Read Iloko Deuteronomy 30 Bible Online

Deuteronomy 30 - Iloko bible

Deuteronomy 30

¹Intuloy ni Moises, “Inikkankayo iti pagpilian: bendision wenno lunod. Inton mapasamak amin dagitoy kadakayo ket agnaedkayon kadagiti nasion a nangiwarawaraan kadakayo ti Apo a Diosyo, malagipyonto dagiti imbagak.

²No agsublikayto iti Apo, dakayo ken dagiti kaputotanyo, ket tungpalenyo a sipapasnek dagiti bilinna nga itedko kadakayo ita nga aldaw,

³kaasiannakayto ti Apo a Diosyo. Alaennakayto kadagiti pagilian a nangiwarasanna kadakayo ket parang-ayennakayto manen.

⁴Nupay naiwaraskayo kadagiti kaadaywan a paset ti daga, ummongennakayto ti Apo ket parang-ayennakayto manen.

⁵Ipannakayto iti daga a nagnaedan dagidi kapuonanyo tapno tagikuaenyo met laeng. Pagbalinennakayto a narangrang-ay ken ad-adu ngem dagidi kapuonanyo.

⁶Pabaroennakayto ti Apo ket agbalinkayto a natulnog tapno ayatenyo iti amin a puso ken kararuayo ken agtultuloykayto nga agnaed iti dayta a daga.

⁷Idissuorto ti Apo dagitoy a lunod kadagiti kabusoryo ken kadagiti manggurgura ken mangparparigat kadakayo.

⁸Agtulnogkayto manen iti Apo ket tungpalenyonto ti amin a bilin nga itedko kadakayo ita nga aldaw.

⁹Parang-ayennakayto ti Apo iti amin nga aramidyo. Adunto dagiti annakyo ken dagiti bakayo; nawadwadto ti maapit kadagiti talonyo. Maragsakanto ti Apo a mangparang-ay kadakayo a kas iti ragsakna a nangparang-ay kadagidi kapuonanyo.

¹⁰Ngem masapul nga agtulnogkayo kenkuana ket tungpalenyo dagiti amin a lintegna a kas naisurat iti daytoy a libro ti pannursurona. Masapul nga agsublikayo kenkuana iti amin a puso ken kararuayo.

¹¹“Nalaka a tungpalen daytoy a bilin nga itedko kadakayo. Saan a narigat a gun-oden.

¹²Saan nga iti tangatang ti ayanna. Saan a masapul a saludsodenyo, ‘Siasino ti mapan mangala sadiay tapno mangngeg ken tungpalenmi?’

¹³Saan met nga adda iti ballasiw ti taaw. Saan a masapul a saludsodenyo, ‘Siasino ti mapan mangala iti ballasiw ti taaw tapno yegna kadakami ket mangngeg ken tungpalenmi?’

¹⁴Adda kadakayo. Ammo ken maisaoyo isut' gapuna a tungpalenyo.

¹⁵“Ita nga aldaw, agpilikayo iti kayatyo: kinaimbag wenno kinadakes, biag wenno patay.

¹⁶No tungpalenyo dagiti bilin ti Apo a Diosyo, no ayatenyo, no agtulnogkayo kenkuana ket annurotenyo dagiti amin a lintegna, rumang-aykayto ket agbalinkayto a dakkel a pagilian. Bendisionannakayto ti Apo a Diosyo iti daga nga inkay tagikuaen.

¹⁷Ngem no agsukirkayo, no dikayo dumngeg ket masulisogkayo nga agdaydayaw kadagiti didiosen,

¹⁸ballaagankayo itan nga awan duadua ti pannakadadaelyo. Ababanto ti biagyo iti dayta a daga nga inkay sakupen iti ballasiw ti Jordan.

¹⁹Pagpilienkayo iti biag wenno patay, iti bendision wenno iti lunod ti Dios. Awagak ti langit ken ti daga a mangsaksi iti pilienyo. Pilienyo ti biag.

²⁰Ayatenyo ti Apo a Diosyo, agtulnog ken agtalinaedkayo a napudno kenkuana tapno napautto ti panagnaedyo, dakayo ken dagiti kaputotanyo, iti daga nga inkarina nga ited kadagidi kapuonanyo, da Abraham, Isaac ken Jacob.”