⁹Gapu iti kaadu ti tao, binilin ni Jesus dagiti adalanna nga isaganaanda iti bangka tapno saan a madippit.

¹⁰Ta adu ti inagasanna ket agdidinnuron amin dagiti masakit nga umasideg a sumagid kenkuana.

¹¹Tunggal maimatangan dagiti tattao a linuganan dagiti dakes nga espiritu, agpaklebda iti sakaananna sada yikkis: “Sika ti Anak ti Dios!”

¹²Ngem nainget ti bilin ni Jesus kadagiti dakes nga espiritu nga awan pangibagbagaanda iti kinasiasinona.

¹³Simmang-at ni Jesus iti maysa a turod ket inayabanna dagiti kinayatna. Napanda kenkuana ket

¹⁴pimmili iti sangapulo ket dua a dinutokanna nga apostoles. “Pinilikayo a makikadkadua kaniak,” imbagana kadakuada. “Ibaonkayonto pay a mapan mangaskasaba

¹⁵ket maikkankayto iti pannakabalin a mangpaksiat kadagiti demonio.”

¹⁶Dagitoy dagiti 12 a pinilina: ni Simon (a pinanagananna iti Pedro);

¹⁷da Santiago ken Juan nga annak ni Zebedeo (pinanagananna dagiti agkabsat iti Boanerges, kayatna a sawen, “Annak ti Gurruod”);

¹⁸Andres, Felipe, Bartolome, Mateo, Tomas; ni Santiago nga anak ni Alfeo; Tadeo, Simon a Patriota

¹⁹ken ni Judas Iscariote a nangliput ken Jesus.

²⁰Nagawid ni Jesus. Adu manen a tattao ti naguummong ket saanen a masango ni Jesus ken dagiti adalanna ti mangan.

²¹Apaman a nadamag daytoy dagiti kabagianna, napanda iti ayan ni Jesus tapno ipanawda. “Agmauyongen,” kunkuna ngamin dagiti tattao.

²²“Linuganan ni Beelzebub!” kinuna ti sumagmamano a maestro iti Linteg a naggapu idiay Jerusalem. “Ti pangulo dagiti demonio ti mangmangted kenkuana iti bileg a mangpaksiat kadagiti dakes nga espiritu.”

²³Isut' gapuna nga inayaban ni Jesus dagiti tattao ket sinaritana kadakuada ti sumagmamano a pangngarig: “Mabalin aya a paksiaten ni Satanas ti bagina met laeng?

²⁴No agbibinnusor dagiti tattao iti maysa a pagarian, marpuog dayta a pagarian.

²⁵No agririri dagiti kameng ti maysa a familia, marakrak dayta a familia.

²⁶Ngarud, no mabingbingay ti pagarian ni Satanas, ket agdidinnadael dagiti taona, di agpaut ket dumtengen ti kanibusananna.

²⁷“Awan makastrek iti balay ti napigsa a tao tapno italawna dagiti sanikuana. Reppetenna pay nga umuna ti napigsa a tao santo agsamsam iti uneg ti balay.

²⁸“Laglagipenyo a mapakawan amin a basol dagiti tattao ken amin nga isasaoda a maibusor iti Dios.

²⁹Ngem pulos a dinto mapakawan ti siasinoman nga agsao iti maibusor iti Espiritu Santo, ta nakaaramid iti agnanayon a basol.”

³⁰Insao ni Jesus dagitoy ta adda sumagmamano a nagkuna, “Linuganan ti dakes nga espiritu.”

³¹Simmangpet ti ina ken dagiti lallaki a kakabsat ni Jesus. Nagtatakderda iti ruar ket nangibaonda iti mangayab kenkuana.

³²Adu a tattao ti nakatugaw idi iti likmutna. “Adda ni nanangmo ken dagiti kakabsatmo a lallaki idiay ruar,” kinunada. “Masapuldaka.”

³³“Siasino kadi ti inak?” insungbat ni Jesus. “Siasino kadi dagiti kakabsatko?”

³⁴Kinitana dagiti nanglawlaw kenkuana ket kinunana, “Kitaenyo! Adtoy ti inak ken dagiti kakabsatko!

³⁵Ta dagiti agaramid iti pagayatan ti Dios, isuda dagiti kakabsatko ken ti inak.”