Read Iloko Luke 5 Bible Online

Luke 5 - Iloko bible

Luke 5

¹Iti naminsan, idi agtaktakder ni Jesus iti igid ti Dan-aw ti Genesaret, nagdidinnuron dagiti tattao nga umasideg kenkuana tapno dumngegda iti sao ti Dios.

²Nakitana ti dua a bangka iti igid ti dan-aw a pinanawan dagiti mangngalap a napan nangbuggo kadagiti iketda.

³Limmugan ni Jesus iti maysa kadagiti bangka, ti kukua ni Simon, ket dinawatna kenkuana ipatengngana bassit. Nagtugaw ni Jesus iti bangka ket insurona dagiti tattao.

⁴Kalpasan ti panagsaona, kinunana ken ni Simon: “Ipatengngam ti bangka, ket iwayatyo ti iketyo ta agkalapkayo.”

⁵“Maestro,” insungbat ni Simon, “nagpatpatnagkami a nagkalap. Awan pulos ti naalami. Ngem no kasta ti kunam, iwayatko dagiti iket.”

⁶Inwayatda dagiti iket. Adu ti naalada nga ikan ket dandani la mabsang ti iketda.

⁷Pinayapayanda ngarud dagiti kakaduada iti sabali a bangka tapno mapanda tumulong kadakuada. Napan dagitoy ket kinargaanda dagiti dua a bangka agingga a napnoda iti kasta unay nga ikan ket ngannganidan lumned.

⁸Idi makita ni Simon Pedro ti napasamak, nagparintumeng iti sangoanan ni Jesus ket kinunana, “Apo, adaywannak! Maysaak a managbasol.”

⁹Nasdaaw ni Pedro ken dagiti kakaduana iti kaadu ti nakalapanda.

¹⁰Nasdaaw met da Santiago ken Juan nga annak ni Zebedeo, isuda a kinakuyog ni Simon. “Dika agbuteng, Simon,” kinuna ni Jesus, “manipud ita, tattaonton ti kalapem.”

¹¹Insang-atda dagiti bangka, pinanawanda amin, ket simmurotda ken ni Jesus.

¹²Iti naminsan, adda ni Jesus iti maysa nga ili nga ayan ti maysa a lalaki nga agkukutel. Apaman a nakitana ni Jesus, nagpakleb iti sangoananna ket impukkawna kenkuana, “Apo, no kayatmo, mapaimbagnak.”

¹³Sinagid ni Jesus ti lalaki sana kinuna, “Kayatko! Umimbagkan.” Ket dagus a naikkat ti sakit ti lalaki.

¹⁴Imbilin ni Jesus kenkuana: “Awan pangibagbagaam iti daytoy, ngem inka agparang a dagus iti padi tapno kitaennaka. Kalpasanna, iruknoymo ti daton nga imbilin ni Moises a pammaneknekmo kadagiti tattao nga immimbagkan.”

¹⁵Immad-adda ketdi a nagdinamag ni Jesus. Napan ti nakaad-adu a tattao nga agdengngeg kenkuana ken agpaagas kadagiti saksakitda.

¹⁶Ngem masansan nga agpakni ni Jesus kadagiti disso nga awan matagtagitao tapno agkararag.

¹⁷Iti maysa nga aldaw, idi mangisursuro ni Jesus, agtutugaw sadiay ti sumagmamano a Fariseo ken mamaestro iti Linteg. Naggapuda kadagiti amin nga il-ili iti Galilea ken Judea, agraman Jerusalem. Adda ken ni Jesus ti pannakabalin ti Apo a mangpaimbag kadagiti masaksakit.

¹⁸Napan kenkuana ti sumagmamano a lallaki a nangyeg iti maysa a paralitiko a nakaidda iti papag. Iserrekda koma ti lalaki iti uneg ti balay tapno ipanda iti sango ni Jesus.

¹⁹Ngem gapu iti kaadu ti tao, saanda a maiserrek ti paralitiko. Napanda ngarud iti tuktok ti balay, binutbotanda ti atep, ket imbabada a nakaidda iti papag sada indisso iti tengnga dagiti tattao iti sangoanan ni Jesus.

