Read Iloko Deuteronomy 2 Bible Online

Deuteronomy 2 - Iloko bible

Deuteronomy 2

¹nagsublitayo ket napantayo idiay let-ang. Nagnatayo iti dalan nga agturong iti Nalabaga a Baybay a kas imbilin ti Apo ket nabayag a nagalla-allatayo iti katurturodan a pagilian ti Edom.

²“Imbaga kaniak ti Apo,

³‘Nabayag unayen nga agalla-allakayo iti daytoy a katurturodan ket agpa-amianankayo.’

⁴Imbagana kaniak nga itedko kadakayo dagitoy a bilin: ‘Dandanikayon lumasat iti katurturodan a pagilian ti Edom, ti sakup dagiti adayo a kabagianyo, dagiti kaputotan ni Esau. Agbutengdanto kadakayo ngem

⁵diyo gubaten ida ta diak ited kadakayo ti uray sangkadisso a paset ti dagada. Intedko ti Edom kadagiti kaputotan ni Esau.

⁶Mabalinyo ti gumatang iti taraon ken danum kadakuada.’

⁷“Laglagipenyo a binendisionannakayo ti Apo a Diosyo iti amin nga inaramidyo. Inaywanannakayo bayat ti panagalla-allayo iti daytoy nalawa a let-ang. Nakikadkadua kadakayo iti daytoy unos ti 40 a tawen ket adda amin a masapulyo.

⁸“Intuloytayo ngarud ti nagna ket pinanawantayo ti dalan nga agturong kadagiti ili ti Elat ken Eziongeber, ti dalan nga agturong iti Natay a Baybay satay nagpa-amianan-a-daya a mapan idiay Moab.

⁹“Ket kinuna ti Apo kaniak, ‘Diyo riribuken dagiti tattao ti Moab, dagiti kaputotan ni Lot. Diyo gubaten ida. Naitedkon kadakuada ti siudad ti Ar ket awan ti uray ania a paset ti dagada ti itedko kadakayo.’” (

¹⁰Adda idi nabileg a puli dagiti higante a nagnaed idiay Ar. Isuda dagiti Emimeo a natatayag a kas kadagiti Anakim a sabali a puli dagiti higante.

¹¹Kas kadagiti Anakim, maawaganda met iti Refaim, ngem awagan ida dagiti Moabita iti Emimeo.

¹²Nagnaed idi dagiti Horeo idiay Edom, ngem pinagtalaw ida dagiti kaputotan ni Esau, dinadaelda ti pagilianda ket nagnaedda iti dagada. Kasta met ti inaramid dagiti Israelita idi pinarmekda dagiti kabusorda ket nagnaedda iti daga nga inted ni Yahweh kadakuada.)

¹³“Kalpasanna, binallasiwtayo ti Karayan Zered kas imbilin ti Apo kadatayo.

¹⁴Tallopulo ket walo a tawenen ti napalabas manipud pimmanawtayo idiay Kades Barnea. Natay aminen dagiti mannakigubat iti dayta a kaputotan kas imbaga ti Apo.

¹⁵Binusbusor ida ti Apo agingga a pinapatayna amin ida.

¹⁶“Kalpasan ti ipapatayda amin,

¹⁷kinuna ti Apo,

¹⁸‘Ita nga aldaw, magnakayo iti Ar iti ilalasatyo iti sakup ti Moab.

¹⁹Asidegkayton iti daga dagiti Ammonita a kaputotan ni Lot. Diyo an-anoen wenno gubaten ida gapu ta diak ited kadakayo ti uray ania a paset ti dagada.’” (

²⁰Maawagan met daytoy a lugar iti daga dagiti Refaim a nagnaed idi sadiay; awagan ida dagiti Ammonita iti Zamzummin.

²¹Natatayagda a kas kadagiti Anakim. Nakaad-aduda ket nabilegda a puli. Ngem pinarmek ida ti Apo, isut' gapuna a sinakup dagiti Ammonita ti dagada ket nagnaedda sadiay.

²²Kasta met ti inaramid ti Apo para kadagiti Edomita a kaputotan ni Esau, isuda nga agnaed iti katurturodan a pagilian ti Edom. Pinaksiatna dagiti Horeo ket dagiti Edomita ti pinagnaedna iti dagada; agnaedda sadiay agpapan ita.

²³Naggapu iti isla ti Creta dagiti nangsakup iti daga iti igid ti Mediterranean. Pinukawda dagiti Avvim nga immuna a nagnaed sadiay ket innalada ti dagada agingga iti siudad ti Gaza iti abagatan.)

²⁴“Kinuna ti Apo, ‘Agrubbuatkayon ket ballasiwenyo ti Karayan Arnon. Yawatko iti pannakabalinyo ni Sihon nga Amorreo nga ari ti Hesbon, agraman ti dagana. Rautenyo ket rugianyo a sakupen ti dagana.

²⁵Manipud ita nga aldaw, pagbutngek dagiti tattao iti amin a lugar kadakayo. Agtigergerto ti tunggal maysa iti butengna a makangngeg iti naganyo.’

²⁶“Manipud iti let-ang ti Kedemot, nangibaonak kadagiti tattao a mapan ken ni Sihon nga ari ti Hesbon ket kastoy ti indawatko kenkuana:

²⁷‘Pangngaasim ta papagnaennakam iti dagam. Aglayonkami ket dikami sumiasi iti dalan.

²⁸Bayadanmi ti taraon a kanenmi ken ti danum nga inumenmi. Dawatenmi laeng a papagnaennakami iti sakupmo

²⁹agingga a makaballasiwkami iti Karayan Jordan ket makapankam iti daga nga ited kadakami iti Apo a Diosmi. Impalubos dagiti kaputotan ni Esau nga agnaed iti Edom ken dagiti Moabita nga agnaed iti Ar a lumasatkami iti sakupda.’

³⁰“Ngem dinatayo pinalasat ni Ari Sihon iti pagilianna. Pinatangken ti Apo a Diosyo ti ulo ni Sihon ket pinagsukirna tapno maparmektayo ket alaentayo ti dagana. Agpapan ita, kukuatayo pay la dayta a daga.

³¹“Kalpasanna, kinuna ti Apo kaniak, ‘Adtoy, inyawatkon ni Ari Sihon ken ti dagana iti pannakabalinyo. Inkay sakupenen ti dagana.’

³²Dimteng ni Sihon ken dagiti amin a tattaona a manggubat kadatayo iti asideg ti ili ti Jaas.

³³Ngem babaen iti tulong ti Apo a Diostayo, pinarmektayo ni Sihon. Pinapataytayo agraman dagiti annakna ken amin a tattaona.

³⁴Sinakup ken dinadaeltayo met ti amin nga ilina ket awan ti pinalubosantayo nga agbiag kadagiti agnaed sadiay.

³⁵Innalatayo dagiti bakada ket nagsamsamtayo kadagiti ili.

³⁶Impalubos ti Apo a Diostayo a sakupentayo amin nga il-ili manipud Aroer, iti igid ti Karayan Arnon agingga idiay Galaad, agraman ti ili iti asideg ti karayan. Awan ti ili nga adda bakudna a ditayo pinarmek.

³⁷Ngem ditay immasideg iti sakup dagiti Ammonita wenno iti igid ti Karayan Jabbok wenno kadagiti ili iti katurturodan a paset ti pagilian wenno iti uray ania a lugar nga imparit ti Apo a Diostayo a serkentayo.