Read Iloko Deuteronomy 32 Bible Online

Deuteronomy 32 - Iloko bible

Deuteronomy 32

¹“Dumngegkayo, langit ken daga; timudenyo a naimbag ti innak ibaga!

²Agtinnag a kasla tudo ti pannursurok; ket agbalay a kasla linnaaw iti daga. Kasla arbis nga agdisso iti naganus a mula, kasla tudo nga agtinnag kadagiti nalangto a ruot.

³Siak ti mangidaydayaw iti nagan ti Apo, ket dagiti tattaona ti mangipakaammo iti kinatan-okna!

⁴“Ti Apo ti nabileg a mangsalaknib kadakayo, naan-anay ken nalinteg amin nga aramidna. Mapagtalkan ken napudno ti Diosyo, nalinteg ken naimbag ti aramidna.

⁵Ngem saankayo a napudno ken maikari a tattaona, managdakdakes ken naulbodkayo a nasion.

⁶Kastoy kadi ti panangsubadyo iti Apo, dakayo a maag ken awan nakemna a tattao? Isu ti amayo ken namarsua kadakayo! Isu ti namagbalin kadakayo a nasion!

⁷“Panunotenyo ti napalabas, idi un-unana a tiempo. Damagenyo kadagiti kapuonanyo no ania ti napasamak; damagenyo kadagiti lallakay ti napalabas.

⁸Inted ti Kangatoan ti daga dagiti nasion; intudingna ti daga a pagtaengan ti tunggal pagilian. Inikkanna ti tunggal nasion iti didiosen

⁹ngem pinilina dagiti kaputotan ni Jacob nga agpaay kenkuana.

¹⁰“Nasarakanna ida nga agalla-alla iti let-ang, iti awan matagtagitao ken naangin a langalang. Sinalakniban ken inaywananna ida, a kas iti panangtaripatona iti bukodna a mata.

¹¹Saan nga impalubos ti Apo a matnag dagiti Israelita. Mayarig iti agila a mangisursuro kadagiti piekna iti panagtayabda. Sippawenna ida kadagiti siuukrad a payakna ket awan ti pakaan-anoanda.

¹²Ti laeng Apo ti nangidalan kadagiti tattaona, awan sabali a dios a timmulong kadakuada.

¹³“Pinagturayna ida kadagiti nangato a luglugar, tinaraonanna ida iti aniaman nga agtubo iti tay-ak. Nakasarakda iti diro kadagiti rengngat dagiti bato; nagtubo dagiti kayoda nga olibo iti kabatoan.

¹⁴Adu ti gatas dagiti baka ken kaldingda; dagiti baka, karnero ken kaldingda ti kapintasan, ti trigoda ti kasayaatan, ket ti arakda ti kaimasan.

¹⁵“Bimmaknang ngem nagbalin a nasukir dagiti tattao ti Apo; limmukmegda ket nagum-umada iti taraon. Tinallikudanda ti Dios a Namarsua kadakuada, ken linaksidda ti naindaklan a nangispal kadakuada.

¹⁶Nagdaydayawda kadagiti didiosen ket nagimon ti Apo; pinagpungtotda gapu kadagiti dakes nga inaramidda.

¹⁷Nagidatagda iti daton kadagiti saan a pudno a didiosen, didiosen a di nagdaydayawan dagiti Israelita ken di kinabuteng dagidi kapuonanda.

¹⁸Nalipatanda ti Diosda, ti nabileg a mangisalakan kadakuada, ti Dios a nangted iti biagda.

¹⁹“Nakapungtot ti Apo a nakakita iti aramidda, ket linaksidna dagiti annakna.

²⁰Kinunana, ‘Diakton tulongan ida, ta kitaek man no ania ti pagbanaganda, dagiti nasukir ken saan a napudno a tattao.

²¹Pinagpungtotdak gapu kadagiti imahenda; pinagimondak kadagiti makunkuna a didiosenda, didiosenda a saan a pudno a Dios. Iti kasta, aramatekto ti makunkuna a nasion a mangpapungtot kadakuada. Aramatekto ti maysa a nasion dagiti maag, a mamagimon kadakuada.

²²Sumgedto a kas apuy ti pungtotko, ket uramenna amin nga adda ditoy daga. Dumanonto iti akimbaba a lubong, ket uramenna dagiti puon ti bantay.

²³“‘Idissuorkonto kadakuada ti agsasaruno a didigra, ibiatkonto ti amin a panak kadakuada.

²⁴Mataydanto iti bisin ken gurigor, nakabutbutengto a sakit ti mangibus kadakuada. Ibaonkonto dagiti narungsot nga animal a mangdarup kadakuada ken dagiti nagita nga uleg a mangkagat kadakuada.

