Read Iloko Luke 1 Bible Online

Luke 1 - Iloko bible

Luke 1

¹Patgek a Teofilo, Adun ti nagsurat maipapan kadagiti napaspasamak kadatayo,

²kas nadamagtayo kadagidi nakakita kadagitoy manipud idi damo ken kadagidi nangikasaba iti mensahe.

³Kalpasan ti panangadalko a naimbag kadagitoy manipud panangrugida, napanunotko nga isurat kenka ti naurnos a pakasaritaanda.

⁴Kayatko ngamin a maammoam ti amin a kinapudno maipapan kadagiti amin a naisuro kenka.

⁵Idi a ni Herodes ti ari idiay Judea, adda padi nga agnagan Zacarias a kameng ti bunggoy dagiti papadi nga ipanguloan ni Abias. Elisabet ti nagan ti asawana a nagtaud met iti kaputotan ni Aaron a padi.

⁶Iti imatang ti Dios, nagbiag a sililinteg dagiti agassawa. Awan pagkurangan ti panagtungpalda kadagiti amin a paglintegan ken bilin ti Apo.

⁷Awan anakda agsipud ta lupes ni Elisabet. Maysa pay, lakay ken baketdan.

⁸Iti maysa nga aldaw, dimteng ti batang ti bunggoy ni Zacarias nga agserbi iti Templo, ket madama nga ar-aramidenna ti rebbengna a kas padi.

⁹Kas kadawyan dagiti papadi, nagbibinnunotda no siasino ti sumrek iti Templo ti Apo a mangpuor iti insenso iti altar. Napagasatan ni Zacarias ket simrek iti Templo ti Apo.

¹⁰Bayat ti pannakapuor ti insenso iti uneg, agkarkararag met dagiti tattao iti ruar.

¹¹Maysa nga anghel ti Apo ti nagparang ken ni Zacarias. Nagtakder iti makannawan ti altar a pakapupuoran ti insenso.

¹²Nariribukan ni Zacarias idi makitana ket nagbuteng iti napalalo.

¹³Ngem kinuna ti anghel kenkuana, “Dika agbuteng, Zacarias! Impangag ti Dios ti kararagmo. Aganakto ni Elisabet nga asawam. Lalakinto ti anakyo ket panaganamto iti Juan.

¹⁴Agragsakkanto iti kasta unay, ket adunto met ti agragsak iti pannakaipasngayna.

¹⁵Ta naindaklanto a tao iti imatang ti Apo. Masapul a dinto uminum iti arak wenno uray ania a makabartek. Mapnonto iti Espiritu Santo uray adda pay laeng iti tian

¹⁶ket adunto kadagiti Israelita ti pagsublienna iti Apo a Diosda.

¹⁷Umun-unanto a maibaon ngem ti Apo. Nabileg ken mannakabalinto a kas ken ni profeta Elias. Pagtutunosennanto manen dagiti amma ken dagiti annak. Pagsubliennanto iti kinalinteg dagiti nasukir. Isaganananto dagiti tattao a maipaay iti Apo.”

¹⁸“Kasanonto ti pannakaammok a mapasamak daytoy?” sinaludsod ni Zacarias iti anghel. “Lakayakon ket baket metten ni asawak.”

¹⁹“Siak ni Gabriel,” kinuna ti anghel. “Agserserbiak iti imatang ti Dios a nangibaon kaniak a makisao ken mangidanon kenka iti daytoy a damag. Ngem dika met mamati iti mensahek a matungpalto iti naituding a tiempo. Gapu ta dika mamati, agumelkanto ket dikanto makasao agingga iti aldaw a matungpal dagiti sinaok.”

²⁰

²¹Kabayatanna, masmasdaaw dagiti tattao nga agur-uray ken ni Zacarias agsipud ta nabayag unay ti kaaddana iti Templo.

²²Idi rummuar, saanen a makasao, ket daytoy ti nakaammoanda nga adda nagparang kenkuana iti Templo. Gapu ta saanen a makasao, nagsensenias lattan kadakuada.

²³Nagawid ni Zacarias kalpasan ti batangna nga agserbi iti Templo.

