Read Iloko Deuteronomy 8 Bible Online

Deuteronomy 8 - Iloko bible

Deuteronomy 8

¹“Tungpalenyo a sipapasnek ti amin a bilinko kadakayo ita nga aldaw tapno umatiddog ti biagyo, umadukayo ken sakupenyo ti daga nga inkari ti Apo kadagidi kapuonanyo.

²Lagipenyo ti panangidalan ti Apo a Diosyo kadakayo iti nabayag a panagdaliasatyo iti let-ang iti uneg ti 40 a tawen. Sinuotnakayo tapno maammoanna no ania ti adda iti pusoyo ken no tungpalenyo dagiti bilinna.

³Pinagbisinnakayo, sanakayo met la inikkan iti mana, maysa a taraon a diyo pay naramramanan uray dagidi kapuonanyo. Inaramidna daytoy tapno masursuroyo a saan la a tinapay ti pagbiag ti tao no di pay ket dagiti amin a sao ti Dios.

⁴Iti uneg ti 40 a tawen, saan a narunot dagiti pagan-anayyo wenno limteg dagiti dapanyo.

⁵Laglagipenyo a disiplinaennakayo ti Apo a Diosyo a kas iti panangdisiplina ti ama iti anakna.

⁶Tungpalenyo dagiti bilin ti Apo: agbiagkayo a kas mayannurot kadagiti lintegna ken agbutengkayo kenkuana.

⁷Ipannakayo ti Apo a Diosyo iti nadam-eg a daga—maysa a daga nga addaan kadagiti karayan ken ubbog ken burayok nga agayus kadagiti tanap ken turod.

⁸Nawadwad ti daga iti trigo ken sebada, ubas, igos, granada, olibo ken diro.

⁹Sadiay, dikayto agbisin ket addanto amin a masapulyo. Pagminasan iti pirak ken gambang dagiti turodna.

¹⁰Addanto amin a kayatyo a kanen, ket agyamankayto iti Apo a Diosyo gapu iti nadam-eg a daga nga intedna kadakayo.”

¹¹“Diyo lipaten ti Apo a Diosyo; tungpalenyo dagiti amin a lintegna nga intedko kadakayo ita nga aldaw.

¹²Inton narang-ayen ti panagbiagyo, inton agnaedkayon kadagiti napipintas a balay,

¹³inton adun dagiti baka ken karneroyo, pirak ken balitokyo, ket adun ti sanikuayo,

¹⁴saankayo nga agpalangguad. Diyo lipaten ti Apo a Diosyo a nangispal kadakayo idiay Egipto a nakatagabuanyo.

¹⁵Indalannakayo iti dayta nalawa ken nakabutbuteng a let-ang nga umok dagiti nagita nga uleg ken manggagama. Natikag ken awan danum ti daga, ngem pinagpussuakna ti dakkel a bato tapno adda danum nga inumenyo.

¹⁶Iti let-ang, tinaraonannakayo iti mana, maysa a kita ti taraon a dipay naramramanan dagidi kapuonanyo. Pinagsagabanakayo tapno suotennakayo, ket iti kasta, iti kamaudianna, paraburannakayo iti agkakaimbag a banag.

¹⁷Ngarud, diyo ipagarup a bimmaknangkayo iti bukodyo a pannakabalin.

¹⁸Laglagipenyo a ti Apo a Diosyo ti mangted kadakayo iti bileg tapno bumaknangkayo. Aramidenna daytoy gapu ta napudno pay laeng agpapan ita iti nakitulaganna kadagidi kapuonanyo.

¹⁹No lipatenyo ti Apo a Diosyo, ket agdaydayaw ken agserbikayo kadagiti sabali a didiosen, ballaagankayo ita nga aldaw nga awan duadua a madadaelkayto.

²⁰No sukirenyo ti Apo, madadaelkayto a kas kadagita a nasion a dadaelennanto bayat ti isusungadyo.”