Read Iloko Mark 7 Bible Online

Mark 7 - Iloko bible

Mark 7

¹Naguurnong iti ayan ni Jesus dagiti Fariseo ken sumagmamano a mamaestro iti Linteg a naggapu idiay Jerusalem.

²Nadlawda a mangmangan ti sumagmamano nga adalan ni Jesus a dida nagbuggo, kas naipakadawyan dagiti amin a Judio. (

³Ta annuroten dagiti Fariseo, agraman dagiti dadduma a Judio dagiti pannursuro nga impatawid dagiti ammada. Dida mangan no dida buggoan dagiti imada iti umisu a panagbuggo.

⁴Dida mangan iti aniaman nga aggapu iti tiendaan no saan a mabuggoan nga umuna. Adu pay ti annurotenda a pannursuro dagiti ammada, kas iti tumutop a panangugas kadagiti tasa, banga, lunglongan a gambang ken papag.)

⁵Iti kasta, sinaludsod dagiti Fariseo ken mamaestro iti Linteg ken ni Jesus, “Apay a di tungpalen dagiti adalam ti pannursuro nga impatawid dagiti amma, ta dida agbuggo a mangan?”

⁶Insungbat ni Jesus, “Pudno unay ti impadto ni Isaias maipapan kadakayo! Aginsisingpetkayo kas insuratna, ‘Dagitoy a tattao,’ kuna ti Dios, ‘kunkunada a dayawendak babaen kadagiti bibigda. Ngem adayo kaniak ti pusoda.

⁷Awan serbi ti panagdaydayawda kaniak, gapu ta isursuroda dagiti annuroten nga inaramid ti tao a kasla ketdin bukodko a linteg.’

⁸“Binaybay-anyon ti bilin ti Dios ket dagiti pannursuro ti tao ti tungtungpalenyo.”

⁹Ket intuloyna, “Nagsayaat ketdin ti panangilaksidyo iti bilin ti Dios tapno mataginayon dagiti pannursuro a tinawidyo.

¹⁰Ta imbilin ni Moises, ‘Dayawem da amam ken inam,’ ken ‘Ti agsao iti dakes ken ni ama wenno inana rebbengna a mapapatay.’

¹¹Ngem isursuroyo met a no adda mabalin nga ipaay ti maysa a tao kadagiti nagannak kenkuana ket kunana, ‘Korban daytoy’ (kayatna a sawen, ‘Naikarin iti Dios’),

¹²saanen a masapul a tulonganna ida.

¹³Iti kastoy, binaybay-anyon ti sao ti Dios gapu iti pannursuro nga ipatawidyo kadagiti tattao. Adu pay dagiti kastoy a bambanag nga ar-aramidenyo.”

¹⁴Pinaasideg manen ni Jesus dagiti tattao ket kinunana kadakuada: “Dumngegkayo amin kaniak ket amirisenyo a nalaing daytoy.

¹⁵Saan a ti ipauneg ti tao ti mangtulaw kenkuana, no di ket dagiti agtaud iti pusona.”

¹⁷Idi pinanawan ni Jesus dagiti tattao ket simrek iti balay, sinaludsod dagiti adalanna ti kaipapanan daytoy a pagsasao.

¹⁸Kinuna ni Jesus kadakuada, “Uray dakayo, diyo met aya maawatan? Saan a ti makan ti mangtulaw iti tao,

¹⁹ta saan a mapan iti pusona no di ket iti tianna ket kalpasanna rummuar.” (Iti panagkuna ni Jesus iti kastoy, impakaammona a mabalin a kanen ti amin a taraon.)

²⁰Insarunona pay, “Dagiti agtaud iti tao ti mangtulaw kenkuana.

²¹Ta manipud iti uneg ti puso ti tao, rumusing dagiti dakes a panunot a pagtaudan dagiti maikaniwas a bambanag a kas iti pannakiabig, panagtakaw, pammapatay,

²²pannakikamalala, panagagum ken dadduma pay a kita ti kinadakes; panangallilaw, kinaderrep, kinaapal, pammadpadakes, kinapalangguad ken kinamaag.

²³“Agtaud iti puso ti tao amin dagitoy dakes a bambanag, ket isuda ti mangtulaw kenkuana.”

²⁴Pimmanaw ni Jesus sadiay ket napan iti lugar nga asideg iti siudad ti Tiro. Nakidagus iti maysa a balay. Dina koma kayat nga adda makaammo iti ayanna, ngem naammoan latta dagiti tattao.

²⁵Adda idi maysa nga ina. Linuganan ti dakes nga espiritu ti anakna a babai. Nadamagna ti maipapan ken ni Jesus ket dinagdagusna ti napan kenkuana sa nagparintumeng iti sakaananna.

²⁶Griego daytoy a babai a nayanak idiay Fenicia, maysa nga ili iti Siria. Nagpakpakaasi a paksiaten koma ni Jesus ti demonio a nanglugan iti anakna.

²⁷Kinuna ni Jesus, “Masapul a pakanen nga umuna dagiti ubbing ta saan a rumbeng nga alaen ti kanenda sa ipurruak kadagiti aso.”

²⁸“Agpayso ta kunam, Apo,” kinuna ti babai, “ngem dagiti aso nga adda iti sirok ti lamisaan kanenda met dagiti regreg dagiti ubbing.”

²⁹Kinuna ni Jesus, “Gapu iti daytoy a panagsaom, mabalinmon ti agawid. Pimmanawen ti dakes nga espiritu iti anakmo!”

³⁰Nagawid ngarud ti babai ket nasangpetanna ti anakna nga agid-idda a sitatalna, ta pudno a pimmanawen ti demonio kenkuana.

³¹Pimmanaw ni Jesus iti beddeng ti Tiro. Nagna idiay Sidon ket nanglikaw iti sakup ti Decapolis agingga a dimteng iti Dan-aw ti Galilea.

³²Inyeg dagiti tattao ken ni Jesus ti maysa a lalaki a tuleng ken umel ket nagpakpakaasida kenkuana nga ipatayna ti imana iti lalaki.

³³Inyadayo ni Jesus ti lalaki kadagiti tattao. Idi agwaywayasdan insullatna dagiti tammudona kadagiti lapayag ti lalaki. Kalpasanna, timmupra sana sinagid ti dila ti lalaki.

³⁴Tinangad ni Jesus ti langit, nagsennaay sana kinuna iti lalaki, “Efata,” (kayatna a sawen, “Maluktanka”).

³⁵Dagus a nakangngeg ti lalaki, limmukay ti dilana ket saanen a marigatan nga agsao.

³⁶Imbilin ni Jesus kadagiti tattao a dida ipadpadamag daytoy iti siasinoman; ngem no kasano ti panangigunamgunamna a dida isarsarita, ad-adda pay ti gagarda a nangipadpadamag.

³⁷Napalalo ti siddaaw dagiti amin a nakangngeg iti daytoy a damag. Kinunkunada, “Nagsayaat ketdin ti amin nga aramidna! Agasanna dagiti tuleng ken dagiti umel ket makangngeg ken makasaoda manen.”