Read Iloko Luke 22 Bible Online

Luke 22 - Iloko bible

Luke 22

¹Umasideg idin ti Fiesta ti Tinapay nga awan Lebadurana, a maawagan iti Paskua.

²Nagbirbirok dagiti panguloen a papadi ken dagiti mamaestro iti Linteg iti pamuspusanda a mangpapatay ken Jesus iti nalimed. Mabutengda ngamin kadagiti tattao.

³Sinerrek ni Satanas ni Judas a managan Iscariote, maysa kadagiti sangapulo ket dua nga adalan.

⁴Iti kasta, napan nakisao ni Judas kadagiti panguloen a papadi ken kadagiti ofisiales dagiti guardia ti Templo tapno makitulag no kasano ti panangyawatna ken ni Jesus kadakuada.

⁵Naragsakanda ket inkarida nga ikkan iti kuarta.

⁶Immanamong ni Judas ket inrugina ti nagbirok iti nasayaat a gundaway a panangyawatna ken ni Jesus kadakuada a di maam-ammoan dagiti tattao.

⁷Dimteng ti aldaw ti Fiesta ti Tinapay nga awan Lebadurana a pannakaisagana dagiti urbon a karnero a maidaton iti Paskua.

⁸Imbaon ni Jesus da Pedro ken Juan. “Inkay isagana ti pangrabiitayo iti Paskua,” kinunana kadakuada.

⁹“Sadino ti kayatmo a pangisaganaanmi?” sinaludsodda.

¹⁰“Denggenyo!” kinunana. “Apaman a sumrekkay iti siudad, sabtennakayto ti maysa a lalaki a nakaawit iti sangakaramba a danum. Surotenyo iti balay a serkanna,

¹¹ket kunayo iti akimbalay, ‘Pasaludsod ti Maestro no sadino ti kuarto a panganandanto kadagiti adalanna iti pangrabii iti Paskua.’

¹²Ipakitananto ti akingngato a kuarto a dakkel ken addaan amin a masapsapul. Sadiay ti pagsaganaanyo.”

¹³Napanda ngarud ket nasarakanda amin nga imbaga ni Jesus. Insaganada ti pangrabii a pangrambak iti Paskua.

¹⁴Dimteng ti oras ket simmango ni Jesus ken dagiti apostolesna iti panganan.

¹⁵“Tinarigagayak unay ti makisango kadakayo iti daytoy a pangrabii iti Paskua sakbay nga agsagabaak,” kinunana kadakuada.

¹⁶“Ta ibagak kadakayo a diakton mangan iti daytoy agingga a matungpal ti pudno a kaipapananna iti Pagarian ti Dios.”

¹⁷Nangala iti kopa, nagyaman iti Dios, ket kinunana, “Alaenyo daytoy ket pagbibingayanyo.

¹⁸Ibagak kadakayo a manipud ita, diakton uminum iti daytoy tubbog ti ubas agingga a dumteng ti Pagarian ti Dios.”

¹⁹Nangala met iti tinapay ket kalpasan ti panagyamanna iti Dios, pinisina sana inted kadakuada a kunana, “Daytoy ti bagik a maited nga agpaay kadakayo. Aramidenyo daytoy a panglaglagip kaniak.”

²⁰Kasta met a kalpasan ti panangrabii, intedna kadakuada ti kopa ket kinunana, “Daytoy ti kopa ti baro a pannakitulag ti Dios kadakayo a mapatalgedan iti darak a maibuyat para kadakayo.

²¹“Ngem kitaenyo! Adda ditoy a kalanglanglangko ti tao a mangliput kaniak.

²²Matayto ti Anak ti Tao kas inkeddeng ti Dios, ngem asi pay dayta a tao a mangliput kenkuana!”

²³Nagsisinnaludsod dagiti apostoles no siasino kadakuada ti mangaramid iti kasta.

²⁴Nagsusuppiat dagiti adalan no siasino kadakuada ti mabigbig a kangrunaan.

