Read Iloko Luke 20 Bible Online

Luke 20 - Iloko bible

Luke 20

¹Iti maysa nga aldaw, adda ni Jesus idiay Templo. Isursurona dagiti tattao ken ikaskasabana kadakuada ti Naimbag a Damag. Napan kenkuana dagiti panguloen a papadi, dagiti mamaestro iti Linteg ken dagiti panglakayen

²ket kinunada kenkuana, “Ibagam man kadakami no ania ti kalintegam a mangaramid kadagitoy? Siasino ti nangted kenka iti turay a mangaramid kadagitoy?”

³“Adda saludsodek kadakayo,” insungbat ni Jesus.

⁴“Ibagayo man kaniak no naggapuan ti turay ni Juan a Mammuniag: iti Dios wenno iti tao?”

⁵“Ania ti isungbattayo?” nagsisinnaludsodda. “No kunatayo a naggapu iti Dios, kunananto, ‘Apay ngarud a dikayo namati ken ni Juan?’

⁶Ngem no kunatayo a naggapu iti tao, uborendatayto dagiti amin a tattao nga adda ditoy agsipud ta patienda a profeta ni Juan.”

⁷Iti kasta, insungbatda, “Dimi ammo.”

⁸“Diak met ngarud ibaga kadakayo no ania ti kalintegak nga agaramid kadagitoy,” kinuna ni Jesus.

⁹Sinarita ni Jesus kadagiti tattao daytoy a pangngarig. “Adda idi maysa a tao a nagmula iti kaubasanna sana impaabang ti kaubasan kadagiti makitaltalon. Kalpasanna, napan iti sabali a pagilian ket nabayag a nagyan sadiay.

¹⁰“Idi dumteng ti panagbuburas iti ubas, imbaon ti akinkukua ti maysa nga adipenna a mapan kadagiti makitaltalon tapno alaenna ti bingayna. Ngem kinabkabil dagiti makitaltalon ti adipen sada pinagawid nga ima-ima.

¹¹“Sabali manen nga adipen ti imbaon ti akinkukua ti kaubasan, ngem kinabkabilda met, pinabpabainanda sada pinagawid nga ima-ima.

¹²“Pinitlona ti nangibaon iti adipen. Dinangranda met sada impurruak iti ruar ti kaubasan.

¹³“Kinuna daydi akinkukua iti kaubasan, ‘Ania ti aramidek? Ibaonko ketdi ti ingungotek nga anak. Awan duadua a padayawandanto.’

¹⁴“Ngem idi makita dagiti makitaltalon ti naibaon, kinunada iti maysa ken maysa, ‘Daytoyen ti agtawid! Papatayentayo ketdi, ket datayton ti agtagikua iti tawidenna.’

¹⁵“Inruarda ngarud iti kaubasan, ket pinatayda. “Anianto ngarud ti aramiden ti akinkukua iti kaubasan kadagiti makitaltalon?” sinaludsod ni Jesus.

¹⁶“Mapannanto papatayen ida sana yawat ti kaubasan kadagiti sabali a makitaltalon.” Idi mangngeg daytoy dagiti tattao, kinunada, “Saan a mabalin a kasta.”

¹⁷Kinita ida ni Jesus ket sinaludsodna, “Ania ngarud ti kayat a sawen daytoy a paset ti Nasantoan a Surat? ‘Ti bato nga imbelleng dagiti agipatpatakder, Nagbalin a kangrunaan a bato.’

¹⁸“Maburburakto ti siasinoman a matnag iti daytoy a bato ket matumekto a kas tapok ti siasinoman a matupakanna.”

¹⁹Ammo dagiti mamaestro iti Linteg ken dagiti panguloen a papadi a sinarita ni Jesus daytoy a pangngarig a naiturong kadakuada. Isut' gapuna a pinadasda a patiliw ni Jesus iti dayta met la nga oras. Ngem nagbutengda kadagiti tattao.

²⁰Nagurayda ngarud iti nasayaat a gundaway. Tinangdananda ti sumagmamano a lallaki tapno agparangda a nalinteg. Imbaonda ida a mapan mangpalab-og ken ni Jesus babaen kadagiti saludsodda tapno adda pambaranda a mangtiliw ken mangyawat kenkuana iti turay ken pannakabalin ti gobernador.

