Read Iloko Deuteronomy 6 Bible Online

Deuteronomy 6 - Iloko bible

Deuteronomy 6

¹“Dagitoy dagiti bilin ken linteg nga intuyang kadakayo ti Apo a Diosyo. Masapul a sursuroen ken tungpalenyo dagitoy iti daga a dandaniyon serken ken tagikuaen.

²Bayat ti panagbiagyo, masapul nga agbutengkayo iti Apo a Diosyo ket tungpalenyo dagiti amin a lintegna nga itedko kadakayo tapno napautto ti panagbiagyo sadiay.

³Dumngegkayo, dakayo nga Israelita, ket ikagumaanyo a tungpalen dagitoy tapno nasayaatto ti kasasaadyo. Agbalinkayto a nabileg a nasion ken agnaedkayto iti nadam-eg ken nabaknang a daga, kas inkari ti Apo a Dios dagiti kapuonantayo.

⁴“Tattao ti Israel, laglagipenyo daytoy! Ti Apo a Diostayo ket isu laeng ti Apo.

⁵Ayatenyo ti Apo a Diosyo iti amin a pusoyo, iti amin a kararuayo, ken iti amin a pigsayo.

⁶Diyo lipaten dagitoy a bilin nga itedko kadakayo ita nga aldaw.

⁷Isuroyo dagitoy kadagiti annakyo. Saritaenyo ida no addakayo iti taengyo wenno addakayo iti kalsada, no inkay maturog ken no bumangonkayo iti bigat.

⁸Igalutyo ida kadagiti takkiagyo a kas pagilasinan ken ikabilyo ida kadagiti mugingyo kas marka.

⁹Isuratyo ida kadagiti baotek ti balayyo ken kadagiti ruanganyo.”

¹⁰“Kas inkari ti Apo a Diosyo kadagiti kapuonanyo, da Abraham, Isaac ken Jacob, ikkannakayo iti daga nga addaan iti dadakkel ken narang-ay a siudad a dikay binangon.

¹¹Mapnonto dagiti balay iti agkakaimbag a bambanag a diyo nagrigatan. Addanto dagiti bubon a diyo nagkali ken kaubasan ken kaoliboan a namulaanen. Inton yegnakayo ti Apo iti daytoy a daga ket adda amin a kayatyo a kanen,

¹²ikagumaanyo a diyo lipaten ti Apo a nangiruar kadakayo idiay Egipto a nakatagabuanyo.

¹³Agbutengkayo iti Apo a Diosyo! Agdaydayawkayo kenkuana ket ti laeng naganna ti aramatenyo no agkarikayo.

¹⁴Dikay agrukbab kadagiti sabali a didiosen, iti uray ania a didiosen dagiti tattao iti likmutyo.

¹⁵No agrukbabkayo kadagiti didiosen, agdissuorto ti pungtot ti Apo ket kaslanto apuy a mangibus kadakayo. Ngamin, naimon ti Apo a Diosyo; dina ipalubos nga adda kasalisalna.

¹⁶“Diyo suoten ti Apo a Diosyo a kas iti inaramidyo idiay Massa.

¹⁷Ikagumaanyo a tungpalen ti amin a linteg nga intedna kadakayo.

¹⁸Aramidenyo ti nalinteg ken naimbag iti imatang ti Apo tapno rumang-aykayo ken matagikuayo ti nadam-eg a daga nga inkari ti Apo kadagiti kapuonanyo.

¹⁹Paksiatenyonto dagiti kabusoryo, kas inkarina.

²⁰“Iti masakbayan, saludsodento dagiti annakyo, ‘Apay nga imbilin ti Apo a Diostayo a tungpalentayo amin dagitoy a linteg?’

²¹Kastoyto ti isungbatyo kadakuada, ‘Tagabukami idi ti ari ti Egipto ket inispalnakami ti Apo babaen iti naindaklan a pannakabalinna.

²²Nakitami dagiti milagro ken nakabutbuteng a banag nga inaramidna kadagiti Egipcio ken iti arida ken amin nga ofisialesna.

²³Inruarnakami idiay Egipto tapno ipannakami iti daga nga inkarina kadagidi kapuonantayo.

²⁴Imbilin ti Apo a Diostayo a tungpalenmi amin a lintegna ken agbutengkami kenkuana tapno kanayonto nga aywananna ti nasiontayo ket pagtalinaedanna a narang-ay.

²⁵Maragsakanto ti Dios kadatayo no napudnotayo nga agtungpal kadagiti amin nga imbilinna kadatayo.’”