²⁵Kinuna ni Jesus kadakuada, “Adipenen dagiti ar-ari a Hentil dagiti tattaoda, ket panaganan dagiti agtuturay dagiti bagbagida a kas managparabur.

²⁶Ngem saan a kasta koma kadakayo, no di ket agbalin ti kangrunaan kadakayo a kasla isu ti kaubingan, ket agbalin ti pangulo a kasla isu ti adipen.

²⁷Siasino aya ti naturturay, ti sumango iti panganan wenno ti mangserbi kenkuana? Saan aya a ti maserbian? Ngem addaak kadakayo a kas maysa nga agserbi.

²⁸“Nagtalinaedkayo a sipupudno kaniak kadagiti amin a nakasuotak.

²⁹Ngarud, kas iti pannangted kaniak ni Amak iti kalintegan nga agturay, itedkonto met kadakayo ti isu met laeng a kalintegan.

³⁰Mangan ken uminumkayto iti lamisaanko iti Pagariak ken agtugawkayo kadagiti trono a mangituray kadagiti sangapulo ket dua a tribu ti Israel.”

³¹“Simon, Simon, denggem! Napalubosan ni Satanas a mangsagat kadakayo a kas iti mannalon a mangitaep iti trigo tapno mapaglasin ti naimbag iti dakes.

³²Ngem inkarkararaganka, Simon, tapno saan a mapukaw ti pammatim. Inton agsublika kaniak, masapul a papigsaem dagiti kakabsatmo.”

³³“Apo,” insungbat ni Simon, “sisasaganaak a maibalud ken matay a maikuyog kenka.”

³⁴“Ibagak kenka, Pedro,” kinuna ni Jesus, “dinto pay agtaraok ti kawitan ita nga aldaw, namitlonton nga imbagam a dinak am-ammo.”

³⁵“Idi imbaonkayo nga awan intugotyo a supot wenno bay-on wenno sapatosyo,” kinuna ni Jesus kadakuada, “adda aya aniaman a nagkuranganyo?” “Awan,” insungbatda.

³⁶“Ngem ita,” kinuna ni Jesus, “ti siasinoman nga adda supotna, alaenna, kasta met ti bay-onna. Ti awan kampilanna, ilakona ti kagayna ket gumatang.

³⁷Ta ibagak kadakayo a masapul a matungpal kaniak ti kuna ti Nasantoan a Surat: ‘Ket naibilang kadagiti kriminal.’ Wen, umasidegen ti pannakatungpal ti naisurat maipapan kaniak.”

³⁸“Adtoy ti dua a kampilan, Apo!” kinuna dagiti adalan. “Isunan!” insungbat ni Jesus.

³⁹Rimmuar ni Jesus iti siudad, ket kas ugalina, napan idiay Bantay Olivo; kimmuyog kenkuana dagiti adalan.

⁴⁰Idi makagteng iti disso a pappapananna, kinunana kadakuada, “Agkararagkayo tapno dikayo masulisog.”

⁴¹Immadayo kadakuada iti sumagmamano a metro, sa nagparintumeng ket nagkararag.

⁴²“Ama,” kinunana, “no pagayatam, yadayom kaniak daytoy a kopa ti panagsagaba. Ngem saan a ti pagayatak ti maaramid, no di ket ti pagayatam.”

⁴³

⁴⁴

⁴⁵Kalpasan ti panagkararagna, timmakder ket napan iti ayan dagiti adalan. Nadanonna ida a matmaturog, ta nautoyanda iti nakaro a ladingit.

⁴⁶“Apay a matmaturogkayo?” kinunana kadakuada. “Bumangonkayo ket agkararagkayo tapno saankayo a matnag iti sulisog.”

⁴⁷Agsasao pay laeng ni Jesus idi sumangpet ti adu a tattao. Impanguloan ida ni Judas a maysa kadagiti sangapulo ket dua nga adalan. Immasideg ken ni Jesus tapno agkanna,

⁴⁸ngem kinuna ni Jesus: “Judas, liputam aya ti Anak ti Tao babaen iti agek?”

