Read Iloko Mark 6 Bible Online

Mark 6 - Iloko bible

Mark 6

¹Pimmanaw ni Jesus iti dayta a lugar ket nagsubli iti ilina. Simmurot kenkuana dagiti adalanna.

²Iti Aldaw a Panaginana, napan nangisuro iti sinagoga. Adu dagiti tattao sadiay. Nasdaawda amin a nakangngeg kenkuana. Sinaludsodda, “Sadino ti nangalaan daytoy a tao kadagitoy? Kasano ti pannakagun-odna iti kasta a kinasirib? Kasano a makaaramid iti milagro?

³Saan aya nga isu ti karpintero nga anak ni Maria, ken kabsat da Santiago, Jose, Judas ken Simon? Saan aya nga agnanaed ditoy dagiti kakabsatna a babbai?” Dagitoy ti kinunkuna dagiti nagdengngeg kenkuana gapu iti siddaawda. Iti kasta, inumsida ni Jesus.

⁴Ket insungbat ni Jesus kadakuada: “Mapadayawan ti profeta iti sadinoman a lugar, malaksid iti ilina, kadagiti kabagian ken familiana.”

⁵Awan a pulos ti naaramidna a milagro sadiay, malaksid ti panangpaimbagna iti sumagmamano a masakit babaen iti panangipatayna iti imana kadakuada.

⁶Masdaaw unay gapu ta awan pammati dagiti tattao. Napan ni Jesus a nangisursuro kadagiti aglikmut a barbarrio.

⁷Inayabanna dagiti sangapulo ket dua nga adalanna, ket imbaonna ida a sagdudua. Inikkanna ida iti pannakabalin a mangpaksiat kadagiti dakes nga espiritu.

⁸Binilinna ida, “Dikay mangitugtugot iti uray ania: tinapay man wenno bay-on wenno kuarta kadagiti bulsayo. Sarukod laeng ti itugotyo.

⁹Agsapatoskayo, ket umanayen ti maysa a kagayyo.”

¹⁰Innayonna pay, “Iti sadinoman a lugar nga adda mangawat kadakayo, agyankayo iti dayta a balay agingga iti ipapanawyo iti dayta nga ili.

¹¹No dumtengkayo iti lugar nga awan umawat ken dumngeg kadakayo, pumanawkayo, ket pampagenyo ti tapok kadagiti saksakayo a kas ballaag kadakuada.”

¹²Napan ngarud dagiti adalanna ket inkaskasabada kadagiti tattao a masapul nga agbabawida kadagiti basbasolda.

¹³Pinaksiatda ti adu a demonio. Sinapsapoanda iti lana dagiti adu a masaksakit ket naimbaganda amin.

¹⁴Naammoan amin dagitoy ni Ari Herodes gapu ta nagdinamagen ti nagan ni Jesus iti amin a lugar. Kinuna ti sumagmamano a tattao, “Nagungar ni Juan a Mammuniag! Isut' gapuna nga adda kenkuana daytoy a pannakabalin nga agaramid iti milagro.”

¹⁵Kinuna met dagiti dadduma, “Isu ni Elias!” Adda pay nagkuna, “Maysa daytoy a profeta, kas kadagiti profeta idi un-unana.”

¹⁶Idi mangngeg daytoy ni Herodes, kinunana, “Isu dayta ni Juan a pinaputolak ngem napagungar!”

¹⁷Mismo a ni Herodes ti nangpatiliw ken nangpaibalud ken ni Juan. Inaramidna daytoy gapu ken ni Herodias nga inkabbalayna, nupay asawa ni Felipe a kabsatna.

¹⁸Kinunkuna ngamin idi ni Juan a Mammuniag ken ni Herodes: “Saan a rumbeng nga ikabbalaymo ti asawa ni kabsatmo!”

¹⁹Isut' gapuna a napalalo ti gura ni Herodias ken ni Juan, ket kinayatna a mapapatay, ngem dina naallukoy ni Herodes nga umanamong iti daytoy a gandat.

²⁰Bigbigen ngamin idi ni Herodes ti kinaimbag ken kinasanto ni Juan. Dina intulok a madangran. Magusgustoanna a dengdenggen ni Juan, nupay mariribuk tunggal mangngegna.

²¹Ngem dimteng ti gundaway ni Herodias. Agkasangay idi ni Herodes ket nagpadaya para kadagiti nangato nga agtuturay iti gobierno, dagiti ofisiales ti militar ken dagiti nalalatak nga umili ti Galilea.

²²Simrek ti balasang nga anak ni Herodias ket nagsala. Naay-ayo ni Herodes ken dagiti sangailina. Isut' gapuna a kinuna ti ari iti balasang, “Dawatem ti aniaman a kayatmo, ket itedko kenka!”

²³Insapatana pay, “Itedko ti aniaman a dawatem, uray pay ti kagudua ti pagariak!”

²⁴Rimmuar ti balasang ket dinamagna ken ni inana, “Ania ti dawatek?” “Dawatem ti ulo ni Juan a Mammuniag!” insungbat ni Herodias.

²⁵Nagsubli a dagus ti balasang iti yan ti ari ket dinawatna, “Kayatko nga itedmo kaniak ditoy ken ita met laeng ti ulo ni Juan a Mammuniag a maikabil iti bandehado!”

²⁶Kasta unay ti liday ti ari. Ngem dina mabalin a paayen ti balasang gapu iti inkarina iti imatang dagiti amin a sangailina.