²⁰Idi makita ni Jesus ti pammatida, kinunana iti paralitiko, “Gayyem, napakawanen dagiti basbasolmo.”

²¹Nagtantanabutob dagiti mamaestro iti Linteg, kasta met dagiti Fariseo, ket kinunkunada: “Apay a kastoy ti panagsao daytoy a tao? Maibusor iti Dios ti sasawenna! Ti laeng Dios ti makapakawan kadagiti basbasol!”

²²Ammo ni Jesus ti kapanunotanda ket kinunana kadakuada, “Apay a kasta ti pampanunotenyo?

²³Ania ti nalaklaka nga isao: ‘Napakawanen dagiti basbasolmo’ wenno ‘Bumangonka ket magnaka’?

²⁴Paneknekak ngarud kadakayo a ti Anak ti Tao adda pannakabalinna ditoy daga a mamakawan kadagiti basbasol.” Kinunana iti paralitiko, “Ibilinko kenka: bumangonka, bagkatem ta iddam, ket agawidkan!”

²⁵Timmakder a dagus ti paralitiko iti imatangda amin, binagkatna ti nagiddaanna ket nagawid a mangidaydayaw iti Dios.

²⁶Anian a siddaawda! Nagbutengda amin a nagdaydayaw iti Dios ket kinunkunada, “Anian a nakaskasdaaw dagiti naimatangantayo ita nga aldaw!”

²⁷Kalpasan daytoy, rimmuar ni Jesus ket nakitana ni Levi, maysa nga agsingsingir iti buis. Agtugtugaw iti ofisinana. Kinuna ni Jesus kenkuana, “Surotennak.”

²⁸Timmakder ni Levi, pinanawanna amin, ket simmurot ken ni Jesus.

²⁹Kas pammadayawna ken ni Jesus, nangisagana ni Levi iti dakkel a padaya idiay balayna. Timmabuno ti adu nga agsingsingir iti buis ken dadduma pay a tattao.

³⁰Nagtantanabutob dagiti Fariseo ken dagiti kakaduada a mamaestro iti Linteg ket kinunada kadagiti adalan ni Jesus, “Apay a kalanglang ken kain-inumyo dagiti agsingsingir iti buis ken dagiti dakes a tattao?”

³¹Simmungbat ni Jesus kadakuada: “Saan a dagiti nasalun-at ti makasapul iti mangngagas no di ket dagiti masaksakit.

³²Saanak nga immay tapno ayabak dagiti nalinteg ngem immayak agayab kadagiti managbasol ket iti kasta agbabawida.”

³³Kinuna ti sumagmamano a tattao ken ni Jesus: “Masansan nga agayunar ken agkararag dagiti adalan ni Juan, kasta met dagiti adalan dagiti Fariseo; ngem mangan ken uminum dagiti adalam.”

³⁴Simmungbat ni Jesus: “Mabalin aya a di mangan dagiti makiboda no adda ti nobio iti arpadda? Saan a mabalin!

³⁵Ngem dumtengto ti tiempo a maipanaw ti nobio kadakuada ket isunton ti panagayunarda.”

³⁶Sinarita pay ni Jesus kadakuada daytoy a pangngarig: “Awan ti tao a mangala iti baro a lupot tapno itakupna iti daan a pagan-anay. No kasta ti aramidenna, dadaelenna ti baro a kawes ket saan pay a maibagay iti nakaitakupanna.

³⁷Awan met mangikabil iti baro nga arak iti daan a supot a lalat. No kasta ti aramidenna, bettakento ti baro nga arak ti supot, maibelleng ti arak ken madadael ti supot.

³⁸Saan! Masapul nga ikarga ti baro nga arak iti baro a supot a lalat.

³⁹Ket ti nakaraman iti baak nga arak, dina pagan-ano ti uminum iti baro. Ta kunana: ‘Naim-imas ti baak.’”