Read Iloko Luke 12 Bible Online

Luke 12 - Iloko bible

Luke 12

¹Agaaribungbong dagiti rinibribu a tattao ket urayda la agbibinnaddeken. Immuna a kinasao ni Jesus dagiti adalanna. Kinunana, “Annadanyo ti lebadura dagiti Fariseo, kayatko a sawen, ti panaginsisingpetda.

²Awan ti nailemmeng a dinto maiparangarang, ket awan met ti palimed a dinto mailatak.

³Iti kasta, ti aniaman a nasaoyo iti kasipngetan, mangngegto iti lawag. Ket amin nga inyarasaasyo kadagiti siririkep a siled, maipukkawto manipud iti tuktok dagiti balbalay.”

⁴“Ibagak kadakayo, gagayyemko: Dikay agbuteng kadagiti mangpapatay iti bagi ngem awanen ti dakdakes a mabalinda nga aramiden.

⁵Ipakaammok kadakayo ti rumbeng a pagbutngan: Agbutengkayo iti Dios nga adda pannakabalinna a mangitappuak iti bagi idiay infierno kalpasan ti panangpapatayna. Wen, patiendak, isu ti pagbutnganyo!

⁶“Saan aya a malako iti dua a sentimo ti lima a sallapingaw? Nupay kasta, saan a malipatan ti Dios ti uray maysa laeng a sallapingaw.

⁷Uray dagiti buokyo, nabilangda amin. Isut' gapuna a dikay agbuteng ta napatpategkayo nga adayo ngem ti adu a sallapingaw.”

⁸“Ibagak kadakayo: Ti mangipakaammo kadagiti tattao iti pannakikaduana kaniak, kastanto met ti aramiden ti Anak ti Tao iti imatang dagiti angheles ti Dios.

⁹Ngem ti mangilibak kadagiti tattao iti pannakikaduana kaniak, ilibakto met ti Anak ti Tao kadagiti angheles ti Dios.

¹⁰“Mapakawanto ti siasinoman nga agsao iti maibusor iti Anak ti Tao. Ngem dinto mapakawan ti agsao iti maibusor iti Espiritu Santo.

¹¹“No ipandakayo kadagiti sinagoga a pakausiganyo wenno isaklangdakayo kadagiti gobernador wenno agtuturay, diyonto pakadanagan ti panangsalaknibyo kadagiti bagbagiyo wenno anianto ti sawenyo.

¹²Ta iti dayta nga oras, isuronakayto ti Espiritu Santo iti tumutop a sawenyo.”

¹³Adda maysa a lalaki a naitallaong sadiay. “Maestro,” kinunana ken ni Jesus, “ibagam man iti kabsatko a lalaki a bingayenna ti sanikua a tinawidmi iti daydi amami.”

¹⁴“Gayyem,” insungbat ni Jesus, “siasino aya ti nangted kaniak iti kalintegan a mangeddeng wenno mangbingay iti tawidyo nga agkabsat?”

¹⁵Intuloyna a kinuna kadakuada amin: “Kitaenyo ket agannadkay iti amin a kita ti kinaagum. Ta ti pudno a biag ti tao saan a maibatay iti sanikua, uray no kasano ti kinabaknangna.”

¹⁶Sinaritana kadakuada daytoy a pangngarig, “Adda idi baknang a nawadwad ti apitna.

¹⁷Kinunana iti bagina: ‘Ania ngata ti aramidek? Awan umanay a pagipempenak iti apitko.

¹⁸A, ammokon! Daytoy ti aramidek: Rakrakekto dagiti sarusarko, ket mangbangonakto kadagiti daddadakkel a pagipempenan iti apitko ken dadduma a sanikuak.

¹⁹Ket kunakto iti bagik: ‘Naggasatkan, bagi, ta adda amin a masapulmo iti adu a tawen. Aginanaka, manganka, uminumka, ket agragsakka.’

²⁰Ngem kinuna ti Dios kenkuana: ‘Maag! Ita met la a rabii, matayka. Ket amin dagitoy nga urnongmo, siasinonto ti agtagikua?’”

²¹Ket inggibus ni Jesus, “Kastanto ti pagbanagan dagiti agurnong iti adu a sanikua nga agpaay kadakuada, ngem napanglawda iti imatang ti Dios.”

²²Kinuna ni Jesus kadagiti adalanna, “Daytoy ti gapuna nga ibagak kadakayo a diyo pakadanagan ti taraon a pagbiagyo wenno ti lupot a pagkawesyo.

²³Napatpateg nga adayo ti biag ngem ti taraon, ket napatpateg met ti bagi ngem ti lupot.

²⁴Kitaenyo dagiti wak. Dida agmula wenno agani. Awan kamalig wenno sarusarda. Nupay kasta, taraonan ida ti Dios. Napatpategkayo nga adayo ngem dagiti tumatayab!

²⁵“Siasino kadakayo ti makapaatiddog iti biagna babaen iti panagdandanagna?

²⁶No diyo maaramid ti uray kasta a bassit a banag, apay a maringgorankayo kadagiti dadduma?

²⁷Kitaenyo ti panagdakkel dagiti lirio. Dida agtrabaho wenno agabel. Ngem ibagak kadakayo a ni Solomon, uray no kasano ti kinabaknangna, awan kawesna a kas kapintas ti uray maysa kadagitoy a sabsabong.

²⁸No kawesan ti Dios dagiti ruot iti tay-ak, ruot nga adda ita ket inton bigat maipuor, saan aya a nangnangruna a kawesannakayo? Nagbassit ketdin ti pammatiyo!

²⁹Dikayo ngarud maringgoran iti kanen ken inumenyo.

