Read Iloko Deuteronomy 14 Bible Online

Deuteronomy 14 - Iloko bible

Deuteronomy 14

¹Intuloy ni Moises, “Dakayo ti annak ti Apo a Diosyo. Diyo sugatsugaten ti bagiyo wenno kiskisan ti mugingyo a kas pagilasinan iti panagminatayyo.

²Ngamin, nasagradoankayo a tattao; kukuanakayo ti Apo a Diosyo. Pinilinakayo kadagiti amin a tattao iti rabaw ti daga tapno agbalinkayo a gamengna.

³“Dikay agsida iti uray ania a narugit iti imatang ti Apo.

⁴Mabalinyo ti agsida kadagitoy nga animal: baka, karnero, kalding,

⁵ugsa, atap a karnero, atap a kalding wenno gasela—

⁶amin nga animal a nagpisi ti kukona ken agngatingat.

⁷Ngem saan a masida ti animal malaksid no agngatingat ken nagpisi ti kukona. Diyo mabalin a sidaen ti kamelio, koneho wenno atap a koneho. Maibilangda a narugit; agngatingatda ngem saan a nagpisi ti kukoda.

⁸Dikay agsida iti baboy. Maibilangda a narugit; nagpisi ti kukoda ngem saanda nga agngatingat. Diyo sidaen ti uray ania kadagitoy nga animal wenno sagiden ti bangkayda.

⁹“Mabalinyo a sidaen ti uray ania a kita ti ikan nga addaan iti pigar ken siksik.

¹⁰Ngem diyo sidaen ti aniaman nga awan ti pigar ken siksikna; maibilangda a narugit.

¹¹“Mabalinyo a sidaen ti uray ania a tumatayab a maibilang a nadalus.

¹²Ngem dagitoy ti kita ti tumatayab a maiparit a sidaenyo: agila, kullaaw, kali, gikgik; lumabaga a buitre, buitre, wak; abestrus; garsita, tikbaboy, kannaway, pelikano, kalamon; abubilia; ken panniki.

¹⁹“Maibilang a narugit ti amin a nagpayak nga insekto; diyo sidaen ida.

²⁰Ngem masidayo ti insekto a maibilang a nadalus.

²¹“Dikay agsida iti animal a natay; ngem mabalin a sidaen dagiti ganggannaet nga agnaed iti iliyo wenno ilako kadakuada. Ta nasagradoankayo a tattao; kukuanakayo ti Apo a Diosyo. “Diyo angren ti urbon a karnero wenno urbon a kalding iti gatas ti inana.”

²²“Mangilasinkayo iti apagkapullo ti amin nga apityo iti tunggal tawen.

²³Inkayo iti lugar a pinili ti Apo a Diosyo a pagdaydayawan kenkuana; sadiay, iti imatangna, kanenyo ti apagkapullo ti trigoyo ken ti umuna nga anak ti baka ken karneroyo ken lak-amenyo ti arak ken lana ti oliboyo. Aramidenyo daytoy tapno masursuroyo ti agbuteng a kanayon iti Apo a Diosyo.

²⁴No adayo unay kadakayo ti lugar a pagdaydayawan ket diyo maawit nga ipan sadiay ti apagkapullo ti apit nga imparabur ti Apo kadakayo,

²⁵ilakoyo ti apityo ket itugotyo ti kuarta iti pagdaydayawan a pinilina.

²⁶Igatangyo ti naglakoanyo iti aniaman a kaykayatyo—karne ti baka, karnero, arak, wenno naingel nga inumen. Agrambakkayo sadiay ket agraragsakkayo iti imatang ti Apo a Diosyo.

²⁷“Diyo liplipatan dagiti Levita nga agnaed kadagiti iliyo; awan ti bukodda a daga.

²⁸Tunggal aggibus ti tallo a tawen, ipempenyo iti iliyo ti apagkapullo ti amin nga apityo.

²⁹Agpaay daytoy kadagiti Levita, isuda nga awanan iti sanikua, dagiti ganggannaet, ulila ken balo a babbai nga agnaed kadagiti iliyo tapno adda umdas a taraonda. Aramidenyo daytoy ket bendisionannakayto ti Apo a Diosyo iti amin nga aramidyo.”