Read Iloko Deuteronomy 12 Bible Online

Deuteronomy 12 - Iloko bible

Deuteronomy 12

¹Kinuna ni Moises, “Dagitoy dagiti annuroten ken linteg a masapul a tungpalenyo bayat ti panagbiagyo iti daga nga ited kadakayo ti Apo a Dios dagidi kapuonanyo.

²Iti daga nga inkay sakupen, dadaelenyonto ti amin a lugar a pagrukrukbaban dagiti tattao kadagiti didiosenda, adda man dagitoy kadagiti nangato a bantay, turod wenno sirok dagiti narukbos a kayo.

³Rakrakenyonto dagiti altarda; burakenyonto dagiti bato nga adigida; puoranyo dagiti simbolo ni Asera a didiosen; balsigenyo dagiti imahenda tapno awanton ti pagrukbabanda kadagita a lugar.

⁴“Dikay agdaydayaw iti Apo a Diosyo a kas iti wagas a panagrukbabda kadagiti didiosenda.

⁵Manipud iti sakup dagiti amin a tribuyo, mangpilinto ti Apo a Diosyo iti maysa a disso a mapan pagdaydayawan kenkuana.

⁶Sadiayto ti pangidataganyo kadagiti datonyo a mapuoran ken dagiti dadduma a datonyo, dagiti apagkapullo, dagiti sagut nga ikariyo iti Apo, dagiti agtaud iti bukodyo a nakem ken dagiti umuna nga anak dagiti baka ken karneroyo.

⁷Sadiay, iti imatang ti Apo a Diosyo a nangbendision kadakayo, mangankayto a sangafamilian ket agrarag-okayo gapu kadagiti paraburna kadakayo.

⁸“Inton dumteng dayta a tiempo, diyonton maaramid ti kaykayatyo a kas iti sigud. Ar-aramiden ti tunggal maysa ti kaykayatna

⁹gapu ta dikay pay simrek iti daga nga ited kadakayo ti Apo a Diosyo, ti daga a mabalinyo a pagnaedan a sikakappia.

¹⁰Inton maballasiwyon ti Karayan Jordan, ipalubosto ti Apo a sakupenyo ti daga ket agnaedkayo sadiay. Ikkannakayto iti kappia ket dinakayto singaen dagiti kabusoryo tapno natalged ti panagbiagyo.

¹¹Mangpilinto ti Apo iti lugar a pagdaydayawan kenkuana. Sadiayto ti pangidataganyo kenkuana iti amin nga imbilinko: dagiti datonyo a mapuoran ken dagiti dadduma a datonyo, dagiti apagkapullo ken dagiti sagutyo, agraman dagiti naisangsangayan a sagut nga ikariyo iti Apo.

¹²Agraragsakkayto sadiay iti imatangna, dakayo ken dagiti annakyo, dagiti adipenyo agraman dagiti Levita nga agnaed iti iliyo. Laglagipenyo nga awan ti naited a daga dagiti Levita.

¹³Ngem dikay agpuor iti daton iti sadinoman a kayatyo a pagpuoran,

¹⁴no di iti lugar a pilien ti Apo a Diosyo iti sakup ti maysa kadagiti tribuyo. Sadiay laeng ti pagidataganyo iti daton a mapuoran ken pangaramidan iti amin nga imbilinko kadakayo.

¹⁵“Nupay kasta, mabalinyo ti agparti iti animal ken agsida iti karnena iti sadinoman a pagnaedanyo. Mabalinyo ti mangan iti kaykayatyo, kas iti panagsidayo iti gasela wenno ugsa. Mabalin ti siasinoman, nadalus man wenno narugit iti imatang ti linteg, ti agsida iti daytoy.

¹⁶Ngem diyo sidaen ti darada; ibellengyo iti daga a kas iti panangibellengyo iti danum.

¹⁷Diyo mabalin a kanen iti iliyo ti aniaman nga idatagyo nga apagkapullo iti Apo; mairaman ditoy ti apagkapullo ti irikyo, ti arakyo ken ti lana ti oliboyo. Saan a sadiay ti pangananyo iti umuna nga anak ti baka ken karneroyo wenno dagiti sagut nga ikariyo kenkuana wenno dagiti sagut a nagtaud iti nakemyo wenno dagiti dadduma a sagut.

¹⁸Mabalinyo laeng a kanen dagitoy iti lugar a pilien ti Apo a Diosyo. Iti imatang ti Apo a Diosyo, mangankayto sadiay—dakayo, dagiti annakyo, dagiti adipenyo ken dagiti Levita nga agnaed iti iliyo. Ket agragsakkayo iti imatang ti Apo iti aniaman nga aramidenyo.

¹⁹Diyo baybay-an dagiti Levita bayat ti panagnaedyo iti dagayo.

²⁰“Inton napalawan ti Apo a Diosyo ti sakupyo a kas inkarina, ket kunayo, ‘Kayatko ti agsida iti karne,’ agsidakayo iti kaykayatyo.

²¹No adayo unay ti lugar a pagdaydayawan, mabalinyo a partien iti uray ania nga oras ti aniaman a baka wenno karnero nga inted kadakayo ti Apo ket agsidakayo iti karne iti balayyo a kas imbagak kadakayo.

²²Mabalin ti siasinoman, nadalus man wenno saan iti imatang ti linteg, ti agsida iti dayta a karne a kas iti panagsidana iti karne ti gasela wenno ugsa.

²³Ngem liklikanyo ti agsida iti dara, gapu ta ti biag adda iti dara ket masapul a diyo sidaen ti biag agraman ti lasag.

²⁴Diyo sidaen ti dara no di ket ibellengyo a kasla iti panangibellengyo iti danum.

²⁵No diyo sidaen ti dara, rumang-aykayto kasta met dagiti kaputotanyo, ta rumbeng ti aramidyo iti imatang ti Apo.

²⁶Idatagyo iti lugar a pagdaydayawan dagiti datonyo ken dagiti inkariyo nga isagut iti Apo.

²⁷Sadiay, puoranyo dagiti animal iti altar ti Apo. Sadiay met ti pangidatonanyo kadagiti animal a masapul a maibukbok ti darada iti altar ket sidaenyo ti karneda.

²⁸Tungpalenyo ti amin nga imbilinko kadakayo tapno kanayonto a narang-aykayo agraman dagiti kaputotanyo, gapu ta aramidenyo ti naimbag ken nasayaat iti imatang ti Apo a Diosyo.”

²⁹“Kalpasan a dinadael ti Apo a Diosyo dagiti nasion a serkenyo ket nasakupyon ti dagada,

³⁰diyo tuladen ida ta daytanto ti pakaipalab-oganyo. Diyo kalikaguman nga ammoen no kasano ti panagdaydayawda kadagiti didiosenda tapno tuladenyo.

³¹Dikay agdaydayaw iti Apo a Diosyo a kas iti panagdaydayawda kadagiti didiosenda. Ngamin, iti panagdaydayawda, aramidenda dagiti amin a makarimon a banag a kagura ti Apo. Puoranda pay dagiti annakda a kas daton kadagiti didiosenda.”

³²“Ikagumaanyo a tungpalen ti amin nga imbilinko kadakayo; diyo nayonan wenno kurangan.