Read Iloko Deuteronomy 22 Bible Online

Deuteronomy 22 - Iloko bible

Deuteronomy 22

¹“No makitayo a nakabulos ti baka wenno karnero ti padayo nga Israelita, diyo baybay-an. Tiliwenyo sayo ipan iti akinkukua.

²Ngem no adayo unay ti taengna wenno diyo ammo no siasino ti akinkukua, yawidyo ti animal. Itedyo no umay tuntonen ti akinkukua.

³Kasta met ti aramidenyo no makasarakkayo iti asno wenno pagan-anay wenno aniaman a napukaw ti padayo nga Israelita.

⁴“No makitayo a nakusbo ti asno wenno baka ti padayo nga Israelita, diyo baybay-an. Tulonganyo a mangpatakder iti animalna.

⁵“Maiparit nga agkawes ti babai iti kawes ti lalaki wenno ti lalaki iti kawes ti babai. Kagura ti Apo a Diosyo dagiti tattao nga agaramid iti kasta.

⁶“No makasarakkayo iti umok ti billit iti kayo wenno iti daga ket adda tumatayab a manguk-ukop wenno mangsalsallukob kadagiti piekna diyo alaen ti tumatayab.

⁷Mabalinyo nga alaen dagiti piek ngem bulosanyo ti inada tapno narang-ay ket napautto ti panagbiagyo.

⁸“No mangbangonkayo iti baro a balay, masapul a barandiliasanyo ti tuktokna tapno awan sungsungbatanyo no adda matnag ket matay.

⁹“Dikay agitukit iti sabali a mula iti kaubasanyo. No aramidenyo ti kasta, maparitankayo nga aglak-am iti bunga ti ubas wenno iti sabali nga imulayo.

¹⁰“Diyo pagkuyogen ti baka ken ti asno nga agarado.

¹¹“Dikay agkawes iti pagan-anay a naabel iti de lana ken linen.

¹²“Baruyboyanyo dagiti uppat a suli ti pagan-anayyo.

¹³“Kas pangarigan mangasawa ti maysa a lalaki ket kalpasanna saannan a kayat ti babai;

¹⁴no padpadaksenna ti asawana ket ibagana a saan gayam a birhen idi agkasarda,

¹⁵masapul nga alaen dagiti nagannak iti babai ti puraw nga ules a nagkaiddaan dagiti agassawa iti umuna a rabii sada idatag iti korte a buklen dagiti pangulo ti ili.

¹⁶Kunanto ti ama ti babai, ‘Intedko toy anakko nga asawaen daytoy a lalaki; ita, dina met kayaten.

¹⁷Padpadaksenna ti anakko ket ibagbagana a saan a birhen idi agkasarda. Ngem adtoy ti pammaneknek a birhen ti anakko; kitaenyo ti ules a nagkaiddaanda iti umuna a rabii!’

¹⁸Masapul nga alaen dagiti panglakayen ti lalaki sada kabilen.

¹⁹Pagmultaenda pay iti 100 a bagi ti pirak ket itedda ti kuarta iti ama ti babai gapu ta imbabainna ti maysa a balasang iti Israel. Saan la a dayta; agtalinaedda nga agassawa ket dina mabalin nga isina ti babai iti unos ti panagbiagna.

²⁰“Ngem no pudno ti pammabasol ket awan ti pammaneknek a birhen ti babai,

²¹iruarda sada ipan iti ruangan ti balay ni amana. Sadiay ti pangbatoan kenkuana dagiti lallaki iti siudad agingga a matay. Nakababain ti inaramidna iti Israel gapu ta nakikaidda iti lalaki sakbay a nakiasawa idinto nga agnanaed pay laeng iti balay ni amana. Kastoy ti panangikkatyo iti daytoy a kinadakes.

²²“No masukalan a kakaiddaen ti maysa a lalaki ti asawa ti sabali, masapul a mapapatayda a dua. Kastoy ti panangikkatyo iti daytoy a kinadakes.

²³“No matiliwan ti maysa a lalaki iti maysa nga ili a makikakaidda iti babai a naitulag a mayasawa,

²⁴ipanyo ida a dua iti ruar ti ili ket batoenyo ida agingga a matayda. Mapapatay ti babai gapu ta saan a nagpaarayat idinto nga adda iti ili nga adda makangngeg kenkuana. Mapapatay met ti lalaki gapu ta kinaiddana ti babai a naitulag iti padana nga Israelita. Kastoy ti panangikkatyo iti daytoy a kinadakes.

²⁵“No ramesen ti maysa a lalaki ti maysa a balasang a masabatna iti away a naitulag a mayasawa, ti laeng lalaki ti mapapatay.

²⁶Awan ti pakaan-anoan ti babai ta awan ti inaramidna a pakaigapuan ti pannakapapatayna. Maipada daytoy a kaso iti kaso ti maysa a lalaki a mangdarup iti padana a lalaki ket patayenna.

²⁷Ngamin, rinames ti lalaki ti naitulag a babai iti putputong a lugar nga awan umarayat kenkuana.

²⁸“No matiliwan ti maysa a lalaki a mangramrames iti maysa a balasang a saan a naitulag a mayasawa,

²⁹masapul a mangted iti 50 a bagi ti pirak iti ama ti babai a kas sab-ong ket asawaenna ti babai gapu ta pinilitna. Dina mabalin nga isina iti unos ti panagbiagna.

³⁰“Maiparit a kaiddaen ti maysa a tao ti siasinoman kadagiti assawa ni amana tapno saan a maibabain ti naganak kenkuana.”