Read Iloko Mark 4 Bible Online

Mark 4 - Iloko bible

Mark 4

¹Nangisuro manen ni Jesus iti igid ti Dan-aw ti Galilea. Gapu ta adu unay dagiti tattao nga immaribungbong kenkuana, napan nagtugaw iti maysa a bangka a sitatapog iti danum. Nagyan dagiti tattao iti takdang iti igid ti dan-aw.

²Pangngarig ti inaramat ni Jesus a nangisuro kadakuada kadagiti adu a bambanag. Kinunana kadakuada,

³“Dumngegkayo! Adda maysa a tao a napan nagpurruak kadagiti bukel.

⁴Idi agipurpurruak, nagdisso ti sumagmamano a bukel iti igid ti dalan, ket tinuktok dagiti tumatayab.

⁵Adda met sumagmamano a bukel a nagdisso iti kabatoan a bassit laeng ti dagana. Gapu ta narabaw ti dagana, nabiit a nagtubo dagiti bukel.

⁶Idi makatangkayagen ti init, nalaylay dagiti apagtubo a mula ket nagangoda a dagus agsipud ta dida unay nakapagramut.

⁷Nagdisso ti sumagmamano a bukel iti nagtuboan dagiti siitan a mula a dimmakkel ken nangleppes kadakuada. Iti kasta, saan a nakapagdawa dagiti mula.

⁸Ngem adda dagiti bukel a nagdisso iti nadam-eg a daga, ket nagtubo, dimmakkel ken nagdawada. Adda nagdawa iti 30, adda met 60 ken adda pay 100.”

⁹Ket inggibus ni Jesus, “Dumngeg ngarud ti siasinoman nga addaan pannakaawat.”

¹⁰Idi agmaymaysa ni Jesus, napan kenkuana ti sumagmamano kadagiti nagdengngeg agraman dagiti sangapulo ket dua nga adalan. Kiniddawda nga ilawlawagna dagiti pangngarig.

¹¹Kinuna ni Jesus, “Naipakaammo kadakayo ti palimed maipapan iti Pagarian ti Dios, ngem kadagiti sabsabali, maisuro amin a banag babaen kadagiti pangngarig.

¹²Iti kasta, ‘Uray no kitkitaenda, dida mailasin, Uray no dengdenggenda, dida maawatan. No mailasin ken maawatanda Amangan no agsublida iti Dios ket pakawanennanto ida.’”

¹³“Diyo aya maawatan daytoy a pangngarig?” sinaludsod ni Jesus kadakuada. “No diyo maawatan, kasano ngarud a maawatanyo ti uray ania a pangngarig?”

¹⁴Ket inlawlawagna ti pangngarig: “Ti agmulmula iwaragawagna ti sao ti Dios.

¹⁵Dagiti bukel nga agdisso iti dalan mayarigda kadagiti tattao a makangngeg iti sao ti Dios; apaman a mangngegda, umay ni Satanas ket ikkatenna ti mensahe kadakuada.

¹⁶“Dagiti dadduma a tattao mayarigda kadagiti bukel a nagdisso iti kabatoan. Apaman a mangngegda ti sao, awatenda a siraragsak.

¹⁷Ngem saan a makapagramut ti sao kadakuada, ket saanda nga agbayag. Isut' gapuna a maupayda a dagus no dumteng dagiti rigrigat ken pannakaidadanes gapu iti sao.

¹⁸Ket dagiti dadduma a tattao mayarigda kadagiti bukel a nagdisso iti nagtuboan dagiti siitan a mulmula. Isuda dagitoy ti makangngeg iti sao,

¹⁹ngem umay dagiti pakaringgoran iti daytoy a biag, ti panagagum iti kinabaknang ken ti nalabes a panagtarigagay kadagiti dadduma pay a bambanag, ket leppesenda ti sao. Iti kasta, dida makapagbunga.