²⁵Adunto ti matay kadagiti kalsada gapu iti gubat, adunto ti matay kadagiti balbalay gapu iti buteng. Matayto dagiti agtutubo a lallaki ken babbai, kasta met dagiti maladaga ken lallakay nga ubanan.

²⁶Pinukawko la koma amin idan, tapno awan makalaglagip kadakuada.

²⁷Ngem diak ipalubos nga agpalangguad dagiti kabusorda, ket ibagada a pinarmekda dagiti tattaok, ket kunada a saan a siak a mismo ti mangdadael kadakuada.’

²⁸“Maysa a nasion ti Israel nga awan nakemna, awan pannakaawat dagiti tattaona.

²⁹Dida ammo no apay a naparmekda, dida maawatan ti napasamak kadakuada.

³⁰Apay a pinarmek ti maysa ti sangaribu? Apay a pinarmek ti dua ti sangapuloribu? Binaybay-an ida ti Apo a Diosda, linaksid ida ti mannakabalin a Diosda.

³¹Ammo dagiti kabusorda a nakapuy dagiti didiosenda, saanda a nabileg a kas iti Dios ti Israel.

³²Managdakdakes dagiti kabusorda a kas iti Sodoma ken Gomorra, kasda la iti puon ti ubas napait ken makasabidong ti bungana,

³³kas iti arak a naaramid iti gita dagiti uleg.

³⁴“Malagip ti Apo ti inaramid dagiti kabusorda, urayenna ti tumutop a tiempo a panangdusana kadakuada.

³⁵Balsen ken dusaento ida ti Apo, asidegen ti aldaw nga agdissuor kadakuada ti didigra. Saanen a mabayag ti panagkanibusananda.

³⁶Isalakanto ti Apo dagiti tattaona, inton makitana nga awanen ti pigsada. Kaasiannanto dagiti agserserbi kenkuana, inton makitana nga awanen ti matda.

³⁷Iti kasta, saludsodento ti Apo kadagiti tattaona, ‘Sadino ti ayan dagiti nabileg a didiosen a nagtalkanyo?

³⁸Pinakanyo ida iti taba dagiti datonyo, ket nagidatagkayo kadakuada iti arak nga inumen. Ayabanyo ida a tumulong kadakayo, isuda ti pagkamanganyo.

³⁹“‘Sisiak laeng ti Dios; awanen ti sabali a pudno a Dios. Pumatayak ket mangtedak iti biag, mangsugatak ket siak met laeng ti mangpaimbag; awan ti makalapped iti aramidek.

⁴⁰Gapu ta siak ti sibibiag a Dios, ingatok ti imak ket isapatak

⁴¹nga asaek ti sumilsilap a kampilanko, ket ikagumaak a maaramid ti kinalinteg. Balsek dagiti kabusorko, ket dusaek dagiti gumurgura kaniak.

⁴²Malapunosto dagiti panak iti darada, ket patayento ti kampilanko, dagiti amin a bumusor kaniak. Awan ibatik a sumupring kaniak, dagiti nasugatan ken dagiti balud mataydanto.’

⁴³“Dakayo a nasion, masapul nga itan-okyo dagiti tattao ti Apo; dusaenna dagiti amin a mangpapatay kadakuada, balsenna dagiti kabusorna, ket pakawanenna ti basol dagiti tattaona.”

⁴⁴Indaniw da Moises ken Josue nga anak ni Nun daytoy a kanta tapno mangngeg dagiti Israelita.

⁴⁵Kalpasan ti panangipakaammo ni Moises iti pannursuro ti Dios kadagiti Israelita,

⁴⁶kinunana, “Ikagumaanyo a tungpalen amin dagitoy nga imbilinko kadakayo ita nga aldaw. Ipakaammoyonto met kadagiti annakyo tapno tungpalenda a sipapasnek dagiti amin a pannursuro ti Dios.

⁴⁷Saan nga ubbaw dagitoy a pannursuro. Isuda ti biagyo. Tungpalenyo ida ket napautto ti biagyo iti daga a sakupenyo iti ballasiw ti Jordan.”

⁴⁸Iti dayta met la nga aldaw, kinuna ni Yahweh ken ni Moises,

⁴⁹“Inka iti Bantay Abarim, iti daga ti Moab, iti kasumbangir ti siudad ti Jerico. Sumang-atka iti Bantay Nebo ket tannawagam ti Canaan nga itedko a tagikuaen dagiti Israelita.

⁵⁰Mataykanto iti dayta a bantay a kas iti ipapatay ni kabsatmo nga Aaron idiay Bantay Hor.

⁵¹Ngamin, saankayo a nagtalek kaniak iti imatang dagiti Israelita. Imbabaindak idi addakayo iti kadandanuman ti Meriba, iti asideg ti ili ti Kades, iti let-ang ti Zin.

⁵²Mabalinmo a kitaen ti daga nga itedko iti Israel ngem dikanto makastrek sadiay.”