²⁴Iti saan a mabayag, nagsikog ni Elisabet nga asawana, ket lima a bulan a di rimrimmuar iti balay.

²⁵“Kamaudianna, tinulongannak ti Apo,” kinuna ni Elisabet. “Inikkatnan ti pakaibabainak iti imatang ti tao.”

²⁶Iti maikanem a bulan ti sikog ni Elisabet, imbaon ti Dios ni Gabriel nga anghel a mapan iti maysa nga ili ti Galilea, a managan Nazaret.

²⁷Naibaon ni Gabriel iti maysa a birhen a naitulag a mayasawa iti lalaki nga agnagan Jose a nagtaud iti kaputotan ni Ari David. Maria ti nagan ti balasang.

²⁸Nagparang ti anghel ken ni Maria ket kinunana, “Kappia koma ti adda kenka. Agragsakka ta agtaeng ti Apo kenka ket naindaklan ti bendisionna.”

²⁹Napalalo ti pannakariribuk ni Maria iti insao ti anghel. “Ania ngata ti kaipapanan daytoy?” kinunana iti bagina.

³⁰Ngem kinuna ti anghel kenkuana: “Dika agbuteng, Maria, ta pinaraburannaka ti Dios.

³¹Agsikogkanto. Ipasngaymonto ti maysa a lalaki, ket panaganamto iti Jesus.

³²Naindaklanto. Maawaganto iti Anak ti Kangatoan. Pagbalinento ni Apo Dios nga ari, a kas ken ni David a kapuonanna.

³³Iturayannanto iti agnanayon dagiti kaputotan ni Jacob, ket dinto agpatingga ti panagarina.”

³⁴Kinuna ni Maria iti anghel: “Kasano a maaramid daytoy idinto a maysaak a birhen?”

³⁵“Umayto kenka ti Espiritu Santo,” insungbat ti anghel. “Salinongannakanto ti pannakabalin ti Dios. Daytoy ti gapuna a nasantoanto ti ubing, ket maawaganto iti Anak ti Dios.

³⁶Malagipmo ni kabagiam nga Elisabet a kunkunada a lupes? Masikog nupay baket unayen. Innem a bulanen ti sikogna.

³⁷Ta awan ti saan a kabaelan ti Dios nga aramiden.”

³⁸“Adtoyak nga adipen ti Apo,” kinuna ni Maria. “Maaramid koma kaniak, kas insaom.” Ket pimmanaw ti anghel.

³⁹Iti saan a mabayag, nagrubbuat ni Maria ket nagdardaras a napan iti maysa nga ili iti kabambantayan ti Judea.

⁴⁰Napan iti balay ni Zacarias ket kinablaawanna ni Elisabet.

⁴¹Apaman a nangngeg ni Elisabet ti kablaaw ni Maria, naggaraw ti ubing iti tianna. Napno ni Elisabet iti Espiritu Santo.

⁴²“Sika ti kagasatan kadagiti amin a babbai!” impukkawna. “Nagasat ti ubing nga ipasngaymonto.

⁴³Anian a pannakapadayawko, ta umaynak sarungkaran ti ina ti Apok!

⁴⁴Ta apaman a nangngegko ti kablaawmo, naggaraw ti ubing iti tianko gapu iti ragsakna.

⁴⁵Wen, nagasatka ta mamatika a matungpalto ti insao kenka ti Apo!”

⁴⁶Kinuna ni Maria: “Toy pusok idaydayawna ti Apo,

⁴⁷Ket agragsak toy kararuak gapu iti Dios a Mangisalakan kaniak.

⁴⁸Ta nalagipnak, siak a nanumo nga adipenna, Ket manipud ita, awagandakto a nagasat dagiti amin a tattao,

⁴⁹Gapu kadagiti naindaklan a bambanag nga inaramid kaniak ti Mannakabalin a Dios. Nasantoan ti naganna;

⁵⁰Kaasianna dagiti agbuteng kenkuana, Manipud iti maysa a kaputotan agingga kadagiti sumarsaruno.

⁵¹Imparangna ti pannakabalin ti takkiagna, Ket winarawarana dagiti natangsit a tattao ken amin a gandatda.

