Read Iloko Luke 4 Bible Online

Luke 4 - Iloko bible

Luke 4

¹Napno ni Jesus iti Espiritu Santo idi aggapu idiay Jordan ket inturong ti Espiritu idiay let-ang.

²Sinulisog sadiay ti Diablo iti uneg ti uppat a pulo nga aldaw. Kabayatan dayta a tiempo, pulos a saan a nangnangan ni Jesus isut' gapuna a nabisinan kalpasanna.

³“No sika ti Anak ti Dios,” kinuna ti Diablo, “bilinem nga agbalin a tinapay daytoy a bato.”

⁴“Kuna ti Nasantoan a Surat,” insungbat ni Jesus, “‘Saan laeng a tinapay ti pagbiag ti tao.’”

⁵Kalpasan daytoy, inturong ti Diablo ni Jesus iti nangato a disso ket iti apagdarikmat impakitana kenkuana dagiti amin a pagarian ti lubong.

⁶“Itedkonto kenka amin dagitoy a pannakabalin ken dagitoy a kinabaknang,” kinuna ti Diablo. “Nayawatda amin kaniak ket mabalinko nga ited iti siasinoman a kayatko a pangtedan.

⁷Ngarud, no agrukbabka kaniak, kukuamto amin dagitoy.”

⁸“Kuna ti Nasantoan a Surat: ‘Agdayawka iti Apo a Diosmo ket isu laeng ti pagserbiam,’” insungbat ni Jesus.

⁹Kamaudianna, impan ti Diablo ni Jesus idiay Jerusalem ket pinagtakderna iti kangatoan a paset ti Templo sana kinuna kenkuana, “No Anaknaka ti Dios, tumapuakka man.

¹⁰Ta kuna ti Nasantoan a Surat: ‘Bilinento ti Dios dagiti anghelesna a mangaywan kenka.’

¹¹Kunana pay: ‘Tapayaendakanto tapno uray dagiti sakam saan a madunor iti bato.’”

¹²Insungbat ni Jesus, “Kuna ti Nasantoan a Surat: ‘Dimo sulisogen ti Apo a Diosmo.’”

¹³Idi naaramiden ti Diablo ti amin a mabalinna a pangsulisog ken ni Jesus, pinanawanna pay laeng agingga iti dumteng ti sabali a gundaway.

¹⁴Nagsubli ni Jesus idiay Galilea nga adda kenkuana ti pannakabalin ti Espiritu Santo. Nagwaras ti damag maipapan kenkuana iti amin a masakupan dayta a lugar.

¹⁵Nangisursuro iti uneg dagiti sinagoga, ket dinaydayaw dagiti amin a tattao.

¹⁶Napan ni Jesus idiay Nazaret, ti ili a dimmakkelanna. Kas kadawyanna iti Aldaw a Panaginana, simrek iti sinagoga. Timmakder a mangbasa iti Nasantoan a Surat,

¹⁷ket nayawat kenkuana ti libro ni profeta Isaias. Inukradna ti nalukot a pagbasaan ket nasarakanna ti paset a nakaisuratan dagitoy sumaganad:

¹⁸“Adda kaniak ti Espiritu ti Apo. Pinilinak a mangikasaba iti Naimbag a Damag kadagiti napanglaw, Imbaonnak a mangiwaragawag iti pannakawayawaya dagiti balud, Iti pannakakita manen dagiti bulsek, Iti pannakaruk-at dagiti maparparigat,

¹⁹Ken mangipakaammo a dimtengen ti tiempo a panangsubbot ti Apo kadagiti tattaona.”

²⁰Linukot ni Jesus ti pagbasaan, inyawatna iti agserserbi sa nagtugaw. Sikikita kenkuana dagiti adda iti sinagoga

²¹idi kinunana kadakuada, “Ita nga aldaw, natungpalen daytoy a paset ti Nasantoan a Surat a nangngegyo a naibasa.”

²²Dinayaw dagiti amin a tattao, ket nagsiddaawda kadagiti agkakapintas nga imbalikasna. Kinunada, “Saan aya nga isu ti anak ni Jose?”

