Read Iloko Deuteronomy 33 Bible Online

Deuteronomy 33 - Iloko bible

Deuteronomy 33

¹Sakbay ti ipapatay ni Moises a tao ti Dios, binendisionanna dagiti Israelita. Kinunana,

²“Naggapu ti Apo idiay Bantay Sinai; timpuar a kasla init iti ngatoen ti Edom, ket rinanniaganna dagiti tattaona manipud Bantay Paran. Kinakuyogna ti umariwekwek nga angheles, adda gumilgil-ayab nga apuy iti makannawanna.

³Ayaten ti Apo dagiti tattaona, ket salaknibanna dagiti kukuana. Agrukbabtayo ngarud iti sakaananna, ket tungpalentayo dagiti bilinna.

⁴Tungpalentayo ti linteg nga inted ni Moises kadatayo, ti linteg a kapatgan a gameng ti nasiontayo.

⁵Nagbalin ti Apo nga ari dagiti tattaona nga Israelita, idi naguummong dagiti tribu ken papanguloda.”

⁶Kinuna ni Moises maipapan iti tribu ni Ruben: “Saan koma a matay ni Ruben nupay bassit ti bilang dagiti tattaona.”

⁷Kinunana maipapan iti tribu ni Juda: “Ipangagmo, O Apo, ti ik-ikkisda nga agpatulong, ket itiponmo ida manen kadagiti dadduma a tribu. Sika koma ti makigubat no makigubatda, ket tulongam ida a mangsaranget kadagiti kabusorda.”

⁸Kinunana maipapan iti tribu ni Levi: “Ipakaammom, O Apo, ti pagayatam babaen iti panangaramatmo kadagiti Levita, babaen iti Urim ken Tummim. Isuda dagiti napudno a tattaom; sinuotmo ida idiay Massa, ket napaneknekam ti kinapudnoda iti kadandanuman idiay Meriba.

⁹Impakitada ti ad-adda a panagtulnogda kenka, ngem kadagiti nagannak, kakabsat wenno annakda. Tinungpalda dagiti bilbilinmo, ket sinalimetmetanda ti katulaganyo.

¹⁰Isurodanto dagiti tattaom nga agtulnog iti Lintegmo. Agidatagdanto kadagiti sakrifisio iti altarmo.

¹¹Tulongam a pumigsa ti tribuda, O Apo; maragsakanka koma kadagiti aramidda. Parmekem dagiti amin a kabusorda; dimo ipalubos a bumangonda a makigubat manen.”

¹²Kinunana maipapan iti tribu ni Benjamin: “Daytoy ti tribu nga ay-ayaten ken salakniban ti Apo. Agmalmalem nga aywananna ida. Inaldaw nga agbiagda a sitatalged iti imatangna.”

¹³Kinunana maipapan iti tribu ni Jose: “Bendisionan koma ti Apo ti dagada iti tudo ken danum nga aggapu iti uneg ti daga.

¹⁴Maparaburan koma ti dagada kadagiti bunga a napintas ti panagluomna; iti tunggal tiempo, mapabaknang koma kadagiti kasayaatan a bunga.

¹⁵Mapno koma dagiti kadaanan a bambantay kadagiti agkakaimas a bungbunga.

¹⁶Maaplagan koma ti dagada iti amin nga agkakaimbag a bambanag kas parabur ti kinaimbag ti Apo a nagsao manipud iti sumsumged a kayo. Agpaay koma dagitoy a bendision iti tribu ni Jose, ta isu ti napili a pangulo kadagiti kakabsatna.

¹⁷Napigsa ni Jose a kas iti toro a baka; kas iti sara ti atap a baka ti sarana. Dagiti sarana isuda dagiti rinibu a tattao ni Manases, ken dagiti pinullo ribu a tattao ni Efraim. Isuda ti pangsangdona kadagiti nasion ket iduronna ida agingga iti ungto ti daga.”

¹⁸Kinunana maipapan kadagiti tribu da Zabulon ken Issacar: “Agragsakka, Zabulon, gapu kadagiti barkom a pagnegosio. Agragsakka, Issacar. Umadu koma ti kinabaknang iti balaymo.

¹⁹Awisenda dagiti nasion iti bantayda, ket sadiay, idatagda dagiti maiparbeng a daton. Ta agtaud ti kinabaknangda iti taaw ken iti darat iti igid ti baybay.”

²⁰Kinunana maipapan iti tribu ni Gad: “Madaydayaw ti Dios a nangpalawa iti sakup ni Gad. Agur-uray ni Gad a kas maysa a leon a mangrangrangkay iti matukmaanna.

²¹Innalada ti kasayaatan a paset ti daga, nga agpaay kadakuada. Naited kadakuada ti bingay ti maysa a pangulo. Tinungpalda dagiti linteg ken bilin ti Apo, idi naummong dagiti papangulo dagiti Israelita.”

²²Kinunana maipapan iti tribu ni Dan: “Maysa nga urbon ni Dan a lumagto nga aggapu idiay Basan.”

²³Kinunana maipapan iti tribu ni Neftali: “Adu ti bendision ni Neftali; adu ti parabur ti Apo kenkuana. Dumanon ti dagada agingga iti abagatan, manipud Dan-aw ti Galilea.”

²⁴Kinunana maipapan iti tribu ni Aser: “Ad-adu ti bendision ni Aser ngem dagiti dadduma a tribu. Isu koma ti kaay-ayo dagiti kakabsatna. Nabaknang koma ti dagana kadagiti kayo ti olibo.

²⁵Masalakniban koma dagiti ilina kadagiti landok a ruangan; kanayon koma a natalged ti biagna.”

²⁶Dakayo nga Israelita, awan ti Dios a kas iti Diosyo, sidadayag nga aglasat iti langit, lasatenna dagiti ulep nga umay tumulong kadakayo.

²⁷Ti Dios ti kanayon a nangsalsalaknib kadakayo, dagiti agnanayon a takkiagna ti mangtapaya kadakayo. Pinagtalawna dagiti kabusoryo iti isusungadyo, ket imbilinna a dadaelenyo ida a sangapada.

²⁸Iti kasta, natalna ti panagbiag dagiti kaputotan ni Jacob, ket natalgedda iti daga nga aglaplapusanan iti makan ken arak, daga a kanayon a malinlinnaawan.

²⁹Naggasatka ketdin, O Israel! Awan ti nasion a kas kenka nga insalakan ti Apo. Ti Apo a mismo ti kalasag ken kampilanmo; salakniban ken pagballigiennaka. Umayto dagiti kabusormo a dumawat iti kaasim, ket baddebaddekemto ida.