Read Iloko Luke 2 Bible Online

Luke 2 - Iloko bible

Luke 2

¹Kadagidi nga aldaw, impaulog ni Emperador Augusto ti bilin a mailista ti amin nga umili iti Imperio ti Roma.

²Daytoy ti umuna a sensus a naaramid idi madama a gobernador ni Kirenio idiay Siria.

³Iti kasta, napan ti tunggal maysa iti ilina tapno agpailistada.

⁴Agsipud ta nagtaud ni Jose iti kaputotan ni David, pimmanaw iti ili a Nazaret idiay Galilea, ket napan iti ili a Betlehem idiay Judea. Idiay Betlehem ti nakayanakan ni Ari David.

⁵Kadua ni Jose ni Maria a naitulag nga asawaenna iti panagdaliasatna. Masikog idi ni Maria

⁶ket idi addada idiay Betlehem, dimteng ti oras a panagpasngayna.

⁷Inyanakna ti inauna nga anakna a lalaki ket binungonna iti lampin sana impaidda iti kulluong ta awan pagyananda iti pagdagdagusan.

⁸Iti dayta a paset ti pagilian, adda sumagmamano nga agpaspastor nga adda idi iti away nga agbambantay kadagiti karneroda iti rabii.

⁹Nagparang kadakuada ti maysa nga anghel ti Apo, ket sinilnagan ida ti dayag ti Apo. Napalalo ti butengda,

¹⁰ngem kinuna ti anghel kadakuada, “Dikay agbuteng! Addaak ditoy a mangyeg kadakayo iti naimbag a damag a pakaragsakanyo, wen, dakayo ken dagiti amin a tattao.

¹¹Ita nga aldaw, ditoy ili ni David, naipasngay ti mangisalakan kadakayo—ni Cristo nga Apo!

¹²Daytoy ti pagilasinanyo: masarakanyonto ti maysa nga ubing a nabungon iti lampin ken nakaidda iti kulluong.”

¹³Pagammoan, adda dakkel a nailangitan a bunggoy a nagparang iti asideg ti anghel. Ikankantada dagiti pagdaydayaw iti Dios:

¹⁴“Gloria iti Dios iti kangatoan a langit! Ket ditoy daga, kappia ken talna kadagiti tattao a pakaragsakanna!”

¹⁵Apaman a nakapanaw dagiti angheles nga agsubli sadi langit, kinuna dagiti agpaspastor iti maysa ken maysa, “Intayon idiay Betlehem! Intayo kitaen daytoy napasamak nga impakaammo ti Apo kadatayo!”

¹⁶Nagdardarasda ngarud a napan. Nasarakanda da Maria ken Jose, ken ti ubing a nakaidda iti kulluong.

¹⁷Idi makitada ti maladaga, sinaritada kadakuada ti imbaga ti anghel maipapan iti ubing.

¹⁸Nasdaaw amin a nakangngeg iti impadamagda.

¹⁹Tinandaanan ken pinampanunot ni Maria amin dagitoy.

²⁰Nagsubli dagiti agpaspastor a mangikankanta kadagiti pagdaydayaw iti Dios gapu kadagiti amin a nangngeg ken nakitada. Napasamak ti amin kas imbaga kadakuada ti anghel.

²¹Kalpasan ti walo nga aldaw, dimteng ti tiempo a pannakakugit ti ubing, ket napanaganan iti Jesus. Daytoy ti impanagan kenkuana ti anghel sakbay ti pannakainawna.

²²Dimteng ti tiempo a panangtungpal da Jose ken Maria iti seremonia ti pannakadalus, kas mayannurot iti Linteg ni Moises. Impanda ngarud ti ubing idiay Jerusalem tapno idatonda iti Apo

²³kas nailanad iti linteg ti Apo: “Maidaton iti Apo ti amin nga inauna a lalaki.”

²⁴Napanda tapno mangidatagda met iti sakrifisio a sangaparis a pagaw wenno dua a sibong ti kalapati, kas mayannurot iti linteg ti Apo.

²⁵Iti dayta a tiempo, adda lakay nga agnagan Simeon nga agnaed idiay Jerusalem. Naimbag ken managbuteng iti Dios ket padpadaananna ti pannakaisalakan ti Israel. Adda kenkuana ti Espiritu Santo.