³⁰Ta dagitoy ti pakaringgoran dagiti pagano ditoy lubong. Ammo ni Amayo a masapulyo dagitoy.

³¹Ipangpangrunayo ketdi a biroken ti Pagarianna, ket itednanto pay dagitoy kadakayo.”

³²“Dikay agbuteng, bassit nga arbanko! Ta pagayatan ni Amayo nga ited kadakayo ti Pagarian.

³³Ilakoyo ti amin a kukuayo ket ilimosyo ti paglakoanyo kadagiti napanglaw. Isaganaanyo dagiti bagbagiyo kadagiti supot a di marunot ken kadagiti di mapukaw a kinabaknang sadi langit. Ta sadiay saan a matakaw ken saan a mabuot.

³⁴Ta no sadino ti ayan ti gamengyo, adda met sadiay ti pusoyo.”

³⁵“Masapul a sisasaganakayo latta iti uray ania a mapasamak ken sigagangat dagiti pagsilawanyo

³⁶a kas kadagiti adipen a mangpaspasungad iti amongda a napan nakiboda. No sumangpet ket agtugtog, dagdagusenda nga ilukat ti ridaw.

³⁷Anian a ragsak dagiti kakasta nga adipen a siririing ken sisasagana a masangpetan ti amongda. Ibagak kadakayo, agkawesto iti pagserbi, pagtugawennanto ida iti panganan, ket serbiannanto ida.

³⁸Anian a ragsakda no masangpetanna ida a sisasagana, uray no sumangpet iti tengnga ti rabii wenno naladladaw pay.

³⁹Ammoenyo daytoy: No ammo ti ama ti familia ti oras a yaay ti mannanakaw, dina itulok a serken ti mannanakaw ti balayna.

⁴⁰Kasta met kadakayo, masapul a sisasaganakayo latta, ta umayto ti Anak ti Tao iti oras a diyo ipagpagarup.”

⁴¹“Apo,” kinuna ni Pedro, “dakami kadi ti pangiturongam iti daytoy a pangngarig wenno inrantam nga agpaay iti amin?”

⁴²Insungbat ti Apo, “Siasino ngarud ti mapagtalkan ken masirib nga adipen? Isu ti tudingan ti amongna a mangaywan iti balayna ken mangted kadagiti dadduma nga adipen iti pannakabagida a kanen no dumteng ti pannangan.

⁴³Nagasat dayta nga adipen no masangpetan ti amongna a kasta ti ar-aramidenna!

⁴⁴Wen, ibagak kadakayo, isaadto ti amo daytoy nga adipen nga agaywan kadagiti amin a sanikuana.

⁴⁵Ngem no kuna dayta nga adipen iti bagina, ‘Mabayag pay ti isasangpet ti amongko,’ ket iruginan a kabilen dagiti padana nga adipen, lallaki man wenno babbai, sa mangan, uminum ken agbartek.

⁴⁶Dumtengto ti amongna iti aldaw a dina ipagpagarup ken iti oras a dina ammo. Dusaento ti amongna ket ipalak-amnanto kenkuana ti kaikarian dagiti saan a mapagtalkan.

⁴⁷“Ti adipen a makaammo iti kayat a paaramid ti amongna ngem di met agkuti ken agtungpal, magagaranto iti saplit.

⁴⁸Nalaglag-anto ti pannakasaplit ti adipen a di makaammo iti kayat a paaramid ti amongna nupay no agaramid iti pakaigapuan ti pannakadusana. “No adu ti naited iti tao, adunto met ti manamnama nga aggapu kenkuana. Ngem no ad-adu ti maited iti tao, ad-adunto met ti manamnama nga aggapu kenkuana.”

⁴⁹“Immayak a mangyeg iti pannusa ti Dios kadagiti tattao, ket kayatko a mangrugi koman ti pannakadusada a kasla apuy a mangur-uram kadakuada.

⁵⁰Adda buniag a masapul nga awatek, ket anian a dukotko agingga a di matungpal.

⁵¹“Ipagarupyo aya nga immayak mangyeg iti kappia ditoy lubong? Ibagak kadakayo a panagsisina ti inyegko, saan a kappia.

⁵²Manipud ita, mabingbingay ti maysa a familia a lima ti kamkamengna. Kontraen dagiti tallo ti dua, ket kontraen dagiti dua ti tallo.

⁵³Ti ama kontraenna ti anakna a lalaki, ket ti anak a lalaki kontraenna ti amana. Ti ina kontraenna ti anakna a babai, ket ti anak a babai kontraenna ti inana. Ti katugangan a babai kontraenna ti manugangna a babai, ket ti manugang a babai kontraenna met ti katuganganna a babai.”

⁵⁴Kinuna pay ni Jesus kadagiti tattao, “No makitayo ti ulep nga agparang iti laud, dagus a kunayo nga umay ti tudo, ket kasta ti mapasamak.

⁵⁵No madlawyo nga aggapu ti angin iti abagatan, kunayo nga umay ti pudot; ket kasta ti maaramid.

⁵⁶Aginsisingpet! Maibagayo ti kasasaad ti panawen babaen ti panangkitayo iti langa ti langit ken daga, ngem apay a diyo maawatan ti kayat a sawen ti agdama a tiempo?”

⁵⁷“Apay a diyo panunoten ti rumbeng nga aramidenyo?

⁵⁸No adda mangidarum kenka ket ipannaka iti pangukoman, aramidem ti amin a kabaelam a makilinnawag kenkuana sakbay a dumatagkay iti ukom. No dika makirinnisut, pilitennaka nga agparang iti ukom a mangyawat kenka iti polis, ket maipupokkanto iti pagbaludan.

⁵⁹Ibagak kenka a dikanto makaruar sadiay agingga a mabayadam ti amin a multam.”