Read Iloko Luke 24 Bible Online

Luke 24 - Iloko bible

Luke 24

¹Iti umuna nga Aldaw ti lawas, nakasapsapa a napan dagiti babbai iti tanem ket intugotda dagiti bangbanglo nga insaganada.

²Nadanonda a naitulid ken naikkaten ti bato a nangserra iti ruangan ti tanem,

³isu a simrekda ngem dida nasarakan ti bangkay ni Apo Jesus.

⁴Nagtatakderda sadiay a masmasdaaw gapu iti daytoy. Pagammoan, nagparang iti sibayda ti dua a lallaki a makasisirap ti kawesda.

⁵Iti napalalo a butengda, nagdumogda ngem kinuna dagiti lallaki kadakuada: “Apay a birokenyo kadagiti natay ti tao a sibibiag?

⁶Awan ditoy, ta napagungaren. Lagipenyo nga idi adda idiay Galilea, imbagana kadakayo

⁷a masapul a mayawat ti Anak ti Tao kadagiti managbasol, mailansa iti krus ket agungar iti maikatlo nga aldaw.”

⁸Nalagip dagiti babbai ti sinao ni Jesus.

⁹Pimmanawda iti tanem ket napanda impadamag amin dagitoy kadagiti sangapulo ket maysa nga adalan ken kadagiti dadduma pay a kakaduada.

¹⁰Da Maria Magdalena, Juana ken Maria nga ina ni Santiago ken dadduma pay a babbai ti nangipadamag kadagitoy kadagiti apostoles.

¹¹Ngem impagarup dagiti apostoles a sarsarita laeng ti imbaga dagiti babbai, ket dida namati kadakuada.

¹²

¹³Iti dayta met la nga aldaw, magmagna ti dua nga adalan a mapan iti maysa a barrio a managan Emaus. Nasurok a sangapulo ket maysa a kilometro ti kaadayo ti Emaus manipud Jerusalem.

¹⁴Sarsaritaenda dagiti amin a napasamak.

¹⁵Kabayatan ti panagsarsaritada, immasideg ni Jesus ket nakikuyog kadakuada.

¹⁶Nakitada ngem kasla nakullaapan dagiti matada ket dida nailasin ni Jesus.

¹⁷“Ania ti pagsarsaritaanyo bayat ti pannagnayo?” kinuna ni Jesus. Nagsardengda a malidlidayan.

¹⁸“Sikan sa laeng ti sangaili iti Jerusalem a di makaammo kadagiti napaspasamak sadiay kadagiti napalabas nga aldaw!” kinuna ti maysa nga agnagan Cleofas.

¹⁹“Ania a napaspasamak?” sinaludsod ni Jesus. “Dagiti naaramid ken ni Jesus a taga-Nazaret,” insungbatda. “Maysa a profeta daytoy a tao nga imbilang ti Dios ken amin a tattao a mannakabalin iti amin a sao ken aramidna.

²⁰Inyawat dagiti panguloen a papadi ken agtuturaytayo ket naikeddeng a matay iti krus.

²¹Ninamnamami nga isu ti mangwayawaya iti Israel! Wen, ket saan la a dayta, maikatlo nga aldaw itan manipud pannakapasamak dagitoy.

²²Maysa pay, pinagsiddaawdakami ti sumagmamano kadagiti babbai a kaduami. Sinapsapada ti napan iti tanem,

²³ngem dida kano nasarakan ti bangkayna. Nagsublida a nangipadamag a nagparang pay kadakuada dagiti angheles a nangibaga a sibibiag kano ni Jesus.

²⁴Napan ti sumagmamano kadagiti kakaduami iti tanem ket napaneknekanda a pudno amin ti kinuna dagiti babbai, nupay dida nakita ni Jesus.”

²⁵“Nagnengnengkayon!” kinuna ni Jesus kadakuada. “Nagrigatkayo ketdin a mamati kadagiti sinao dagiti profeta!

²⁶Saan aya a masapul a sagabaen ti Cristo dagitoy, sakbay a sumrek iti gloriana?”

