Read Iloko Luke 15 Bible Online

Luke 15 - Iloko bible

Luke 15

¹Iti maysa nga aldaw, adu nga agsingsingir iti buis ken dadduma a managbasol ti napan nagdengngeg ken ni Jesus.

²Nagtanabutob dagiti Fariseo ken mamaestro iti Linteg. “Awaten daytoy a tao dagiti dakes ti pakasarsaritaanda ket kasangona pay ida a mangan!” kinunada.

³Iti kasta, insarita ni Jesus kadakuada daytoy a pangngarig:

⁴“Kas pangarigan, adda 100 a karnero ti maysa kadakayo, ket mapukaw ti maysa kadakuada, ania ti aramidenna? Panawanna dagiti 99 iti pagar-arabanda sana mapan sapulen ti napukaw agingga a mabirokanna.

⁵No masarakannan, kasta unay ti ragsakna ket baklayenna

⁶nga isangpet idiay balayna. Ayabanna dagiti gagayyem ken kaarrubana ket kunana kadakuada, ‘Maragsakanak unay ta nabirokak met laeng ti napukaw a karnerok! Agrambaktayo!’

⁷“Kasta met, ibagak kadakayo a dakdakkelto ti ragsak sadi langit gapu iti maysa a managbasol nga agbabawi, ngem gapu iti 99 a di makasapul iti panagbabawi.”

⁸Intuloy ni Jesus, “Wenno kas pangarigan, adda sangapulo a bagi ti pirak ti maysa a babai, ket no mapukawna ti maysa, ania ti aramidenna? Gangtanna ti pagsilawan, sagadanna ti balayna, ket agbirok a sipapasnek agingga a masapulanna.

⁹Apaman a masarakanna, ayabanna dagiti gagayyem ken kaarrubana. ‘Agrambaktayo,’ kunana kadakuada, ‘ta nasapulak met laeng ti napukawko a kuarta.’

¹⁰“Kasta met, ibagak kadakayo, nga agragsak dagiti angheles ti Dios gapu iti maysa a managbasol nga agbabawi.”

¹¹Sinarita pay ni Jesus daytoy: “Adda idi tao nga addaan iti dua nga annak a lallaki.

¹²Kinuna ti inaudi iti amana, ‘Ama, itedmon ti tawidko.’ Biningay ngarud ti ama ti sanikuana kadagiti dua nga annakna.

¹³Kalpasan ti sumagmamano nga aldaw, inlako ti inaudi ti bingayna, ket innalana ti naglakoanna sa pimmanaw. Napan iti adayo a daga ket sadiay binusbosna amin a kuartana iti nabarayuboy a panagbiag.

¹⁴Idi nagastonan amin a kuartana, dimteng ti nakaro a bisin iti dayta a daga ket pulos nga awan nabatin kenkuana.

¹⁵Iti kasta, napan nagtrabaho iti maysa kadagiti umili sadiay a nangibaon kenkuana iti away tapno agtaraken kadagiti baboy.

¹⁶Kayatna ti mangan iti kankanen dagiti baboy, ngem awan nangted kenkuana!

¹⁷Idi makapanunot met laeng, kinunana, ‘Agsobsobraan iti kanen dagiti amin a mangmangged idiay balay ni amak, ket addaak ditoy a matmatay iti bisin!

¹⁸Pumanawak ketdi ket agsubliak ken ni amak. Ama, kunakto, nagbasolak iti Dios, kasta met kenka.

¹⁹Diak maikarin a maawagan nga anakmo. Ibilangnak kadi a kas maysa kadagiti tangtangdanam.’

²⁰Pimmanaw ngarud sadiay ket nagrubbuat nga agsubli ken amana. “Adayo pay laeng iti balayda idi makita ni amana. Naasian ti ama ket timmaray a simmabat iti anakna. Inapungolna sana inagkan.

²¹‘Ama,’ kinuna ti anak, ‘nagbasolak iti Dios, kasta met kenka. Diak maikarin a maawagan nga anakmo.’

²²Ngem inayaban ti ama dagiti katulonganna. ‘Darasenyo!’ kinunana. ‘Alaenyo ti kasayaatan a bado ket ikawesyo kenkuana. Singsingan ken sapatosanyo.

²³Inkay alaen ti napalukmeg a baka ket partienyo. Agrambaktayo!

²⁴Ta natay daytoy nga anakko, ngem nagungar. Napukaw ngem nasapulan met laeng.’ Ket nangrugin ti ramrambak.

²⁵“Adda idi ti inauna nga anak idiay taltalon. Idi agawid ket makaasideg iti balay, nangngegna ti toktokar ken salsala.

²⁶Inayabanna ti maysa kadagiti katulongan ket sinaludsodna, ‘Ania ti mapaspasamak?’

²⁷‘Nagsublin ti kabsatmo,’ insungbat ti katulongan, ‘ket pinaparti ni tatangmo ti napalukmeg a baka, ta napasangpetna a sisasalun-at ken sikakaradkad.’

²⁸Kasta unay ti pungtot ti inauna a kabsat ket dina kayat ti sumrek iti balay. Iti kasta, rimmuar ti amana a nangay-ayo kenkuana a sumrek.

²⁹‘Kitaem,’ kinuna ti inauna, ‘nabayagen a kaslaak la maysa a tagabu a nagserserbi kenka. Pulos a diak nagsukir kadagiti bilbilinmo. Ania ti intedmo kaniak? Dinak man la inikkan iti uray maysa la koma a kalding a pakipagragragsakko kadagiti gagayyemko.

³⁰Ngem daytoy nga anakmo—binusbosna amin a sanikuam kadagiti dakes a babbai. Ket ita ta nagsublin, impartiam iti napalukmeg a baka!’

³¹‘Anakko,’ insungbat ti ama, ‘kanayon nga addaka ditoy dennak, ket kukuam amin a kukuak.

³²Ngem masapul nga agrambak ken agragsaktayo, ta natay ti kabsatmo ngem nagungar. Napukaw ngem nasapulan met laeng.’”