Read Iloko Deuteronomy 31 Bible Online

Deuteronomy 31 - Iloko bible

Deuteronomy 31

¹Intuloy ni Moises ti nagsao kadagiti amin nga Israelita,

²kinunana, “Sangagasut ket duapulo ti tawenkon. Saankon a kabaelan ti mangidaulo kadakayo. Maysa pay, imbaga ti Apo kaniak a diak bumallasiw iti Karayan Jordan.

³Umun-unanto ngem dakayo ti Apo a Diosyo ket paksiatennanto dagiti agnaed sadiay tapno matagikuayo ti dagada. Ni Josue ti mangidalanto kadakayo, kas imbaga ti Apo.

⁴Parmekento ti Apo dagitoy a tattao a kas iti panangparmekna kada Sihon ken Og nga ari dagiti Amorreo ket dinadaelna ti pagilianda.

⁵Yawatto ida ti Apo iti pannakabalinyo ket aramidenyo kadakuada ti kas imbilinko kadakayo.

⁶Papigsaenyo ti pakinakemyo. Tumuredkayo. Dikay agbuteng kadakuada. Ti Apo a Diosyo ti kumuyog kadakayo! Dinakayto paayen wenno baybay-an.”

⁷Pinaayaban ni Moises ni Josue ket iti sangoanan ti entero nga Israel, kinunana kenkuana: “Sika ti mangidaulo kadagitoy a tattao a mapan mangtagikua iti daga nga inkari ti Apo kadagidi kapuonanyo. Ngarud papigsaem ti pakinakemmo, ket tumuredka.

⁸Ti Apo a mismo ti mangidalan ken kumuyogto kenka. Dinakanto paayen wenno baybay-an. Isut' gapuna a dika agbuteng wenno maupay.”

⁹Insurat ni Moises ti Linteg ti Dios ket intedna kadagiti papadi a Levita a mangay-aywan iti Lakasa ti Tulag ni Yahweh ken kadagiti panglakayen ti Israel.

¹⁰Imbilinna daytoy kadakuada: “Iti gibus ti tunggal pito a tawen, iti tawen a pannakapakawan dagiti utang, ibasayo daytoy iti napigsa iti Fiesta dagiti Abong-abong.

¹¹Ibasayo kadagiti Israelita inton umayda agdaydayaw iti Apo a Diosyo iti lugar a pagdaydayawan.

¹²Ummongenyonto dagiti amin a lallaki, babbai ken ubbing ken dagiti ganggannaet nga agnaed kadagiti iliyo tapno mangngeg ti amin ket masursuroda ti agbuteng iti Apo a Diosyo ken tapno agtungpalda a sipapasnek kadagiti pannursurona.

¹³Uray dagiti kaputotanyo a di pay makaammo iti daytoy, mangngegdanto ti Linteg ti Apo a Diosyo. Iti kasta, masursurodanto ti agtungpal kenkuana, iti unos ti panagbiagda ken bayat ti panagnaedda iti daga iti ballasiw ti Jordan.”

¹⁴Kinuna ni Yahweh ken ni Moises, “Dandanin ti ipapataymo. Ayabam ni Josue ket ipanmo iti Tolda ti Dios tapno itedko kenkuana dagiti bilinko.” Napan da Moises ken Josue iti Tolda,

¹⁵ket nagparang kadakuada ni Yahweh a kas monmon nga ulep a nagintek iti ruangan ti Tolda.

¹⁶Kinuna ni Yahweh ken ni Moises, “Asidegen ti ipapataymo ket kalpasan ti ipapataymo, tallikudandakto dagiti tattao ket salungasingenda ti katulaganmi. Baybay-andakto ket agdaydayawdanto kadagiti didiosen dagiti pagano iti daga a dandanidan sakupen.

¹⁷Ket sumgedto ti pungtotko kadakuada. Laksidekto ida, ket madadaeldanto. Adunto ti nakabutbuteng a didigra a lak-amenda. Mabigbigdanto a linak-amda dagitoy gapu ta siak a Diosda awanakon kadakuada.

¹⁸Diakto kayat a tulongan ida iti dayta a tiempo gapu iti dakes nga inaramidda. Nagdaydayawda ngamin kadagiti didiosen.

¹⁹“Ita, isuratmo daytoy a kanta ken isurom iti entero nga Israel tapno agbalinto a pammaneknek a maibusor kadakuada.

²⁰Inton addadan iti nabaknang ken nadam-eg a daga a pangipanak kadakuada, kas inkarik kadagidi kapuonanda, agbiagdanto a narang-ay ken nanam-ay. Ngem tallikudandakto ket agdaydayawda kadagiti didiosen. Baybay-andakto ket salungasingenda ti katulagak kadakuada.

²¹Adunto ti nakabutbuteng a didigra a lak-amenda. Agbalinto daytoy a kanta a pammaneknek a maibusor kadakuada gapu ta kankantaento pay laeng dagiti kaputotanda. Diak pay naipan ida iti daga nga inkarik nga ited kadakuada, ngem ammokon ti pampanunotenda.”

²²Iti dayta met la nga aldaw, insurat ni Moises ti kanta ket insurona kadagiti Israelita.

²³Imbaga ni Yahweh ken ni Josue nga anak ni Nun, “Papigsaem ti pakinakemmo ket tumuredka, gapu ta idalanmo dagiti Israelita a mapan iti daga nga inkarik nga ited kadakuada. Addaakto kenka.”

²⁴Kalpasan ti panangisurat ni Moises iti amin a linteg ti Dios iti maysa a libro,

²⁵kinunana kadagiti papadi a Levita a mangay-aywan iti Lakasa ti Tulag ni Yahweh:

²⁶“Alaenyo daytoy libro ti Linteg ti Dios ket ikabilyo iti abay ti Lakasa ti Tulag ti Apo a Diosyo tapno agyan sadiay a pammaneknek a maibusor kadagiti tattaona.

²⁷Ammok ti kinasukir ken kinatangken ti uloda. Sinuksukirdan ti Apo ita ta sibibiagak pay ket nakarkaronto manen ti panagsukirda kalpasan ti ipapatayko.

²⁸Ummongenyo dagiti amin a panglakayen dagiti tribu ken dagiti panguloyo ket dumatagkayo kaniak tapno ibagak kadakuada dagitoy a banag. Awagak ti langit ken daga nga agsaksi a maibusor kadakuada.

²⁹Ammok a kalpasan ti ipapatayko, dumakeskayto ket salungasingenyonto dagiti insurok kadakayo. Dumtengto ti aldaw a makapungtotto kadakayo ti Apo ket aglak-amkayto iti didigra agsipud ta inaramidyo ti iparitna nga aramidenyo.”

³⁰Adtoy ti kanta ni Moises nga indaniwna bayat ti panagdengngeg dagiti Israelita.