Read Iloko Deuteronomy 4 Bible Online

Deuteronomy 4 - Iloko bible

Deuteronomy 4

¹Kinuna ni Moises kadagiti tattao, “Tungpalenyo dagiti annuroten ken linteg nga isurok ita kadakayo tapno mataginayonkayo a kas pagilian ket tagikuaenyonto ti daga nga ited kadakayo ti Apo a Dios dagidi kapuonanyo.

²Diyo nayonan ti bilinko kadakayo; diyo met kissayan. Tungpalenyo dagiti bilin ti Apo a Diosyo nga intedko kadakayo.

³Naimatanganyo a mismo ti inaramid ti Apo idiay Bantay Peor. Pinapatayna dagiti amin a nagrukrukbab ken ni didiosen a Baal sadiay

⁴ngem dakayo a napudno iti Apo a Diosyo, sibibiagkayo pay laeng agpapan ita.

⁵“Insurok kadakayo dagiti amin a linteg, kas imbaga kaniak ti Apo a Diosko. Tungpalenyo dagitoy a bilin inton addakayon iti daga a dandaniyon rauten ken sakupen.

⁶Tungpalenyo ida a sipapasnek tapno maiparangarang kadagiti tattao kadagiti sabali a pagilian ti kinasiribyo. Inton madamagda amin dagitoy a linteg, kunadanto, ‘Masirib ken mannakaawat unay daytoy naindaklan a nasion!’

⁷“Awan ti sabali a nasion, uray kasano ti kinatan-okna, ti addaan iti dios nga asideg kadakuada no masapulda ti tulongna a kas iti Apo a Diostayo. Ipangagnatayo no agpatulongtayo kenkuana.

⁸Awan sabali a nasion, uray kasano ti kinatan-okna, ti addaan kadagiti linteg nga awan idumdumana a kas kadagiti insurok kadakayo ita nga aldaw.

⁹Masapul nga agannadkayo! Diyo ipalubos a malipatanyo dagiti nakitayo iti unos ti panagbiagyo. Ibagayo kadagiti annak ken appokoyo

¹⁰ti maipapan iti daydi nga aldaw a nagtakderkay iti imatang ti Apo a Diosyo idiay Bantay Sinai, idi kinunana kaniak, ‘Ummongem dagiti tattao iti sangoanak tapno mangngegda ti ibagak; iti kasta, masursuroda ti agbuteng kaniak bayat ti panagbiagda ken tapno isurodanto dagiti annakda nga agbuteng kaniak.’

¹¹“Napankayo idi nagtakder iti puon ti bantay a nakumotan iti napuskol nga ulep ken nangisit nga asuk. Gumilgil-ayab idi ti bantay ket uray la dumanon iti tangatang ti apuyna.

¹²Ket nagsao kadakayo ti Apo manipud iti apuy; nangngegyo ti timek ngem diyo nakita ti nagsao.

¹³Impakaammona ti katulaganna kadakayo ket imbilinna a tungpalenyo dagiti Sangapulo a Bilin nga insuratna iti dua a tapi ti bato.

¹⁴Imbaga met kaniak ti Apo nga isurok kadakayo dagiti amin nga annuroten ken linteg a masapul a tungpalenyo iti daga a dandaniyon rauten ken sakupen.”

¹⁵Intuloy ni Moises, “Idi nagsao kadakayo ti Apo manipud iti apuy idiay Bantay Sinai, awan ti nakitayo a langa. Ngarud, para iti pagimbaganyo, diyo ipalubos

¹⁶nga agbasolkayo babaen iti panagaramidyo iti imahen iti uray ania a forma—babai man wenno lalaki,

¹⁷animal wenno tumatayab,

¹⁸agkarkarayam iti daga wenno ikan.

¹⁹Dikay masulisog nga agrukbab ken agserbi iti makitayo iti tangatang—ti init, ti bulan ken dagiti bituen. Intuding ti Apo a Diosyo a pagdaydayawan dagitoy dagiti sabali a tattao.

²⁰Ngem inruarnakay idiay Egipto, dayta umap-apuy nga urno, tapno agbalinkay a tattaona a kas iti agdama.

²¹Gapu kadakayo, kinapungtotnak ti Apo a Diosyo ket insapatana a diak bumallasiw iti Karayan Jordan tapno sumrekak iti nadam-eg a daga nga itedna a tagikuaenyo.

²²Masapul a matayakto iti daytoy a daga ket diakto bumallasiw iti karayan. Ngem dandani bumallasiwkayon tapno sakupenyo dayta nadam-eg a daga.

²³Agannadkayo. Diyo liplipaten ti nakitulagan kadakayo ti Apo a Diosyo. Dikay agaramid iti ladawan a pagdaydayawanyo, kas iti iparitna kadakayo.

²⁴Mayarig ti Apo a Diosyo iti gumilgil-ayab nga apuy ket dina kayat nga adda kasalisalna iti panagayatyo.

²⁵“Uray nabayagkayton iti daga ket addan annak ken appokoyo, dikay agbasol babaen iti panagaramidyo iti uray ania a kita ti ladawan a pagdaydayawan. Dakes daytoy iti imatang ti Apo ket isu ti pakaigapuan ti panagpungtotna.