⁵²Inikkatna dagiti mannakabalin nga ari iti tronoda, Ket intan-okna dagiti nanumo.

⁵³Pinennekna dagiti mabisin kadagiti agkakaimbag; Pinagtalawna nga ima-ima dagiti babaknang.

⁵⁴Tinungpalna ti karina kadagiti ammatayo; Tinulonganna ti Israel nga adipenna,

⁵⁵Ket nalagipna a kaasian ni Abraham, Ken ti amin a kaputotanna iti agnanayon.”

⁵⁶Agtallo a bulan a nakipagyan ni Maria ken ni Elisabet. Kalpasanna, nagawid idiay balayda.

⁵⁷Dimteng ti panaganak ni Elisabet, ket impasngayna ti maysa nga ubing a lalaki.

⁵⁸Nadamag dagiti kaarruba ken kakabagianna ti nakaskasdaaw a kinaimbag ti Apo kenkuana. Nakipagragsakda amin kenkuana.

⁵⁹Idi walo nga aldawnan ti maladaga, napanda pinakugit. Kayatda koma a panaganan iti Zacarias, kas ken ni amana.

⁶⁰Ngem kinuna ni inana: “Saan! Juan ti maipanagan kenkuana.”

⁶¹“Ngem awan met kabagiam nga agnagan iti kasta,” kinunada.

⁶²Sineniasanda ni Zacarias tapno ammoenda ti kayatna a maipanagan iti ubing.

⁶³Dimmawat ni Zacarias iti pagsuratan. “Juan ti naganna,” insuratna. Anian a siddaawda amin!

⁶⁴Iti dayta met la a kanito, makasao manen ni Zacarias, ket indaydayawna ti Dios.

⁶⁵Nagbuteng dagiti amin a kaarrubada. Nagwaras ti damag maipapan kadagitoy a bambanag iti amin a disso iti kabambantayan ti Judea.

⁶⁶“Anianto ngata ti pagbalinan daytoy nga ubing?” kinunkuna dagiti amin a nakadamag. Nalawag ngamin nga adda kenkuana ti pannakabalin ti Apo.

⁶⁷Napno iti Espiritu Santo ni Zacarias nga ama ni Juan ket imbagana ti mensahe ti Dios:

⁶⁸“Madaydayaw ti Apo a Dios ti Israel! Immayna tinulongan dagiti tattaona ket winayawayaanna ida.

⁶⁹Inikkannatayo iti maingel a Mangisalakan a nagtaud iti kaputotan ni David nga adipenna.

⁷⁰Nabayagen nga imbagana daytoy, babaen kadagiti nasantoan a profetana.

⁷¹Inkarina nga isalakannatayo kadagiti kabusortayo, iti pannakabalin dagiti amin a gumurgura kadatayo;

⁷²Inkarina met a kaasianna dagiti ammatayo, Ken laglagipenna ti nasantoan a tulagna,

⁷³Ti sinapataanna a kari ken ni Abraham nga amatayo, Nga ispalennatayo kadagiti kabusortayo, Tapno awan pagbutngantayo nga agserbi kenkuana,

⁷⁴

⁷⁵Ket nasantoan ken nalintegtayo iti imatangna kadagiti amin nga aldaw ti panagbiagtayo.

⁷⁶“Sika, anakko, managanankanto iti profeta ti Dios a Kangatoan. Ta umun-unakanto ngem ti Apo, Tapno isaganam ti pagnaanna,

⁷⁷Ken ipakaammom kadagiti tattaona a maisalakandanto, Babaen iti pannakapakawan dagiti basbasolda.

⁷⁸Naasi ken naayat ti Diostayo; Pagbannawagennanto ti pannakaisalakantayo,

⁷⁹Ket manipud sadi langit, silnaganna dagiti agbibiag iti kasipngetan ni patay, Ket iturongna dagiti addangtayo iti dalan ti kappia.”

⁸⁰Dimmakkel ti ubing ken pimmigsa iti espiritu. Nagnaed idiay let-ang agingga iti aldaw a panagparangna a silalatak kadagiti tattao iti Israel.