Read Iloko Deuteronomy 21 Bible Online

Deuteronomy 21 - Iloko bible

Deuteronomy 21

¹Intuloy ni Moises, “No adda masarakanyo a bangkay iti maysa a talon iti daga nga ited ti Apo a Diosyo kadakayo, ket diyo ammo ti pimmatay,

²masapul a mapan dagiti panglakayen ken dagiti ukomyo iti disso a nakaiwalangan ti bangkay ket rukodenda ti kaadayo ti tunggal ili iti kabangibang manipud iti nasao a disso.

³Mangala dagiti panglakayen iti baka a saan pay a naipako manipud iti kaasitgan nga ili a nakasarakan iti bangkay.

⁴Ipanda ti baka iti saan pay a naarado a daga, iti asideg ti maysa nga agay-ayus a waig ket rungdoenda sadiay ti tengnged ti baka.

⁵Mapan met sadiay dagiti papadi a Levita, ta akemda ti mangusig ken mangeddeng iti amin a kaso a mainaig iti kinaranggas. Pinili ida ti Apo a Diosyo tapno agserbida kenkuana ken mangbendision iti naganna.

⁶Amin a pangulo ti ili a kaasitgan iti lugar a nakasarakan iti bangkay buggoanda ti imada iti rabaw ti baka

⁷sada kuna, ‘Saan a dakami ti pimmatay iti tao ket dimi ammo no siasino ti pimmatay.

⁸Pakawanem, O Apo, dagiti tattaom nga Israelita nga inispalmo idiay Egipto. Pakawanennakami ket dinakam pabasolen iti ipapatay ti tao nga awan basolna.’

⁹Ngarud, gapu ta inaramidyo ti pagayatan ti Apo, awanto ti sungsungbatanyo iti pammapatay.

¹⁰“Inton pagballigiennakayo ti Apo a Diosyo, ket agalakayo kadagiti balud ti gubat,

¹¹nalabit nga adda makakita iti napintas a babai a pagduyosan ti riknana ket kayatna nga asawaen.

¹²Isangpetna iti balayna, pakalboanna, pagikukoenna

¹³ken pasuktanna ti pagan-anayna. Masapul nga agyan iti balayna ket makabulan a dung-awanna dagiti nagannak kenkuana; kalpasanna, mabalinnan nga asawaen.

¹⁴No dinanton kayat ti babai, masapul a wayawayaanna. Gapu ta pinilitna a kinaidda, dina mabalin nga ilako a kas tagabu.

¹⁵“Kas pangarigan adda lalaki a dua ti assawa. Ngem kadagitoy a dua, kaykayatna ti maysa. Ita, agpadada nga aganak iti lalaki, ngem ti anak ti asawa a dina kaykayat ti immuna a naipasngay.

¹⁶Inton ikeddeng ti lalaki a bingayenna ti sanikuana kadagiti annakna, dina idumduma ti anak ti magusgustoanna nga asawa babaen iti pannangtedna kenkuana iti bingay koma ti inauna nga anak.

¹⁷Masapul a doble ti bingay ti inauna uray no saan nga anak ti idumdumana nga asawa. Masapul a bigbigenna ti inauna nga anakna ket itedna ti bingayna kas ituyang ti linteg.

¹⁸“No nasukir ti maysa nga anak, ket dina italtalek ti panangdisiplina dagiti nagannak kenkuana,

¹⁹masapul nga idatag dagiti nagannak kadagiti panglakayen ti ili tapno mausig.

²⁰Kastoy ti ibagada kadagiti panglakayen: ‘Nasubeg daytoy nga anakmi. Kanayonnakami a supringen ket dinakami dengdenggen. Mammartek ken gastador.’

²¹Kalpasanna, masapul a batoen dagiti tattao agingga a matay ket iti kasta, maikkat daytoy a kinadakes. Maammoanto daytoy ti amin nga umili ti Israel ket agbutengdanto.

²²“No ibitinyo iti adigi ti bangkay ti maysa a tao a pinatayyo a kas dusa ti krimen nga inaramidna,

²³masapul nga ikaliyo met laeng ti bangkay iti dayta nga aldaw. Diyo pagpatpatnagen a nakabitin gapu ta ti bangkay a sibibitin, yegna ti lunod ti Dios iti daga. No diyo ikali a dagus, matulawan ti daga nga ited kadakayo ti Apo a Diosyo.