Read Iloko Deuteronomy 27 Bible Online

Deuteronomy 27 - Iloko bible

Deuteronomy 27

¹Kinuna ni Moises ken dagiti pangulo ti Israel kadagiti tattao, “Tungpalenyo dagiti amin nga ibilinko kadakayo ita nga aldaw.

²Iti aldaw a ballasiwenyo ti Karayan Jordan a mapan iti daga nga ited kadakayo ti Apo a Diosyo, mangipasdekkayto iti sumagmamano a dadakkel a bato sayo palitadaan.

³Isuratyo kadagitoy dagiti amin a linteg ken pannursuro. Inton nakastrekkayon iti nabaknang ken nadam-eg a daga nga ited kadakayo ti Apo a Diosyo kas inkarina kadagidi kapuonanyo,

⁴ket addakayon iti ballasiw ti Jordan, ikabilyonto dagitoy a bato idiay Bantay Ebal sayo palitadaan a kas imbilinko kadakayo.

⁵Mangbangonkayo sadiay iti altar a bato a maipaay iti Apo a Diosyo; dikay agaramat iti landok nga alikamen.

⁶Ngamin, masapul a saan a natikapan dagiti bato nga aramatenyo iti aniaman nga altar a bangonenyo a maipaay iti Apo a Diosyo. Sadiay ti pangidataganyo kadagiti daton a mapuoran.

⁷Sadiay met ti pangidataganyo ken pangananyo iti daton a pakikappia ket agyamankay iti imatang ti Apo a Diosyo.

⁸Isuratyo a silalawag ti tunggal balikas dagiti linteg ti Apo kadagiti napalitadaan a bato.”

⁹Kinuna ni Moises ken dagiti papadi a Levita kadagiti amin nga Israelita: “Tattao ti Israel, dumngegkayo a nalaing! Ita nga aldaw, nagbalinkayon a tattao ti Apo a Diosyo.

¹⁰Agtulnogkayo ngarud kenkuana ket tungpalenyo dagiti amin a lintegna nga itedko kadakayo ita nga aldaw.”

¹¹Imbaga ni Moises kadagiti Israelita,

¹²“Apaman a maballasiwyo ti Jordan, dagiti sumaganad a tribu ti agtakderto iti Bantay Gerizim inton mabendisionan dagiti tattao: Simeon, Levi, Juda, Issacar, Jose ken Benjamin.

¹³Dagitoyto met ti agtakder iti Bantay Ebal inton maipakdaar dagiti lunod: Ruben, Gad, Aser, Zabulon, Dan ken Neftali.

¹⁴Kastoyto ti ipakaammo dagiti Levita iti napigsa a timek:

¹⁵“‘Maipatay ti lunod ti Dios iti siasinoman nga agaramid iti didiosen a bato, kayo wenno metal ket pagdaydayawanna iti nalimed. Kagura ti Apo ti panagdaydayaw kadagiti didiosen.’ “‘Amen,’ isungbatto dagiti tattao.

¹⁶“‘Maipatay ti lunod ti Dios iti siasinoman a di agraem kadagiti nagannak kenkuana.’ “‘Amen,’ isungbatto dagiti tattao.

¹⁷“‘Maipatay ti lunod ti Dios iti siasinoman a mangyalis iti mohon ti daga ti kaarrubana.’ “‘Amen,’ isungbatto dagiti tattao.

¹⁸“‘Maipatay ti lunod ti Dios iti siasinoman a mangyaw-awan iti bulsek.’ “‘Amen,’ isungbatto dagiti tattao.

¹⁹“‘Maipatay ti lunod ti Dios iti siasinoman a mangilupitlupit iti kalintegan ti ganggannaet, ulila wenno balo a babai.’ “‘Amen,’ isungbatto dagiti tattao.

²⁰“‘Maipatay ti lunod ti Dios iti siasinoman a mangibabain iti amana iti panangkaiddana iti siasinoman kadagiti assawa ni amana.’ “‘Amen,’ isungbatto dagiti tattao.

²¹“‘Maipatay ti lunod ti Dios iti siasinoman a mangkaidda iti animal.’ “‘Amen,’ isungbatto dagiti tattao.

²²“‘Maipatay ti lunod ti Dios iti siasinoman a mangkaidda iti kabsatna a babai wenno kabsatna iti ama wenno iti ina.’ “‘Amen,’ isungbatto dagiti tattao.

²³“‘Maipatay ti lunod ti Dios iti siasinoman a mangkaidda iti katuganganna a babai.’ “‘Amen,’ isungbatto dagiti tattao.

²⁴“‘Maipatay ti lunod ti Dios iti siasinoman a mangliput a mangpatay iti padana a tao.’ “‘Amen,’ isungbatto dagiti tattao.

²⁵“‘Maipatay ti lunod ti Dios iti siasinoman nga umawat iti pasuksok tapno patayenna ti awan basolna.’ “‘Amen,’ isungbatto dagiti tattao.

²⁶“‘Maipatay ti lunod ti Dios iti siasinoman a di agtulnog iti amin a linteg ken pannursuro ti Dios.’ “‘Amen,’ isungbatto dagiti tattao.”