²⁷Iti kasta, binilinna a dagus ti maysa a guardia nga yegna ti ulo ni Juan. Napan ti guardia idiay pagbaludan ket pinutolanna ni Juan.

²⁸Inyegna ti ulo a naikabil iti bandehado. Inyawat met ti balasang ken ni inana.

²⁹Idi nadamag dagiti adalan ni Juan ti napasamak, napanda innala ti bangkayna ket intanemda.

³⁰Nagsubli dagiti apostoles iti ayan ni Jesus ket impadamagda kenkuana dagiti amin nga inaramid ken insuroda.

³¹Masublasublat nga umay ken pumanaw dagiti adu a tattao iti ayanda ket dida pay masangon ti mangan. Iti kasta, kinuna ni Jesus kadagiti adalanna, “Intayo iti maysa a disso tapno makainanatayo.”

³²Ket nagbangkada a napan iti disso nga awan matagtagitao.

³³Ngem adu ti nakakita iti ipapanawda ken nakailasin kadakuada. Iti kasta, manipud kadagiti amin nga ili, nagtatarayda a napan iti nasao a lugar. Immun-unada ngem ni Jesus ken dagiti adalanna a dimteng.

³⁴Apaman a dimsaag ni Jesus iti bilog, nakitana dagitoy a tattao ket naasian kadakuada, ta kasda la karnero nga awan mangaywan kadakuada. Iti kasta, insurona ida kadagiti adu a bambanag.

³⁵Idi mumalemen, napan dagiti adalan ken ni Jesus ket kinunada, “Mumalemen, ket awan matagtagitao ditoy.

³⁶Pagawidemon dagiti tattao tapno makagatangda iti kanenda kadagiti kabangibang a barbarrio ken il-ili.”

³⁷“Ikkanyo ketdi ida iti kanenda,” kinuna ni Jesus. “Kayatmo a sawen nga inkam gumatang iti tinapay nga agpateg iti dua gasut a denario ket itedmi a kanenda?” kinuna dagiti adalanna.

³⁸“Adda mano a tinapayyo?” sinaludsod ni Jesus. “Inkayo kitaen.” Napan kinita dagiti adalan ket impakaammoda, “Adda lima a tinapay ken dua nga ikan.”

³⁹Binilin ni Jesus dagiti adalanna a pagtugawenda a magrupo-grupo dagiti tattao iti nalangto a karuotan.

⁴⁰Iti kasta, nagrupo-grupo a nagtugaw dagiti tattao: adda sagsasangagasut, adda met saglilimapulo.

⁴¹Innala ni Jesus dagiti lima a tinapay ken dua nga ikan. Timmangad sadi langit sa nagyaman iti Dios. Pinispisina dagiti tinapay ket intedna kadagiti adalanna tapno ibunongda kadagiti tattao. Biningbingayna met dagiti dua nga ikan tapno maibunong kadakuada amin.

⁴²Nanganda amin ket nabsogda.

⁴³Napno ti sangapulo ket dua a basket ti natda kadagiti tinapay ken ikan nga inurnong dagiti adalan.

⁴⁴Kadagiti nangan, 5,000 dagiti nataengan a lallaki.

⁴⁵Bayat ti panangpagawid ni Jesus kadagiti tattao, pinaluganna a dagus dagiti adalanna iti bangka. Pinaunana ida a mapan idiay Betsaida, iti ballasiw ti dan-aw.

⁴⁶Apaman a napalubosanna dagiti tattao, simmang-at iti maysa a turod tapno agkararag.

⁴⁷Idi rumabiin, addan ti bangka iti tengnga ti dan-aw, ngem maymaysa ni Jesus iti sang-at.

⁴⁸Nakitana a marigatan dagiti adalanna nga aggagaud, ta subsubaen ida ti angin. Iti agarup nagbaetan iti alas tres ken alas seis iti parbangon, nagna ni Jesus iti danum a napan kadakuada. Labsanna koma ida

⁴⁹ngem nakitada a magmagna iti rabaw ti danum. “Al-alia!” kinunada ket nagiikkisda.

⁵⁰Nagbutengda a nakakita kenkuana. Ngem dagus a kinuna ni Jesus, “Dikay agbuteng! Siak ni Jesus. Dikay agdanag!”

⁵¹Nakilugan ni Jesus kadakuada, ket nagtalnan ti angin. Kasta unay ti siddaaw dagiti adalanna.

⁵²Dida naawatan ti pudno a kaipapanan ti panangpaadu ni Jesus kadagiti tinapay. Dida matukod a panunoten.

⁵³Bimmallasiw ni Jesus ken dagiti adalanna iti dan-aw ket simmangladda idiay Genesaret a nangipundoanda iti bilog.

⁵⁴Apaman a nakadissaagda, dagus a nailasin dagiti tattao ni Jesus.

⁵⁵Iti kasta, nagtataray dagiti tattao a napan kadagiti kabangibang a luglugar ket impanda kenkuana dagiti masakit a siiidda iti papag.

⁵⁶Iti sadinoman a napanan ni Jesus, purok man wenno barrio wenno plasa, impan dagiti tattao dagiti masakitda kenkuana. Nagpakpakaasida kenkuana nga uray sagiden la koma dagiti masakit ti gayadan ti kagayna. Ket naimbagan dagiti amin a nangsagid iti kagayna.