²⁰Ngem dagiti dadduma a tattao, mayarigda kadagiti bukel a nagdisso iti nadam-eg a daga. Ipapusoda a denggen ti sao, ket agbungada: adda agbunga iti tallopulo, adda met innem a pulo ken adda pay sangagasut.”

²¹Intuloy ni Jesus, “Gangtan aya ti pagsilawan tapno kaluban iti salup wenno ipasirok iti katre? Saan aya nga ikabil ketdi iti nairanta a pagyananna?

²²Awan ti nailemmeng a dinto mailatak. Awan met ti palimed a di maammoan.

²³Dumngeg ngarud ti siasinoman nga addaan pannakaawat.”

²⁴Kinunana pay kadakuada: “Panunotenyo a nalaing ti mangngegyo! No kasano ti panangrukodyo kadagiti sabsabali, kastanto met ti panangrukod ti Dios kadakayo; ket naing-ingetto pay!

²⁵Ta ti addaan, maikkanto iti ad-adu. Ngem ti awanan, uray ti bassit nga adda kenkuana, maikkatto pay!”

²⁶Intuloy ni Jesus ti nagsao, “Kastoy ti kayarigan ti Pagarian ti Dios. Adda tao nga agpurruak kadagiti bukel iti talonna.

²⁷Maturog iti rabii ket agtrabaho iti aldaw. Kabayatanna, agtubo dagiti bukel ket dumakkelda. Ngem di ammo ti nagmula no kasano ti irurusing ken idadakkelda.

²⁸Ti daga met laeng ti mangpadakkel ken mangpabunga kadagiti mula: agparang nga umuna ti bulong, sumaruno ti dawa, ket kamaudiananna, mamsek ti dawa.

²⁹No matangkenanen dagiti dawa, rugianen ti aggapas, ta dimtengen ti panagapit.”

³⁰Nagsaludsod ni Jesus: “Ania ti pangyarigantayo iti Pagarian ti Dios? Ania a pangngarig ti pangilawlawagtayo iti daytoy?

³¹Mayarig iti bukel ti mostasa a kabassitan a bukel ditoy lubong.

³²Bassit-usit a bukel ngem no maimula, dumakkel ket agbalin a kadakkelan kadagiti amin a mulmula. Agsanga iti dadakkel a mabalin a pagumokan dagiti tumatayab.”

³³Babaen kadagiti kakastoy a pangngarig, inkaskasaba ni Jesus ti mensahena kadagiti tattao, kas iti kabaelanda nga umawat.

³⁴Saan nga agsao idi kadakuada no dina aramaten dagiti pangngarig. Ngem no is-isuda laeng kadagiti adalanna, ilawlawagna amin kadakuada.

³⁵Idi sumipngeten iti dayta met la nga aldaw, kinuna ni Jesus kadagiti adalanna, “Bumallasiwtayo.”

³⁶Pinanawanda ngarud dagiti tattao sada limmugan iti bangka nga ayan ni Jesus ket bimmallasiwda. Adda pay sabsabali a bilog a nakikuyog kenkuana.

³⁷Pagammoan, nagangin iti nakapigpigsa. Timmaud dagiti dadakkel a dalluyon a nangsabbuasabbuag iti bangka. Iti kasta, ngannganin mapno ti bangka iti danum.

³⁸Adda ni Jesus iti kutit ti bangka. Magmaturog a nakapungan. Riniing dagiti adalanna. “Maestro,” kinunada, “awan aya ti aniamanna kenka no lumnedtayo?”

³⁹Bimmangon ni Jesus, ket binilinna ti angin, “Agsardengka!” sana kinuna iti dalluyon, “Agtalnaka!” Nagsardeng ti angin, ket nagtalna ti dalluyon.

⁴⁰Kinuna ni Jesus kadagiti adalan, “Apay nga agbutengkayo? Awan pay kadi ti pammatiyo?”

⁴¹Ngem kasta unay ti butengda, ket kinunada iti maysa ken maysa, “Ania ti katataona daytoy? Uray ti angin ken ti dalluyon agtungpalda kenkuana!”