²¹“Maestro,” kinunada ken ni Jesus, “ammomi a nasayaat ti amin nga isasao ken isursurom. Ammomi nga awan idumdumam no di ket isurom ti pudno maipapan iti pagayatan ti Dios kadagiti tattao.

²²Ibagam man no maisalungasing iti Linteg ti panagbayadmi iti buis iti Emperador?”

²³Ngem nadlaw ni Jesus ti sikapda ket kinunana kadakuada,

²⁴“Mangipakitakayo man kaniak iti kuarta. Siasino ti akinladawan ken akinnagan iti daytoy?” “Ti Emperador,” insungbatda.

²⁵Iti kasta, kinuna ni Jesus, “Itedyo ngarud iti Emperador dagiti kukua ti Emperador. Itedyo met iti Dios ti kukua ti Dios.”

²⁶Agsipud ta awan pangtiliwanda kenkuana iti imatang dagiti tattao, nagulimekda a masmasdaaw iti insungbatna.

²⁷Napan ken ni Jesus ti sumagmamano a Saduceo. (Isuda dagiti agkuna a saan nga agungar dagiti natay.)

²⁸“Maestro,” kinunada, “insurat ni Moises daytoy a linteg kadatayo: ‘No matay ti maysa a lalaki ket mapanawanna ti asawana nga awan anakda, rebbeng ti kabsatna nga asawaen ti balo tapno aganakda iti pannakaanak daydi natay.’

²⁹“Adda idi pito a lallaki nga agkakabsat. Nangasawa ti inauna, ngem natay nga awan putotna.

³⁰Ti maikadua inasawana ti balo,

³¹kasta met ti maikatlo. Kasta ti inaramid dagiti pito nga agkakabsat ket natayda amin nga awanan anak.

³²Kamaudiananna, natay ti babai.

³³“Ita, inton agungar dagiti natay, siasino kadakuada ti akin-asawa kenkuana? Ta nakiasawada amin kenkuana!”

³⁴Insungbat ni Jesus, “Agaassawa dagiti lallaki ken babbai iti daytoy a biag.

³⁵Ngem saan nga agaassawa dagiti maikari nga agungar iti masakbayan.

³⁶Maipadadanto kadagiti angheles a saandan a matay. Annak ida ti Dios agsipud ta nagungardan.

³⁷“Paneknekan ni Moises a mapagungarto dagiti natay. Iti paset ti Nasantoan a Surat a pakasaritaan ti sumsumged a kayo, kunana a ti Apo isu ti ‘Dios ni Abraham, Dios ni Isaac, ken Dios ni Jacob.’

³⁸Kayat a sawen daytoy nga isu ti Dios dagiti sibibiag, saan a Dios dagiti natay, ta iti biang ti Dios, sibibiag amin a tao.”

³⁹Kinuna ti sumagmamano a mamaestro iti Linteg, “Nasayaat, Maestro, ti insungbatmo!”

⁴⁰Ta dida maitureden ti agsaludsod kenkuana.

⁴¹Kalpasanna, kinuna ni Jesus kadakuada, “Kasano a makuna nga agtaud ti Cristo iti kaputotan ni David?

⁴²Ta kuna met laeng ni David iti libro dagiti Salmo: ‘Kinuna ti Apo iti Apok: Agtugawka ditoy makannawanko

⁴³Agingga a payatem dagiti kabusormo ket addada iti babaem.’

⁴⁴“No ‘Apo’ kuna kenkuana ni David, kasano ngarud nga agtaud ti Cristo iti kaputotan ni David?”

⁴⁵Bayat ti panagdengngeg dagiti tattao, kinuna ni Jesus kadagiti adalanna,

⁴⁶“Annadanyo dagiti mamaestro iti Linteg. Magustoanda ti magna a sikakawes iti nagayad ken makabkablaawan a siraraem iti publiko. Pilienda dagiti kangrunaan a tugaw kadagiti sinagoga ken katan-okan a lugar iti fiestaan.

⁴⁷Gundawayanda dagiti balo a babbai ket takawenda dagiti sanikuada sada ipakita ti atiddog a panagkararagda. Nadagdagsento ti dusada.”