Read Iloko Deuteronomy 24 Bible Online

Deuteronomy 24 - Iloko bible

Deuteronomy 24

¹Intuloy ni Moises, “No mangasawa ti maysa a lalaki ket iti saan a mabayag, dinan kayat ti asawana ta adda natakuatanna a dina kayat kenkuana, mabalinna ti agaramid iti kasuratan ti panagsina sana pagtalawen.

²No agasawa ti babai a naisina iti sabali a lalaki,

³ket ikeddeng ti asawana ti panangisina kenkuana, ikkanna iti kasuratan ti panagsina sana papanawen. Wenno kas pangarigan matay ti maikadua nga asawana,

⁴saan a maipalubos nga asawaen manen ti immuna nga asawana. Ibilang ti lalaki a natulawan ti babai. No asawaen manen ti lalaki, ti umuna nga asawana, saan a nasayaat daytoy iti imatang ti Apo. Diyo tulawan ti daga nga ited kadakayo ti Apo a Diosyo.

⁵“No kaas-asawa ti maysa a lalaki, saan a mabalin nga agsoldado wenno agserbi iti pagilian. Agtalinaed iti balayna iti las-ud ti makatawen ket paragsakenna ti asawana.

⁶“No pautanganyo ti maysa a tao, diyo alaen ti gilinganna a kas salda ti impautangyo ta daytoy ti aramatenna a pangisagana iti pagbiag ti familiana.

⁷“Mapapatay ti siasinoman a mangitalaw iti padana nga Israelita tapno tagabuen wenno ilakona. Kastoy ti panangikkatyo iti daytoy a kinadakes iti gimongyo.

⁸“No maipapan iti kukutel, tungpalenyo ti amin nga ibilin dagiti papadi a Levita.

⁹Laglagipenyo ti inaramid ti Apo a Diosyo ken ni Miriam idi rimmuarkayo idiay Egipto.

¹⁰“No pautanganyo ti maysa a tao, dikay sumrek iti balayna tapno alaenyo ti pangigawidyo iti utangna.

¹¹Aguraykayo iti ruar ket bay-anyo nga isu ti mangted iti isaldana.

¹²No napanglaw ti immutang, diyo pagpatnagen ti pagan-anayna iti balayyo.

¹³Isubliyo ti kawes sakbay a lumnek ti init tapno adda pagturogna. Agyamanto ket maragsakanto kadakayo ti Apo a Diosyo.

¹⁴“Diyo sauren ti napanglaw ken marigrigat a patangtangdanan nga adipen, padayo man nga Israelita wenno ganggannaet nga agnaed iti iliyo.

¹⁵Sakbay a lumnek ti init, itedyo ti tangdan ti nagtrabaho iti dayta nga aldaw. Masapulna ket ninamnamana a maalana ti sueldona. No saanyo nga ited, umasug iti Apo ket ipulongnakayo ket makabasolkayo.

¹⁶“Saan a mapapatay dagiti nagannak gapu iti dakes nga inaramid dagiti annakda. Saan met a mapapatay dagiti annak gapu iti dakes nga inaramid dagiti nagannak. No siasino ti agaramid iti dakes, isu met laeng ti agsagaba iti dusa iti inaramidna.

¹⁷“Diyo ikkaten ti kalintegan dagiti ganggannaet wenno dagiti ulila. Diyo alaen ti kawes ti balo a babai a kas salda ti utangna.

¹⁸Ibilinko daytoy kadakayo ta tagabukayo met idi idiay Egipto ket winayawayaannakayo ti Apo.

¹⁹“No aganikayo ket adda malipatanyo a binettek iti talonyo, diyo sublienen. Ibatiyo sadiay para kadagiti ganggannaet, ul-ulila ken balo a babbai tapno bendisionannakayo ti Apo a Diosyo iti amin nga aramidyo.

²⁰No nagburaskayo iti oliboyo, saanyon a sublien a burasen dagiti nabati. Agpaayda kadagiti ganggannaet, ul-ulila ken balo a babbai.

²¹No nagburaskayon iti ubasyo, saanyon a sublien dagiti nalabsanyo. Bay-anyo dagiti nabati nga agpaay kadagiti ganggannaet, ul-ulila ken balo a babbai.

²²Laglagipenyo a tagabukayo met idi idiay Egipto. Isut' gapuna nga ibilinko nga aramidenyo daytoy.