²⁶Impaltiing kenkuana ti Espiritu Santo a dinto matay agingga iti makitana ti Cristo nga inkari ti Apo.

²⁷Babaen iti panangidalan ti Espiritu, simrek ni Simeon iti Templo. Idi impan dagiti nagannak ti ubing a Jesus idiay Templo tapno aramidenda kenkuana ti ibilin ti Linteg,

²⁸sinakruy ni Simeon ti ubing ket nagyaman iti Dios. Kinunana:

²⁹“Ita, ta tinungpalmon ti karim, O Apo, Palubosamon a pumusay a sitatalna toy adipenmo.

³⁰Ta nakitakon kadagiti bukodko a mata ti panangisalakanmo,

³¹Nga insaganam iti imatang dagiti amin a tattao:

³²Maysa a silaw a mangipakaammo kadagiti Hentil ti pagayatam. Ken mangyeg iti dayaw iti ilim nga Israel.”

³³Nasdaaw dagiti nagannak iti ubing iti sinao ni Simeon maipapan kenkuana.

³⁴Binendisionan ida ni Simeon. “Pinili ti Dios daytoy nga ubing a pakadadaelan ken pakaisalakanan ti adu iti Israel,” kinunana ken ni Maria. “Naituding a pagilasinan a suppiatento ti adu a tattao.

³⁵Iti kasta, mailatakto dagiti nalimed a pampanunotda. Ket ta pusom salputento ti ladingit a kas natadem a kampilan.”

³⁶Adda met maysa a profeta a baket unayen. Isu ni Ana nga anak ni Fanuel iti tribu ti Aser. Pito a tawen a nagdennada iti asawana

³⁷ket 84 a tawenen a nabalo. Saan a pimmampanaw iti Templo. Aldaw-rabii a nagdaydayaw iti Dios, nagay-ayunar ken nagkarkararag.

³⁸Iti daydi met la nga oras, simmangpet ni Ana ket nagyaman iti Dios sa nagsao maipapan iti ubing kadagiti amin nga agur-uray iti panangwayawaya ti Dios iti Jerusalem.

³⁹Idi naaramiden da Jose ken Maria ti amin nga ipaannurot ti linteg ti Apo, nagsublida iti ilida a Nazaret idiay Galilea.

⁴⁰Dimmakkel ken pimmigsa ti ubing. Napnoan iti sirib ket adda kenkuana ti parabur ti Dios.

⁴¹Tinawen a mapan dagiti nagannak ken ni Jesus idiay Jerusalem iti Fiesta ti Paskua.

⁴²Idi agtawen ni Jesus iti sangapulo ket dua, napanda nakifiesta a kas kadawyanda.

⁴³Idi nalpasen ti fiesta ket agaw-awiddan, nagbati ni Jesus idiay Jerusalem a di ammo dagiti nagannak kenkuana.

⁴⁴Impagarupda nga adda iti bunggoyda. Maysa nga aldawda a magmagna idi madlawda nga awan ni Jesus, isu a sinapsapulda kadagiti kakabagian ken gagayyemda.

⁴⁵Agsipud ta dida masarakan, nagsublida idiay Jerusalem tapno sapulenda sadiay.

⁴⁶Iti maikatlo nga aldaw, nasarakanda ni Jesus idiay Templo. Makikatkatugaw kadagiti mamaestro a Judio. Agdengdengngeg ken agsalsaludsod kadakuada.

⁴⁷Nagsiddaaw amin a nakangngeg kenkuana gapu kadagiti nainsiriban a sungbatna.

⁴⁸Nasdaaw dagiti nagannak kenkuana idi makitada. “Anakko,” kinuna ni inana, “apay nga inaramidmo daytoy kadakami? Kasta unay ti danagmi ken ni amam a mangbirbirok kenka.”

⁴⁹“Apay aya a binirbirokdak?” insungbat ni Jesus. “Diyo kadi ammo a masapul nga addaak iti balay ni Amak?”

⁵⁰Ngem dida naawatan ti imbagana kadakuada.

⁵¹Nakikuyog ni Jesus kadakuada a nagawid idiay Nazaret, ket sadiay, nagbalin a natulnog nga anak. Sinalimetmetan amin dagitoy ni inana iti pusona.

⁵²Dimmakkel ni Jesus iti bagi ken nagbalin a masirib. Naay-ayo kenkuana ti Dios ken dagiti tattao.