Read Iloko Deuteronomy 28 Bible Online

Deuteronomy 28 - Iloko bible

Deuteronomy 28

¹Intuloy ni Moises, “No agtulnogkayo iti Apo a Diosyo ket ikagumaanyo a tungpalen dagiti amin a bilinna nga ipakaammok kadakayo ita nga aldaw, pagbalinennakayto a natantan-ok ngem iti uray ania a nasion iti rabaw ti daga.

²No agtulnogkayo iti Apo a Diosyo, maipaayto kadakayo amin dagitoy a bendision:

³“Bendisionanto ti Apo dagiti ili ken dagiti talonyo.

⁴“Paraburannakayto ti Apo iti adu nga annak, nawadwad nga apit ken adu a baka ken karnero.

⁵“Bendisionanto ti Apo dagiti mulmulayo ken aniaman a taraon nga isaganayo nga agtaud kadakuada.

⁶“Bendisionanto ti Apo ti amin nga aramidyo.

⁷“Parmekento ti Apo dagiti kabusor a manggubat kadakayo. Maymaysanto ti paggapuanda a mangraut kadakayo, ngem mawarawaradanto ket tinto la pagturturonganda.

⁸“Bendisionanto ti Apo a Diosyo ti trabahoyo ket punnoennanto iti trigo dagiti kamaligyo. Wen, bendisionannakayto iti daga nga itedna kadakayo.

⁹“No agtulnogkayo iti Apo a Diosyo ket tungpalenyo ti amin a bilinna, pagbalinennakayto a tattaona a kas inkarina.

¹⁰Iti kasta, mabigbigto dagiti amin a tattao ditoy daga a dakayo ti pinili ti Apo a Diosyo ket agbutengdanto kadakayo.

¹¹Paraburannakayto ti Apo iti adu nga annak, adu nga animal ken nawadwad nga apit iti daga nga inkarina kadagidi kapuonanyo nga ited kadakayo.

¹²Luktanto ti Apo ti nabaknang a pagiduldulinanna iti tangatang: Yegnanto ti tudo iti umisu a panawen ket bendisionannanto ti amin nga aramidyo. Iti kasta, pulos a dikayto makautang no di pay ket dakayo ti agpautang.

¹³Pagbalinennakayto ti Apo a Diosyo a pangulo kadagiti pagilian; saankayto a paspasurot. Narang-aykayto latta ket agballigikayto iti amin nga aramidyo no la ket agtulnogkayo a sipupudno kadagiti bilinna nga ipakaammok kadakayo ita nga aldaw.

¹⁴Ngem masapul a diyo sukiren ti aniaman a bilin ket dikay agdaydayaw ken agserbi kadagiti didiosen.”

¹⁵“Ngem no dikay agtulnog iti Apo a Diosyo ket diyo tungpalen a sipupudno dagiti amin a bilin ken lintegna nga itedko kadakayo ita nga aldaw, agdissuorto kadakayo amin dagitoy a lunod:

¹⁶“Ilunodto ti Apo dagiti il-ili ken taltalonyo.

¹⁷“Ilunodnanto dagiti mulmulayo ken ti isaganayo a taraon.

¹⁸“Ilunodnakayto ti Apo ket bassitto laeng ti iparaburna nga annakyo; nakirangto ti apityo ken bassitto ti baka ken karneroyo.

¹⁹“Ilunodto ti Apo ti amin nga aramidyo.

²⁰“No agaramidkayo iti dakes ket tallikudanyo ti Apo a Diosyo, yegnanto kadakayo ti didigra, riribuk ken parikut iti amin nga aramidyo agingga a mapukawkayo a mamimpinsan.

²¹Agsasarunonto a sakit ti sagabaenyo agingga nga awan matda kadakayo iti daga nga inkay sakupen.

²²Ipalak-amto kadakayo ti Apo ti makaalis a sakit. Aggurigorkayto ket lumtegto dagiti bagbagiyo. Yegnanto ti tikag ken makalanet nga angin a mangdadael kadagiti mulmulayo. Agtalinaedto kadakayo dagitoy a didigra agingga a mataykayo.

²³Awanto ti tudo, ket tumangkento a kas iti landok ti dagayo.

²⁴Yegnanto ketdi ti napigsa nga angin a napakuyogan iti tapok ken darat agingga a madadaelkayo.