⁴⁹Idi makita dagiti adalan a kimmuyog ken Jesus no ania ti mapasamak, kinunada, “Apo, makitinnagbatkamin?”

⁵⁰Maysa kadakuada ti nangtagbat iti adipen ti Kangatoan a Padi. Napingasan ti makannawan a lapayag ti adipen.

⁵¹Ngem kinuna ni Jesus, “Isardengyon!” Sinagidna ti lapayag ti adipen ket pinaimbagna.

⁵²Kalpasanna, kinuna ni Jesus kadagiti panguloen a papadi, kadagiti ofisiales dagiti guardia iti Templo ken kadagiti panglakayen a napan nangtiliw kenkuana: “Masapul kadi nga agtagikampilan ken agtagipang-orkayo nga umay mangtiliw kaniak? Tulisanak aya?

⁵³Inaldaw a nakipulpulapolak kadakayo idiay Templo, ngem didak inan-ano. Nupay kasta, daytoyen ti orasyo—ti oras a panagturay ti sipnget.”

⁵⁴Tiniliwda ni Jesus ket impanda iti balay ti Kangatoan a Padi. Sumarsaruno ni Pedro ngem adda iti adayo.

⁵⁵Adda paginudoan iti tengnga ti paraangan ti balay, ket nakitugaw ni Pedro kadagiti agin-inudo iti lawlaw ti apuy.

⁵⁶Idi mabigbig ti maysa a babai nga adipen a ni Pedro ti maysa kadagiti agin-inudo, pinerrengna sana kinuna, “Nakikadkadua met daytoy a tao ken ni Jesus!”

⁵⁷“Babai, diak am-ammo dayta a tao!” inlibak ni Pedro.

⁵⁸Iti saan a nabayag, nailasin met ti maysa a lalaki. “Maysaka met kadakuada,” kinunana ken Pedro. Ngem simmungbat ni Pedro, “Saanko a kadua ida!”

⁵⁹Agarup maysa nga oras ti napalabas idi adda manen lalaki a nangipapilit: “Taga-Galilea met daytoy a tao ket awan duadua a kadua ni Jesus!”

⁶⁰“Diak ammo ti sasawem!” insungbat ni Pedro. Pagammoan, idi agsasao pay laeng ni Pedro, nagtaraok ti maysa a kawitan.

⁶¹Timmaliaw ti Apo ket pinerrengna ni Pedro. Nalagip ni Pedro daydi kinuna ti Apo: “Sakbay nga agtaraok ti kawitan ita nga aldaw, namitlonton nga imbagam a dinak am-ammo.”

⁶²Rimmuar ni Pedro ket nagsangit iti nasaem.

⁶³Kabayatanna, linak-am ni Jesus ti panangrabrabak ken panangkabkabil dagiti mangguguardia kenkuana.

⁶⁴Inabungotanda ket sinaludsodda, “Pugtoam man no siasino ti nangkabil kenka?”

⁶⁵Adu pay ti sinaoda a pangpabpabain kenkuana.

⁶⁶Idi bumigaten, naguummong dagiti panglakayen dagiti Judio, dagiti panguloen a papadi, ken dagiti mamaestro iti Linteg, ket naidatag ni Jesus iti Sanhedrin a pangukomanda.

⁶⁷“Ibagam man kadakami no sika ti Cristo?” kinunada. Ngem insungbat ni Jesus, “No ibagak kadakayo, didakto met la patien.

⁶⁸No agsaludsodak kadakayo, dikayto met la sumungbat.

⁶⁹Ngem manipud ita, agtugaw ti Anak ti Tao iti makannawan ti Dios a Mannakabalin-amin.”

⁷⁰“No kasta, sika ti Anak ti Dios?” kinunada amin. “Dakayo ti agkuna a siak,” insungbatna.

⁷¹“Ania pay la ti pakasapulantayo iti saksi?” kinunada. “Nangngegtayo a mismo ti imbagana.”