²⁷Ket impalawagna kadakuada dagiti bambanag maipapan kenkuana kas masarakan kadagiti amin a Sursurat manipud kadagiti libro ni Moises ken dagiti sursurat dagiti amin a profeta.

²⁸Idi makaasidegdan iti ili a pagturonganda, impadlaw ni Jesus a kasla adayo pay ti papananna.

²⁹Ngem inggawidda. “Makidaguskan kadakami,” kinunada, “ta sumipngeten.” Iti kasta, nakidagus kadakuada.

³⁰Idi addada iti panganan, innala ni Jesus ti tinapay, binendisionanna, ket pinispisina sana inted kadakuada.

³¹Naluktan ti panagkitada ket nailasindan nga isu ni Jesus. Ngem nagpukaw ni Jesus iti imatangda.

³²Kinunada iti maysa ken maysa, “Isu met la gayam a kasla bumarbara ti riknata itay makisasao kadata iti dalan kabayatan ti panangipalpalawagna kadagiti Sursurat!”

³³Nagrubbuatda a dagus ket nagsublida idiay Jerusalem. Nasarakanda dagiti sangapulo ket maysa nga adalan a naguurnong sadiay agraman dagiti dadduma a kakaduada.

³⁴“Pudno a nagungar ti Apo!” kinunada. “Nagparang ken ni Simon.”

³⁵Impadamag met dagiti dua ti napasamak idi addada iti dalan agraman ti pannakailasinda iti Apo idi pinispisina ti tinapay.

³⁶Madama nga ipadpadamagda dagitoy idi kellaat a nagparang ni Jesus a mismo kadakuada. “Kappia koma ti adda kadakayo,” kinunana kadakuada.

³⁷Napalalo ti buteng ken kigtotda ket impagarupda nga al-alia ti kitkitaenda.

³⁸Iti kasta, kinuna ni Jesus kadakuada, “Apay a mariribukkayo? Apay nga agduaduakayo?

³⁹Kitaenyo dagiti im-ima ken saksakak. Siak a mismo! Sagidendak ket mapaneknekanyo. Awan lasag ken tulang ti espiritu, ngem adda kaniak kas makitayo.”

⁴⁰

⁴¹Dida pay la mamati gapu iti napalalo a ragsak ken siddaawda. Iti kasta, sinaludsod ni Jesus kadakuada, “Awan lat' makan ditoy?”

⁴²Inikkanda iti tinuno nga ikan.

⁴³Inawatna sana kinnan iti imatangda.

⁴⁴Kalpasanna, kinunana kadakuada, “Dagitoy dagiti imbagbagak kadakayo idi addaak pay laeng iti arpadyo. Masapul a matungpal amin a naisurat maipapan kaniak iti Linteg ni Moises, kadagiti sursurat dagiti profeta, ken kadagiti Salmo.”

⁴⁵Linuktanna ti isipda tapno maawatanda dagiti Sursurat ket kinunana kadakuada,

⁴⁶“Daytoy ti naisurat: ‘Masapul nga agsagaba ti Cristo ken agungar iti maikatlo nga aldaw.

⁴⁷Iti naganna, maikasabanto kadagiti amin a nasion, manipud Jerusalem, ti mensahe maipapan ti panagbabawi ken pannakapakawan dagiti basbasol.’

⁴⁸Dakayo ti makasaksi kadagitoy.

⁴⁹Ita, ibaonko kadakayo ti inkari ni Amak. Dikayo ngarud pumampanaw iti siudad agingga iti maawatyo ti pannakabalin nga aggapu sadi langit.”

⁵⁰Kalpasan daytoy, impan ni Jesus dagiti adalanna iti ruar ti siudad. Idi dimtengda idiay Betania, ingngatona dagiti imana sana binendisionan ida.

⁵¹Idi bembendisionanna ida, pimmanaw iti imatangda ket nayuli sadi langit.

⁵²Nagdaydayawda kenkuana ket nagsublida a siraragsak idiay Jerusalem.

⁵³Kanayon nga addada iti Templo nga agdaydayaw iti Dios.