²⁵“Ipalubosto ti Apo a parmekendakayo dagiti kabusoryo. Maymaysanto ti paggapuanyo a manggubat kadakuada ngem agtataraykayto a mawarawara ket diyonto ammo ti turturongenyo. Agbutengto dagiti amin a tattao ditoy daga a makakita iti mapasamak kadakayo.

²⁶No mataykayo, kanento dagiti tumatayab ken dagiti atap nga ayup dagiti bangkayyo ket awanto ti mangbugaw kadakuada.

²⁷Pagbusaliennakayto ti Apo a kas iti impalak-amna kadagiti taga-Egipto. Malapunoskayto iti gaddil. Agkuradkayto ket agkudkodkayo ngem awanto ti agasna.

²⁸Pagmauyongennakayto ti Apo. Pagbulsekennakayto ket diyonto ammo ti turturongenyo.

²⁹Kaskayto la bulsek nga agar-arikap a dina makita ti papananna, uray tengnga ti aldaw. Dikayto agballigi iti aniaman nga aramidyo. Kanayonkayto a maidadanes ken matakawan ket awanto ti tumulong kadakayo.

³⁰“Makitulagkayto iti babai nga asawaenyo ngem sabalinto ti mangasawa kenkuana. Agbangonkayto iti balayyo ngem diyonto pagnaedan. Agmulakayto iti ubas ngem diyonto maramanan ti bungana.

³¹Mapartinto ti bakayo iti imatangyo, ngem diyonto maramanan. Kitkitaenyonto nga alaenda dagiti asnoyo ngem didanton maisubli. Maitedto dagiti karneroyo kadagiti kabusoryo ket awanto ti umay tumulong kadakayo.

³²Makitayonto ti pannakaited dagiti annakyo tapno agbalinda a tagabu dagiti ganggannaet. Inaldawto a mabannog dagiti matayo a mangpaspasungad kadagiti annakyo ngem didanton agsubli.

³³Alaento ti ganggannaet a nasion dagiti amin nga apit a nagbambannoganyo ngem awanto ti maipaay kadakayo no di pasig a pannakaidadanes ken pannakaparparigat.

³⁴Agsagabakayto agingga nga agmauyongkayo.

³⁵Malapunosto dagiti sakayo iti naut-ot ken saan a maagasan a letteg; agbusalinto ti entero a bagiyo.

³⁶“Ipannakayto ti Apo agraman ti ariyo iti ganggannaet a daga a diyo pay nagnaedan ken uray dagidi kapuonanyo. Agdaydayawkayto sadiay kadagiti didiosen a naaramid iti kayo wenno bato.

³⁷Gapu iti mapasamak kadakayo, masdaawto dagiti tattao kadagiti pagilian a pakaiwarasanyo; dakayonto ti kanayon a sarsaritaen, rabrabaken ken katkatawaanda.

³⁸“Uray no adunto a bukel ti itukityo, bassitto ti maapityo ta ibusento dagiti dudon.

³⁹Agmulakayto kadagiti ubas ket taripatoenyonto ida, ngem dikayto makaramanen iti bungada wenno makainum iti arak ti ubas gapu ta iggesento dagiti mula.

⁴⁰Agtubonto ti olibo iti amin a paset ti dagayo ngem awanto ti aramidenyo a lana ta agregregto dagiti bungada.

⁴¹Addanto annakyo, ngem mapukawyonto ida ta maitalawdanto a kas balud iti gubat.

⁴²Ibusento ti igges ti amin a kayo ken mulayo.

⁴³“Rumang-ayto a rumang-ay dagiti ganggannaet nga agnanaed iti sakupyo idinto ta pumanglawto a pumanglaw ti kasasaadyo.

⁴⁴Addanto kuarta nga ipautangda kadakayo ngem awanto ti maipautangyo kadakuada. Pagangayanna, iturayandakayto.

⁴⁵“Agdissuorto amin dagitoy a didigra kadakayo. Agtalinaeddanto agingga a madadaelkayo agsipud ta dikay nagtulnog iti Apo a Diosyo, ket diyo tinungpal dagiti amin a lintegna nga intedna kadakayo.

⁴⁶Dagitoyto ti pammaneknek iti agnanayon a panangukom ti Apo kadakayo ken kadagiti kaputotanyo.

⁴⁷Binendisionannakayo ti Apo iti amin a banag ngem dikay met agserbi kenkuana a sipapasnek ken siraragsak.

⁴⁸Agserbikayto ngarud kadagiti kabusor nga ibaon ti Apo a manggubat kadakayo. Mabisinan, mawaw, ken lamolamokayto. Nakakaasikayto. Nakaronto ti panangidadanes dagiti kabusor kadakayo agingga a mataykayo amin.

