Read Iloko Luke 13 Bible Online

Luke 13 - Iloko bible

Luke 13

¹Iti dayta a tiempo, adda sumagmamano a tattao sadiay a nangibaga ken ni Jesus maipapan kadagiti taga-Galilea a pinapatay ni Pilato idi madamada nga agidatdaton iti Dios.

²Kinuna kadakuada ni Jesus, “Gapu ta kasta ti pannakapapatay dagiti taga-Galilea, ipagarupyo kadi a dakdakkel ti basolda ngem dagiti dadduma a taga-Galilea?

³Saan! Ibagak kadakayo a no saankayo nga agbabawi kadagiti basbasolyo, mataykayto amin a kas kadakuada.

⁴“Ket ania met ti panangipagarupyo kadagidi sangapulo ket walo a natay a nagaburan idi narba ti torre idiay Siloe? Ipagarupyo kadi a daytoy ti mangipaneknek a dakdakesda ngem dagiti amin a tattao nga agnaed idiay Jerusalem?

⁵Saan! Ibagak kadakayo a no saankayo nga agbabawi kadagiti basbasolyo, mataykayto amin a kas kadakuada.”

⁶Sinarita ni Jesus daytoy a pangngarig kadakuada: “Adda idi maysa a tao nga adda mulana nga igos iti kaubasanna. Naminsan, napanna kinita no adda bungana ngem awan nasarakanna.

⁷Kinunana ngarud iti pagay-aywanenna, ‘Kitaem, tallo a tawenen nga um-umayak ditoy nga agbirok iti bunga daytoy nga igos. Awan pay nasarakak a bungana. Pukanemon! Apay nga ibusenna ti kinataba ti daga?’

⁸Ngem insungbat ti agay-aywan, ‘Apo, bay-am pay, uray ita la a tawenen. Kaliakto ti lawlawna sakonto abunoan.

⁹No agbunga inton umay a tawen, nasayaat. No saan nga agbunga, papukanmonton.’”

¹⁰Iti maysa nga Aldaw a Panaginana, mangisursuro ni Jesus iti uneg ti maysa a sinagoga.

¹¹Adda babai sadiay a sangapulo ket walo a tawenen a linuganan ti dakes nga espiritu. Nagbalin a kubbo ket pulos a di makatakder iti nalinteg.

¹²Idi makita ni Jesus ti babai, inayabanna. “Naimbagankan iti sakitmo!” kinuna ni Jesus kenkuana.

¹³Impatay ni Jesus dagiti imana. Dagus a nagtakder ti babai a sililinteg ket nagdaydayaw iti Dios.

¹⁴Nakapungtot ti agturay iti sinagoga, gapu ta nangagas ni Jesus iti Aldaw a Panaginana ket kinunana kadagiti tattao, “Innem nga aldaw ti panagtrabahotayo. Ngarud, umaykayo agpaagas kadagita nga aldaw, a saan ketdi nga iti Aldaw a Panaginana!”

¹⁵Ngem insungbat ti Apo kenkuana, “Dakayo nga aginsisingpet! Iti Aldaw a Panaginana, diyo aya warwaran ti baka wenno asnoyo iti nakaiparngedanda tapno inkay ipainum ida?

¹⁶Sangapulo ket walo a tawenen a pinarigat ni Satanas daytoy nga anak ni Abraham. Saan aya a rumbeng nga ita nga Aldaw a Panaginana, mawayawayaan iti pannakabaludna?”

¹⁷Nabainan amin a kabusor ni Jesus gapu iti insungbatna. Ngem nagragsak dagiti tattao gapu kadagiti amin a nakaskasdaaw nga inaramidna.

¹⁸Sinaludsod ni Jesus, “Ania ti kayarigan ti Pagarian ti Dios? Ania ti mabalinko a pangipadaan?

¹⁹Kastoy ti kayariganna: mangala ti maysa a tao iti bukel ti mostasa nga imulana iti minuyonganna. Nagtubo ket nagbalin a kayo, ket nagumokan dagiti tumatayab dagiti sangsangana.”

²⁰Sinaludsod manen ni Jesus, “Ania ti pangyarigak iti Pagarian ti Dios?

²¹Kastoy ti kayariganna: mangala ti maysa a babai iti lebadura ket igamayna iti uppat a pulo a litro nga arina. Gapu iti lebadura, bumsog ti entero a masa.”

²²Iti dalanna a mapan idiay Jerusalem, nangisursuro ni Jesus kadagiti nalabasanna nga il-ili ken barbarrio.

²³Adda nagsaludsod kenkuana, “Apo, manmano kadi dagiti maisalakan?” Insungbat ni Jesus kadakuada,

²⁴“Aramidenyo ti kabaelanyo a sumrek iti nailet a ruangan, agsipud ta adunto ti agtarigagay a sumrek ngem didanto makastrek.

²⁵“Inton tumakderen ti ama ti familia tapno mapanna irikep ti ruangan, mabatikayto iti ruar. Uray agtugtogkayo ket kunayo, ‘Apo, ilukatmo man ti ruangan,’ isungbatnanto kadakayo, ‘Diak ammo no taga-anokayo.’

²⁶Iti kasta, kunayonto, ‘Nakipangpangan ken nakiin-inumkami kenka ket nangisursuroka idiay ilimi.’

²⁷Isungbatnanto manen, ‘Diak ammo no taga-anokayo. Umadayokayo kaniak, dakay amin a managdakdakes!’

²⁸Agsangit ken agngaretngetkayto inton makitayo nga adda da Abraham, Isaac, Jacob ken dagiti amin a profeta iti Pagarian ti Dios, idinto nga addakay iti ruar!

²⁹Umayto dagiti tattao nga aggapu iti daya ken laud, iti amianan ken abagatan, ket sumangodanto a mangan idiay Pagarian ti Dios.

³⁰“Kitaenyo, adda dagiti maudi ita nga umunanto, ket adda dagiti umuna ita a maudinto.”

³¹Iti dayta met laeng nga aldaw, napan ken ni Jesus ti sumagmamano a Fariseo ket kinunada kenkuana, “Masapul a pumanawka ditoy ket inka iti sabali a lugar, ta kayatnaka a papatayen ni Herodes.”

³²“Inkay ibaga iti dayta nga aso,” insungbat ni Jesus kadakuada. “‘Ita ken inton bigat, paksiatek dagiti demonio ket mangagasak. Iti maikatlo nga aldaw, malpaskonton ti aramidko.’

³³Ngem ita ken inton bigat, ken iti sumaruno pay nga aldaw, masapul nga ituloyko ti magna. Saan a rumbeng a mapapatay ti maysa a profeta iti sabali a lugar no saan nga idiay Jerusalem.

³⁴“O Jerusalem, Jerusalem a mangpapatay kadagiti profeta ken mangubor kadagiti imbaon kenka ti Dios! Namin-ano a kinayatko nga ummongen dagiti annakmo, kas iti panangsallukob ti upa kadagiti piekna, ngem madikayo met!

³⁵Ita, mabaybay-an a mamimpinsan ti balayyo. Ibagak kadakayo a didakton makita agingga iti dumteng ti tiempo a kunayo: ‘Bendisionan ti Dios ti umay iti nagan ti Apo!’”