Read Iloko Luke 3 Bible Online

Luke 3 - Iloko bible

Luke 3

¹Maikasangapulo ket lima a tawen idi ti panagturay ni Emperador Tiberio. Ni Poncio Pilato ti gobernador ti Judea. Ni Herodes ti agturay idiay Galilea ket ni kabsatna a Felipe ti agturay iti sakup ti Iturea ken Traconite. Ni Lisanias ti agturay iti Abilene.

²Da Anas ken Caifas dagiti agdama a Kangatoan a Papadi. Iti dayta a tiempo, dimteng ti sao ti Dios ken ni Juan nga anak ni Zacarias. Adda idi ni Juan idiay let-ang.

³Ngarud, sinursorna ti amin a disso a madalanan ti karayan Jordan. “Agbabawikayo kadagiti basbasolyo, ket pabuniagankayo,” inkaskasabana. “Iti kasta, pakawanen ti Dios dagiti basbasolyo.”

⁴Kas nailanad iti libro ni profeta Isaias: “Idiay let-ang adda mangipukpukkaw: ‘Isaganayo ti dalan ti Apo, Pasayaatenyo ti pagnaanna!

⁵Masapul a magaburan dagiti amin a lungog, Mapasimpa dagiti amin a bantay ken turod, Mapalinteg dagiti killo-killo a dalan, Matarimaan dagiti lasonglasong a kalsada,

⁶Makitanto dagiti amin a tattao ti panangisalakan ti Dios!’”

⁷Nakaad-adu a tattao ti napan ken ni Juan tapno agpabuniagda kenkuana. Kinunana kadakuada, “Dakayo a kaputotan ti karasaen, siasino ti nangibaga a malisianyo ti dandanin dumteng a pannusa ti Dios?

⁸Ipakitayo babaen iti aramidyo a nagbabawikayon kadagiti basbasolyo. Ket diyo kunkuna iti bagiyo: ‘Uray ta nagtaudkam iti kaputotan ni Abraham!’ Ibagak kadakayo a kabaelan ti Dios a pagbalinen dagitoy a bato nga annak ni Abraham!

⁹Naisaganan ti wasay a pangpukan kadagiti kayo agingga iti ramut. Mapukan ket maipuor amin a kayo a di agbunga iti nasayaat.”

¹⁰“Ania ngarud ti masapul nga aramidenmi?” sinaludsod dagiti tattao.

¹¹“Ti addaan iti dua a bado,” insungbat ni Juan, “masapul nga itedna ti maysa iti awanan. Ti addaan kanen, masapul a mangibingay.”

¹²Napan ti sumagmamano nga agsingsingir iti buis tapno agpabuniagda kenkuana. “Maestro,” kinunada, “ania ti aramidenmi?”

¹³“Dikay agsingsingir iti ad-adu ngem iti tumutop,” imbagana kadakuada.

¹⁴“Ket dakami,” sinaludsod met dagiti soldado, “ania ti masapul nga aramidenmi?” “Diyo butbutngen wenno padpadaksen ti siasinoman tapno maalayo ti kuartana. Mapnekkayon iti sueldoyo,” kinunana kadakuada.

¹⁵Dimmakkel ti namnama dagiti tattao. Impapanda a ni Juan ti Cristo.

¹⁶Kinuna ni Juan kadakuada: “Buniagankayo iti danum, ngem sumarsaruno kaniak ti maysa a dakdakkel ti pannakabalinna ngem siak. Diak pay maikari a mangwarwar iti sandaliasna. Buniagannakayto iti Espiritu Santo ken apuy.

¹⁷Adda kenkuana ti bigao a pangtaepna iti irik. Urnongen ken idulinnanto ti irik iti kamaligna. Ngem puorannanto ti taep iti apuy a di maiddep.”

¹⁸Kastoy ken dadduma pay a balakad ti imbagbaga ni Juan kadagiti tattao iti panangikasabana kadakuada iti Naimbag a Damag.

¹⁹Ngem binabalawna ni gobernador Herodes iti panangikabbalayna ken ni Herodias nga asawa ni kabsatna, ken gapu kadagiti adu a kinadakes nga inar-aramidna.

²⁰Mainayon pay kadagiti inaramidna ti panangpaibaludna ken ni Juan.

²¹Kalpasan ti pannakabuniag dagiti amin a tattao, nabuniagan met ni Jesus. Idi agkarkararag, naluktan ti langit,

²²ket bimmaba kenkuana ti Espiritu Santo a kas maysa a kalapati. Adda timek a naggapu sadi langit. “Sika ti dungdungngoek nga Anakko,” kinunana. “Maay-ayoak unay kenka.”

²³Agtallopulo ti tawen ni Jesus idi rugianna ti trabahona. Imbilang dagiti tattao nga isu ti anak ni Jose, nga anak ni Eli,

²⁴nga anak ni Matat, nga anak ni Levi, nga anak ni Melki, nga anak ni Jane, nga anak ni Jose,

²⁵nga anak ni Matatias, nga anak ni Amos, nga anak ni Nahum, nga anak ni Esli, nga anak ni Nage,

²⁶nga anak ni Maat, nga anak ni Matatias, nga anak ni Semei, nga anak ni Jose, nga anak ni Juda,

²⁷nga anak ni Joana, nga anak ni Resa, nga anak ni Zorobabel, nga anak ni Sealtiel, nga anak ni Neri,

²⁸nga anak ni Melki, nga anak ni Adi, nga anak ni Cosam, nga anak ni Elmadam, nga anak ni Er,

²⁹nga anak ni Josue, nga anak ni Eliezer, nga anak ni Jorim, nga anak ni Matat, nga anak ni Levi,

³⁰nga anak ni Simeon, nga anak ni Juda, nga anak ni Jose, nga anak ni Jonan, nga anak ni Eliakim,

³¹nga anak ni Melea, nga anak ni Mena, nga anak ni Matata, nga anak ni Natan, nga anak ni David,

³²nga anak ni Jesse, nga anak ni Obed, nga anak ni Booz, nga anak ni Salmon, nga anak ni Naason,

³³nga anak ni Aminadab, nga anak ni Armi, nga anak ni Arni, nga anak ni Esron, nga anak ni Fares, nga anak ni Juda,

³⁴nga anak ni Jacob, nga anak ni Isaac, nga anak ni Abraham, nga anak ni Tare, nga anak ni Nacor,

³⁵nga anak ni Serug, nga anak ni Ragau, nga anak ni Peleg, nga anak ni Heber, nga anak ni Selah,

³⁶nga anak ni Cainan, nga anak ni Arfaxad, nga anak ni Sem, nga anak ni Noe, nga anak ni Lamec,

³⁷nga anak ni Matusalem, nga anak ni Enoc, nga anak ni Jared, nga anak ni Mahalaleel, nga anak ni Cainan,

³⁸nga anak ni Enos, nga anak ni Set, nga anak ni Adan, nga anak ti Dios.