²³Ngem simmungbat ni Jesus, “Awan duadua nga ibagayo kaniak daytoy a pagsasao: ‘Doktor, agasam ta bagim.’ Kunayo ngata pay: ‘Aramidem ditoy ilim dagiti nadamagmi nga inar-aramidmo idiay Capernaum.’”

²⁴Innayon ni Jesus, “Ibagak kadakayo nga awan profeta a mapadayawan iti ilina met laeng.

²⁵Denggenyo daytoy: Pudno nga adu dagiti balo iti Israel idi tiempo ni Elias. Tallo ket gudua a tawen idi a saan a nagtudo, ket napasamak ti nakaro a bisin iti amin a daga.

²⁶Ngem awan kadakuada ti nakaibaonan ni Elias no di laeng iti maysa a balo idiay Serepta, maysa nga ili idiay Sidon.

²⁷Adu met dagiti agkukutel iti Israel idi tiempo ni profeta Eliseo. Ngem awan kadakuada ti naimbagan malaksid ni Naaman a taga-Siria.”

²⁸Kasta unay ti pungtot dagiti tattao iti sinagoga idi mangngegda daytoy.

²⁹Timmakderda, sada ginuyodguyod ni Jesus nga inruar iti ili. Impanda iti tapaw ti turod a nakabangonan ti ilida tapno itappuakda iti derraas.

³⁰Ngem nagna ni Jesus iti nagbabaetanda ket pimmanaw.

³¹Simmalog ni Jesus idiay Capernaum, maysa nga ili idiay Galilea. Nangisuro kadagiti tattao iti Aldaw a Panaginana.

³²Nasdaawda amin iti panangisurona agsipud ta naturay ti panagsaona.

³³Iti sinagoga, adda lalaki a linuganan ti dakes nga espiritu. Nagikkis iti napigsa.

³⁴“Ania ti kayatmo kadakami, Jesus a taga-Nazaret?” kinunana. “Umaynakami kadi dadaelen? Am-ammoka! Sika ti Nasantoan nga imbaon ti Dios.”

³⁵Binilin ni Jesus ti espiritu. “Agulimekka,” kinunana, “ket rummuarka iti dayta a tao!” Tinumba ti demonio ti tao iti sangoananda amin ket rimmuar kenkuana a dina inan-ano.

³⁶Nasdaawda amin ket kinunada iti maysa ken maysa: “Ania dagitoy a saona? Adda turay ken pannakabalinna a mangbilin kadagiti dakes nga espiritu, ket rummuarda!”

³⁷Nagsaknap iti dayta a lugar ti damag maipapan ken ni Jesus.

³⁸Pimmanaw ni Jesus iti sinagoga ket napan iti balay ni Simon. Nakaro idi ti gurigor ti katugangan ni Simon, ket kiniddawda ken ni Jesus a tulonganna ti babai.

³⁹Immasideg ni Jesus iti idda ti masakit ket pinabaawna ti gurigorna. Apaman a naimbagan ti masakit, dagus a bimmangon ket nagserbi kadakuada.

⁴⁰Idi lumlumneken ti init, amin nga adda gagayyemna nga agsagsagaba iti uray ania a kita ti sakit, impanda dagitoy a masakit ken ni Jesus. Impatayna ti imana iti tunggal maysa ket naimbaganda amin.

⁴¹Rimmuar met dagiti demonio kadagiti adu a tattao ket inyik-ikkisda: “Sika ti Anak ti Dios!” Ngem inungtan ida ni Jesus. Dina impalubos nga agsaoda ta ammoda nga isu ti Cristo.

⁴²Iti parbangon, pimmanaw ni Jesus iti ili ket napan iti lugar nga awan matagtagitao. Binirbirok dagiti tattao, ket apaman a nasarakanda, kayatda a lapdan ti ipapanawna.

⁴³Ngem kinunana kadakuada, “Nasken nga ipakaammok ti Naimbag a Damag maipapan iti Pagarian ti Dios kadagiti dadduma pay nga ili, ta daytoy ti nangibaonan kaniak ti Dios.”

⁴⁴Nangaskasaba ngarud ni Jesus kadagiti sinagoga iti entero a Judea.