Read Iloko Luke 21 Bible Online

Luke 21 - Iloko bible

Luke 21

¹Inwaras ni Jesus dagiti matana ket nakitana dagiti babaknang nga agipispisok iti kuarta a datonda idiay Templo.

²Nakitana met ti maysa a nakapangpanglaw a babai a balo a nangipisok iti dua a sentimo.

³“Ibagak kadakayo,” kinuna ni Jesus, “ad-adu ti intinnag daytoy napanglaw a balo ngem iti isuamin nga intinnag dagiti dadduma.

⁴Ta indatonda ti sobra ti kinabaknangda. Ngem isu a balo, nupay napanglaw, intedna ti amin a pagbiagna.”

⁵Pagsasaritaan idi ti sumagmamano kadagiti tattao ti kinapintas ti Templo gapu kadagiti agkakapateg a batbato ken sagsagut a naidaton iti Dios.

⁶“Makitayo amin dagitoy,” kinuna ni Jesus. “Dumtengto ti tiempo nga awanto ti uray maysa a bato ditoy a mabati iti yanna. Marbadanto amin!”

⁷“Maestro,” sinaludsodda ken ni Jesus, “kaanonto a mapasamak daytoy? Ken anianto ti pakakitaan a dimtengen ti tiempo a pannakaaramidna?”

⁸“Agannadkayo ket saankayo a paallilaw,” kinuna ni Jesus. “Adunto dagiti umay ket aramatenda ti naganko a kunkunada, ‘Siak ti Cristo,’ ken ‘Asidegen ti tiempo!’ Ngem diyo patpatien ida.

⁹Dikay agbuteng no madamagyo nga adda dagiti gubat ken riribuk. Masapul a mapasamak nga umuna dagitoy, ngem dina kayat a sawen nga asidegen ti panungpalan.”

¹⁰Kinunana pay, “Aggugubatto dagiti nasnasion. Agririnnautto dagiti pagarian.

¹¹Addanto dagiti nakaam-amak a ginggined, panagbisin ken angol kadagiti nadumaduma a disso, ket iti tangatang agparangto dagiti nakabutbuteng a banag ken nakaskasdaaw a pagilasinan.

¹²“Ngem sakbay a mapasamak dagitoy, tiliwendakayto dagiti tattao ket idadanesdakayto. Maidarumkayto ket mausigkayto iti uneg dagiti sinagoga, ket maibaludkayto. Gapu kaniak, maisaklangkayto kadagiti ar-ari ken agtuturay.

¹³Daytanto ti gundawayyo a mangipakaammo iti Naimbag a Damag.

¹⁴Imulayo iti panunotyo: Diyo pagdanagan no anianto ti isungbatyo.

¹⁵Ta siakto met laeng ti mangted kadakayo kadagiti sao ken sirib a dinto masuppiat wenno masungbatan dagiti kabusoryo.

¹⁶Yawatdakayto dagiti nagannak kadakayo, dagiti kakabsatyo, dagiti kakabagianyo, dagiti gagayyemyo. Papatayendanto ti sumagmamano kadakayo.

¹⁷Guraendakayto dagiti amin a tattao gapu kaniak,

¹⁸ngem awanto ti uray maysa laeng a buok a mapukaw iti uloyo.

¹⁹Babaen iti panagibturyo, maisalakanyonto dagiti bagbagiyo.”

²⁰“Inton makitayo ti Jerusalem a linakub dagiti armada, ammoyon nga asidegen ti pannakadadaelna.

²¹Iti kasta, masapul a kumamang dagiti adda idiay Judea kadagiti bambantay. Masapul a pumanaw dagiti adda iti siudad, ket dagiti adda iti away saandan a sumrek sadiay.

²²Ta dagitoy ‘Dagiti Aldaw ti Pannakadusa,’ tapno matungpal ti amin a kuna ti Nasantoan a Surat.

²³Kaasinto dagiti masikog ken dagiti tagtagibian kadagita nga aldaw! Dumtengto ti nakabutbuteng a didigra iti daytoy a daga, ket agdissuorto ti pungtot ti Dios kadagitoy a tattao.

²⁴Addanto dagiti mapapatay iti kampilan ket maipanto ti dadduma a kas balud kadagiti amin a pagilian. Baddebaddekento dagiti Hentil ti Jerusalem, agingga iti panagpatingga dagiti aldaw dagiti Hentil.”

²⁵“Addanto dagiti nakaskasdaaw a pagilasinan iti init, iti bulan ken dagiti bituen. Ditoy daga, masikoranto dagiti nasion gapu iti butengda iti daranudor ti baybay ken kadagiti dalluyon.

²⁶Matalimudawto dagiti tattao iti butengda bayat ti panagurayda iti mapasamak iti entero a lubong, ta mawarawaranto dagiti pannakabalin ti tangatang.

²⁷Kalpasanna, agparangto ti Anak ti Tao nga umay iti ulep agraman naindaklan a pannakabalin ken dayag.

²⁸Inton mangrugi dagitoy a mapasamak, tumakder ken tumangadkayo, ta asidegen ti pannakaisalakanyo.”

²⁹Kalpasanna, sinarita ni Jesus kadakuada daytoy a pangngarig. “Laglagipenyo ti kayo nga igos ken dagiti amin a kayo.

³⁰Apaman a makitayo a mangrugi nga agbulongda, ammoyo nga agbaliwen ti panawen.

³¹Kasta met nga inton makitayo a mapasamak dagitoy, ammoyo nga asidegen ti Pagarian ti Dios.

³²“Tandaananyo a mapasamakto amin dagitoy sakbay a matay dagiti amin a tattao a sibibiag ita.

³³Mapukawto ti langit ken daga, ngem dinto mapukaw dagiti saok.”

³⁴“Agannadkayo amangan no malmeskay iti nalabes a panagragragsak, pannangan, ken panaginum ken kadagiti pakasikoran ti biag, amangan no kellaat a dumteng dayta nga Aldaw ket tiliwennakayo

³⁵a kas iti palab-og. Ta umayto dayta nga aldaw kadagiti amin a tattao iti amin a lugar ditoy daga.

³⁶Agsalukagkayo ket agkararagkayo a kankanayon tapno addanto naan-anay a kiredyo nga agibtur kadagiti amin a mapasamak, ken agtakder iti sangoanan ti Anak ti Tao.”

³⁷Inaldaw a mangisuro ni Jesus idiay Templo ket no dumteng ti rabii, rummuar a mapan maturog idiay Bantay Olivo.

³⁸Iti agsapa, mapan dagiti tattao idiay Templo tapno agdengngegda kenkuana.