Read Iloko Mark 5 Bible Online

Mark 5 - Iloko bible

Mark 5

¹Nakadanon ni Jesus ken dagiti adalanna iti ballasiw ti Dan-aw ti Galilea ket simmangladda iti daga dagiti Geraseno.

²Apaman a nakadissaag ni Jesus iti bangka, sinabat ti maysa a lalaki a naggapu kadagiti rukib a pagitantaneman sadiay. Linuganan ti dakes nga espiritu daytoy a lalaki

³ket agnanaed kadagiti tantanem. Awan ti makakawar kenkuana.

⁴Namin-adu a rineppetda ti imana ken imbaudda ti sakana, ngem pinugsapugsatna dagiti kawar ket linettatna dagiti posas. Nagpaiduma ti pigsana ket awan ti makaparukma kenkuana.

⁵Aldaw ken rabii nga agpagnapagna kadagiti tantanem ken turturod. Patinayon nga agik-ikkis. Dundunorenna ti bagina iti bato.

⁶Adayo pay laeng ni Jesus idi makita daytoy a lalaki. Nagtaray ket nagparintumeng iti sangoananna sana inyikkis,

⁷“Jesus, Anak ti Dios a Kangatoan. Apay a singaennak? Iti nagan ti Dios, dinak kadi parigaten.” (

⁸Sinaona daytoy gapu ta kinuna ni Jesus kenkuana, “Dakes nga espiritu, rummuarka iti daytoy a tao!”)

⁹“Ania ti naganmo?” sinaludsod ni Jesus. “‘Armada,’ ta adukami,” kinuna ti lalaki.

¹⁰Namin-adu nga impakpakaasina ken ni Jesus a dina koma papanawen dagiti dakes nga espiritu iti dayta a lugar.

¹¹Iti asideg sadiay, adda dakkel nga arban ti baboy nga mangmangan iti bakras ti turod.

¹²Nagpakpakaasi dagiti espiritu, “Ibaonnakami a sumrek kadagiti baboy.”

¹³Pinalubosan ni Jesus ida. Rimmuar dagiti dakes nga espiritu iti lalaki ket simrekda kadagiti baboy. Nagdadarison ti arban—agduaribuda amin a baboy—iti teppang sada timpuak iti dan-aw, ket nalmesda amin.

¹⁴Nagtataray dagiti agtartaraken kadagiti baboy a napan iti ili ken kadagiti barbarrio ket impadamagda ti napasamak. Rimmuar dagiti tattao tapno mapanda kitaen ti naaramid.

¹⁵Idi makaasidegda ken ni Jesus, nakitada ti lalaki a linuganan dagiti demonio. Agtugtugaw, nakakawes ken nagpulangen ti nasayaat a panunotna. Nagbutengda amin.

¹⁶Dagiti nakakita iti daytoy impadamagda kadagiti tattao ti napasamak iti naluganan a lalaki ken kadagidi baboy.

¹⁷Iti kasta, dinawat dagiti tattao a pumanaw ni Jesus iti lugarda.

¹⁸Idi lumugan ni Jesus iti bangka, nagpakpakaasi ti tao naluganan a makikuyog kenkuana.

¹⁹Ngem linapdan ni Jesus. Kinunana, “Agawidka iti familiam ket ipadamagmo kadakuada ti naindaklan nga inaramid ti Apo kenka gapu iti kaasina.”

²⁰Pimmanaw ti lalaki, ket impakaammona iti sakup ti Decapolis ti inaramid ni Jesus kenkuana. Nagsidsiddaaw amin a nakangngeg iti impadamagna.

²¹Bimmallasiw manen ni Jesus a napan idiay bangir ti dan-aw. Idi addan iti igid, inaribungbongan ti nakaad-adu a tao.

²²Dimteng ni Jairo, maysa nga ofisial iti sinagoga iti dayta a lugar. Idi makitana ni Jesus, nagparintumeng ket nagpakpakaasi kenkuana,

²³“Ngannganin matay ti balasitang nga anakko. Pangngaasim ta umaymo ipatay ta imam kenkuana tapno umimbag ket agbiag pay!”

²⁴Kimmuyog ni Jesus kenkuana. Nakikuyog met ti nakaad-adu a tattao nga agdidinnuron iti likmutna.

²⁵Adda sadiay idi ti maysa a babai a sangapulo ket dua a tawenen nga agsagsagaba iti panagbulos ti dara.

²⁶Nupay adun ti nangag-agas kenkuana, ket nagastonan ti amin a kuartana a pinagpapaagas, saan nga immimbag, no di ket kimmaro ti sakitna.

²⁷Nadamagna ti maipapan ken ni Jesus. Nakilinnetlet ngarud kadagiti tattao agingga a nakaasideg iti likudan ni Jesus.

²⁸Kinunana iti bagina, “No masagidko la koma uray ti kawesna laeng, umimbagakton!”

²⁹Sinagidna ti kagay ni Jesus. Dagus a simmardeng ti panagbulos ti darana ket nariknana nga immimbagen.

³⁰Iti dayta a kanito, nadlaw ni Jesus nga adda pannakabalin a nauyos kenkuana ket sinangona dagiti adda iti likudanna. Sinaludsodna, “Siasino ti nangsagid iti kawesko?”

³¹Kinuna dagiti adalanna, “Makitam dagiti adu a tao nga agdidinnuron iti likmutmo, ket saludsodem pay laeng no siasino ti nangsagid kenka?”

³²Ngem inwaras ni Jesus ti panagkitana tapno bigbigenna no siasino ti nangsagid kenkuana.

³³Nadlaw ti babai ti napasamak kenkuana, isu nga agtigtigerger iti buteng nga immasideg ken Jesus sa nagparintumeng iti sangoananna. Impudnona ti amin a naaramid.

³⁴“Anakko,” kinuna ni Jesus iti babai, “pinaimbagnaka ti pammatim. Inkan a sitatalna ket saanton nga agsubli ti sakitmo!”

³⁵Madama pay la nga agsasao ni Jesus idi dumteng dagiti naggapu iti balay ni Jairo. “Natayen ti anakmo,” impadamagda ken ni Jairo. “Apay a ringgorem pay laeng ti Maestro?”

³⁶Saan nga inkaskaso ni Jesus ti imbagada ken ni Jairo. Kinunana ketdi kenkuana, “Dika agdanag. Papigsaem ketdi ti pammatim.”

³⁷Saanen nga impalubos ni Jesus a makikuyog dagiti tattao kenkuana, malaksid ni Pedro ken dagiti agkabsat a Santiago ken Juan.

³⁸Idi sumangpetda idiay balay ni Jairo, nakita ni Jesus ti kumaribuso a tattao. Agsangsangit ken agdungdung-awda iti napigsa.

³⁹Simrek ni Jesus ket kinunana kadakuada, “Apay nga umariwawakayo? Apay nga agdungdung-awkayo? Saan a natay ti balasitang; matmaturog laeng!”

⁴⁰Kinatkatawaan dagiti tattao. Pinaruarna amin ida sana inayaban dagiti nagannak ken dagiti adalanna, ket simrekda iti siled a yan ti balasitang.

⁴¹Iniggaman ni Jesus ti ima ti balasitang sana kinuna: “Talita, kum!” (Kayatna a sawen, “Balasitang, bumangonka!”)

⁴²Dagus a bimmangon ti balasitang ket nagpagnapagna. (Sangapulo ket dua ti tawenna.) Kasta unay ti siddaawda iti napasamak.

⁴³Ngem impaganetget ni Jesus nga awan pangibagbagaanda iti daytoy. “Pakanenyo ti balasitang,” kinunana.