⁴⁹Mangyegto ti Apo iti maysa a nasion a bumusor kadakayo. Aggapunto iti adayo a lugar a diyo maawatan ti pagsasaona. Kaslanto agila a mangseppeg kadakayo.

⁵⁰Naranggasdanto ket awanto ti kaasianda, ubing man wenno nataengan.

⁵¹Ibusendanto dagiti animal ken dagiti apityo ket mataykayto iti bisin. Awanto ti ibatida a taraonyo, arak, lana ti olibo, animal wenno karnero ket mataykayto.

⁵²Darupendanto dagiti amin nga ili iti daga nga ited kadakayo ti Apo a Diosyo. Marbanto dagiti nangato ken nasarikedkedan a bakud a pagtaltalgedanyo.

⁵³“Inton madama ti pananglakub kadakayo dagiti kabusoryo, nakaronto unay ti panagbisinyo ket kanenyonto pay ketdin dagiti mismo nga annak nga imparabur kadakayo ti Apo a Diosyo.

⁵⁴Uray ti kataknengan a lalaki a nagtaud iti nangato a familia, awanton asina bayat ti pananglakub dagiti kabusor ket kanennanto ti sumagmamano kadagiti annakna gapu ta awanen sabali a taraonna. Dinanto pay ibingayan ti kabsatna, wenno ti patpatgenna nga asawa wenno dagiti nabati nga annakna.

⁵⁵

⁵⁶Uray ti kataknengan a babai a nagtaud iti nangato a familia a baknang unay ket dina pay kayat idi ti magna no adda papananna, kastanto met ti aramidenna. Inton lakuben dagiti kabusor ti ilina, awanton ti asina ta sililimedto a kanenna ti maladaga a kaipaspasngayna ken uray pay ti kadkadua. Dinanto ibingayan ti ay-ayatenna nga asawa wenno uray ti maysa kadagiti annakna.

⁵⁷

⁵⁸“Tungpalenyo a sipapasnek ti amin a pannursuro ti Dios a naisurat iti daytoy a libro. Raemenyo ti nakaskasdaaw ken nakabutbuteng a nagan ti Apo a Diosyo.

⁵⁹Ta no saan, yegnanto kadakayo ken iti kaputotanyo dagiti nakaro a sakit ken nadagsen a didigra a pulos a saan a mapasardeng.

⁶⁰Yegnanto manen dagiti amin a sakit a kinabutbutengyo idi idiay Egipto, ket dikayto maimbagan.

⁶¹Yegnanto pay ti amin a kita ti sakit ken angol a saan a nailanad iti daytoy a libro ti linteg ken pannursuro ti Dios ket mataykayto amin.

⁶²Uray no umadukayo a kas iti kaadu dagiti bituen, bassitto laeng ti makalasat kadakayo gapu ta dikay nagtulnog iti Apo a Diosyo.

⁶³Naragsak ti Apo a nangparang-ay kadakayo ken nangpaadu iti bilangyo; kastanto met ti ragsakna a mangdadael ken mangpukaw kadakayo. Mapapanawkayto iti daga nga inkay tagikuaen.

⁶⁴“Iwarawaranakayto ti Apo iti amin a suli ditoy lubong. Agserbikayto kadagiti didiosen a naaramid iti kayo wenno iti bato, didiosen a diyo pay nagdaydayawan ken di met nagdaydayawan dagidi kapuonanyo.

⁶⁵Awanto ti masarakanyo a talna iti sadinoman a lugar. Awanto ti disso a makunayo a kukuayo. Madandanagankayto. Kanayonkayto a masikoran ket maawanankayto iti namnama.

⁶⁶Kanayonto nga agpeggad ti biagyo. Aldaw-rabii nga agbutbutengkayonto. Kankanayonto a madandanagankayo a dumteng ni patay kadakayo iti uray ania nga oras.

⁶⁷Agkebbakebbakayto iti buteng iti amin a makitayo. No dumteng ti bigat, seggaanyo ti rabii. No dumteng met ti rabii, seggaanyo ti bigat.

⁶⁸Mailugankayto kadagiti barko ket isublinakayto ti Apo idiay Egipto nupay inkarina idi a saankayon nga agsubli sadiay. Kayatyonto a mailakokayo sadiay a kas tagabu kadagiti kabusoryo ngem awanto ti mayat a gumatang kadakayo.”