²⁶No sukirendak, awagak ti langit ken daga nga agsaksi a maibusor kadakayo ket mapukawkayo a mamimpinsan iti daga. Ababanto ti panagbiagyo iti daga a dandaniyo sakupen iti ballasiw ti Jordan. Madadaelkayto a mamimpinsan.

²⁷Iwarawaranakayto ti Apo kadagiti sabali a nasion; manmanonto kadakayo ti makalasat sadiay.

²⁸Agserbikayto kadagiti didiosen nga aramid ti tao, didiosen a kayo ken bato, didiosen a di makakita wenno makangngeg, di mangan wenno makaangot.

²⁹Sadiay, sapulenyonto ti Apo a Diosyo; no birokenyo iti amin a pusoyo, masarakanyonto.

³⁰Ngem no dumteng ti riribuk ket mapasamak amin dagitoy kadakayo, agsublikayto met laeng iti Apo ket agtulnogkayo kenkuana.

³¹Manangngaasi a Dios ti Apo. Dinakayto baybay-an wenno dadaelen ket dinanto malipatan ti katulaganna kadagidi kapuonanyo.

³²“Sukimatenyo ti amin a pakasaritaan, manipud iti tiempo a panangparsua ti Dios iti tao iti rabaw ti daga. Sukimatenyo ti entero a lubong. Adda kadin naindaklan a banag a kas iti daytoy a napasamak idi? Adda kadin pasamak a kas iti daytoy?

³³Malaksid kadakayo, adda kadin nakangngeg iti dios a nagsao kadakuada?

³⁴Wenno adda kadin uray ania a dios a nakaitured a nangala kadagiti tattao iti sabali a pagilian tapno pagbalinenna ida a kukuana a kas iti inaramid kadakayo ti Apo a Diosyo idiay Egipto? Nakitayo ti panangaramatna iti naindaklan a pannakabalinna ket inyegna dagiti didigra ken gubat, dagiti milagro ken datdatlag ken dagiti nakabutbuteng a pasamak.

³⁵Impakita ti Apo daytoy kadakayo tapno paneknekanna nga isu laeng ti Dios ket awanen ti sabali.

³⁶Impangngegna kadakayo ti timekna manipud langit tapno maisuronakayo; ditoy daga, impakitana kadakayo ti nasantoan nga apuyna ket manipud iti daytoy nga apuy nakisao kadakayo.

³⁷Gapu ta impatpategna dagiti kapuonanyo, pinilina dagiti kaputotanda ket babaen iti nabileg a pannakabalinna, isu a mismo ti nangiruar kadakayo idiay Egipto.

³⁸Iti isusungadyo, pinaksiatna dagiti nasion a dakdakkel ken nabilbileg ngem dakayo tapno makastrekkayo a mangtagikua iti dagada, ti daga a kukuayo agpapan ita.

³⁹Ngarud, ammoenyo ita nga aldaw a ti Apo ti Dios sadi langit ken ditoy daga ket awanen sabali.

⁴⁰Tungpalenyo dagiti bilinna nga intedko kadakayo ita nga aldaw tapno kanayon a narang-aykayo agraman dagiti kaputotanyo ken kukuayonto nga agnanayon ti daga nga ited kadakayo ti Apo a Diosyo.”

⁴¹Nangilasin ni Moises iti tallo a siudad iti daya ti Karayan Jordan.

⁴²Agpaay dagitoy a pagkamangan ti siasinoman a makapatay iti padana nga Israelita a saanna a kabusor. No agkamang iti maysa kadagitoy a siudad, awan ti pakaan-annoanna ket saan a mapapatay.

⁴³Iti tribu ti Ruben, adda ti siudad ti Beser iti nangato a tanap; iti tribu ti Gad, adda ti Ramot iti sakup ti Galaad; ken iti tribu ti Manases, adda ti Golan iti sakup ti Basan.

⁴⁴Inted ni Moises dagiti linteg ken pannursuro ti Dios kadagiti Israelita.

⁴⁵Naited dagitoy a linteg kalpasan ti iruruarda idiay Egipto ket nakadanondan iti tanap iti daya ti Karayan Jordan iti kasumbangir ti ili ti Bet-peor. Masarakan ti tanap iti sakup ni Sihon nga ari dagiti Amorreo a nagturay iti ili ti Hesbon. Pinarmek ni Moises ken dagiti Israelita ti ari kalpasan ti ipapanawda idiay Egipto.

⁴⁶

⁴⁷Sinakupda ti dagana ken ti daga ni Og nga ari ti Basan. (Dagitoy dagiti dua nga ari dagiti Amorreo a nagnaed iti daya ti Jordan.)

⁴⁸Aglayon daytoy a daga manipud iti ili ti Aroer iti igid ti Karayan Arnon agingga iti Bantay Sirion, kayatna a sawen, Bantay Hermon,

⁴⁹agraman ti amin a daga iti daya ti Karayan Jordan agingga iti Natay a Baybay ken ti arisadsad ti Bantay Pisga.