Read Iloko Deuteronomy 11 Bible Online

Deuteronomy 11 - Iloko bible

Deuteronomy 11

¹Kinuna ni Moises, “Ayatenyo ngarud ti Apo a Diosyo ket kanayon a tungpalenyo dagiti bilin, annuroten ken lintegna.

²Lagipenyo ita nga aldaw ti nasursuroyo maipapan iti Apo babaen kadagiti padpadasyo kenkuana. Dakayo a saan ket a dagiti annakyo ti nagpasar kadagitoy a padpadas. Nakitayo ti kinatan-ok ti Apo, ti bilegna, ken ti pannakabalinna.

³Nakitayo dagiti pagilasinan ken milagro nga inaramidna a maibusor iti ari ti Egipto ken ti entero a pagilianna.

⁴Nakitayo ti inaramidna iti armada ti Egipto, agraman dagiti kabalio ken dagiti luganda a pakigubat. Pinukawna ida iti Baybay a Karunoan idi kamkamatendakayo.

⁵Ammoyo ti impaayna kadakayo iti let-ang agingga a simmangpetkayo ditoy.

⁶Lagipenyo ti inaramidna kada Datan ken Abiram, dagiti annak ni Eliab iti tribu ni Ruben. Iti imatang ti amin, nagrengngat ti daga ket inalun-onna ida, agraman dagiti familiada, dagiti toldada ken amin a tagabu ken animalda.

⁷Nakitayo a mismo dagiti naindaklan a banag nga inaramid ti Apo.”

⁸“Tungpalenyo dagiti amin nga imbilinko kadakayo ita nga aldaw tapno maaddaankayo iti pigsa a mangsakup iti daga a papananyo.

⁹Ket napautto ti panagbiagyo iti nabaknang ken nadam-eg a daga nga inkari ti Apo nga ited kadagidi kapuonanyo ken kadagiti kaputotanda.

¹⁰Saan a kas iti Egipto a nagnaedanyo ti daga nga inkay tagikuaen. Sadiay, no agmulakayo idi, adu a rigatyo a mangpadanum kadagiti talon.

¹¹Ngem kabambantayan ken tantanap ti sakupenyo a daga. Kankanayon nga agtudo sadiay.

¹²Tartaripatoen ti Apo a Diosyo daytoy a daga ken ay-aywananna iti amin nga aldaw ti tawen.

¹³“No pudno a tungpalenyo dagiti imbilinko kadakayo ita nga aldaw; no ayatenyo ti Apo a Diosyo ken agserbikayo kenkuana iti amin a puso ken kararuayo,

¹⁴yegnanto ti tudo iti dagayo iti tiempo a pannakasapulna ket nabuslonto ti apityo a trigo, arak ken lana ti olibo.

¹⁵Paraburannanto dagiti talonyo iti ruruot nga araben dagiti animalyo ket mangan ken mapnekkayto

¹⁶ngem agannadkayo amangan no maallilawkayo ket paglikudanyo ti Apo tapno agdaydayaw ken agserbikayo kadagiti didiosen.

¹⁷No aramidenyo daytoy, sumgedto ti pungtot ti Apo. Awanto ti tudo a yegna, agtikagto ti daga ket awanto ti agtubo a mula. Iti kasta, mataykayto sadiay uray no nasayaat ti daga nga itedna kadakayo.

¹⁸“Imulayo dagitoy a bilin kadagiti puso ken panunotyo. Igalutyo kadagiti takkiagyo ken ikabilyo kadagiti mugingyo a kas palagip.

¹⁹Isuroyo ida kadagiti annakyo. Lagipenyo ida no addakay iti taengyo wenno addakayo iti trabaho, no maturogkayo ken no bumangonkay iti bigat.

²⁰Isuratyo ida kadagiti baotek ti balayyo ken kadagiti ruangan dagiti bakudyo.

²¹No aramidenyo dayta, napautto ti panagbiagyo ken dagiti annakyo iti daga nga inkari ti Apo a Diosyo nga ited kadagidi kapuonanyo.

²²“Tungpalenyo a sipapasnek dagiti amin nga imbilinko kadakayo: Ayatenyo ti Apo a Diosyo; aramidenyo amin nga ibilinna ken agtalinaedkayo a napudno kenkuana.

²³No aramidenyo daytoy, paksiatennanto dagiti tattao apaman a sumungadkayo. Tagikuaenyonto ti daga dagiti tattao nga ad-adu ken nabilbileg ngem dakayo.

²⁴Kukuayonto ti amin a daga a mabaddekanyo; mangruginto ti sakupyo manipud iti let-ang iti abagatan agingga iti Bantay Libano; manipud iti Karayan Eufrates iti daya agingga iti Taaw Mediterranean iti laud.

²⁵Awanto ti makabael a manglapped kadakayo; kabutengdakayto dagiti tattao iti sadinoman a daga a papananyo, kas inkari kadakayo ti Apo a Diosyo.

²⁶“Ita nga aldaw, agpilikayo iti kayatyo: bendision wenno lunod.

²⁷Mabendisionankayo no tungpalenyo dagiti bilin ti Apo a Diosyo; ita nga aldaw, itedko kadakayo ti bendision.

²⁸Ngem mailunodkayo no diyo ipangag dagitoy a bilin ket sumiasikayo tapno agdayawkayo kadagiti didiosen a diyo pay nagdaydayawan.

²⁹Inton ipannakayo ti Apo a Diosyo iti daga a tagikuaenyo, ipukkawyonto ti bendision iti tapaw ti Bantay Gerizim ken ti lunod iti tapaw ti Bantay Ebal.

³⁰Adda dagitoy a bantay iti laud ti Karayan Jordan a sakup dagiti Cananeo nga agnaed iti Araba, a kasumbangir ti Gilgal nga asideg ti lugo ti More.

³¹Bumallasiwkayton iti Karayan Jordan a mangtagikua iti daga nga ited kadakayo ti Apo a Diosyo. Inton agnaedkayon sadiay,

³²tungpalenyo a tungpalen ti amin nga annuroten ken linteg nga itedko kadakayo ita nga aldaw.”