Read Iloko Deuteronomy 9 Bible Online

Deuteronomy 9 - Iloko bible

Deuteronomy 9

¹“Dumngegkayo, tattao iti Israel! Ita nga aldaw, bumallasiwkayo iti Karayan Jordan ket sakupenyo ti daga dagiti nasion a nabilbileg ngem dakayo ken dagiti siudad a nabakudan kadagiti nangato a pader.

²Natatayag ken napipigsa dagiti agnaed kadagitoy a siudad. Higanteda ket nadamdamagyon nga awan ti makabael a sumaranget kadakuada.

³Ngem ita, makitayon a mismo nga umun-una ngem dakayo ti Apo a Diosyo. Mayarig iti gumilgil-ayab nga apuy. Paksiatennanto dagiti higante bayat ti isusungadyo, tapno maparmekyo ida ket nalakayo ida a dadaelen, a kas inkarina.

⁴“Kalpasan ti panangpaksiat ti Apo a Diosyo kadakuada, diyo kuna nga impannakayo iti daytoy a daga tapno tagikuaenyo gapu iti kinalintegyo. Saan a daytoy ti gapuna, ngem parmeken ti Apo dagitoy a tattao gapu ta dakesda.

⁵Saan a gapu ta naimbagkayo ket nasayaat ti aramidyo nga ipalubos ti Apo a tagikuaenyo ti dagada. Pagtalawenna ida gapu iti kinadakesda ken tapno matungpal ti karina kada Abraham, Isaac ken Jacob a kapuonanyo.

⁶Ammoenyo a saan a gapu iti kinalintegyo nga ited ti Apo a Diosyo kadakayo daytoy a daga. Kinapudnona, nasukirkayo a tattao.

⁷“Diyo liplipatan a pinagpungtotyo ti Apo a Diosyo idiay let-ang. Manipud pimmanawkayo idiay Egipto agingga iti isasangpetyo ditoy, sinuksukiryon ti Apo.

⁸Uray idiay Bantay Sinai, pinagpungtotyo ti Apo. Kasta unay ti ungetna idi ket pinanggepnakayo a dadaelen.

⁹Simmang-atak iti bantay tapno awatek dagiti tapi a bato a nakailanadan ti katulagan ti Apo kadakayo. Nagyanak sadiay iti 40 nga aldaw ken rabii ket diak nangnangan wenno immin-inum.

¹⁰Kalpasanna, inted kaniak ti Apo dagiti dua a tapi a bato. Inlanadna ditoy iti bukodna nga ima ti imbagana kadakayo manipud iti apuy iti dayta nga aldaw a naummongkayo iti arisadsad ti bantay.

¹¹Kalpasan dagita uppat a pulo nga aldaw ken rabii, inted ti Apo kaniak dagiti dua a tapi a bato a nakaisuratan ti tulag.

¹²“Kinuna kaniak ti Apo, ‘Darasem ti sumalog, gapu ta nagbalin a dakes dagiti tattaom nga inruarmo idiay Egipto. Nalipatanda dagiti wagas nga imbilinko a surotenda. Nagaramidda iti imahen a pagrukrukbabanda!’

¹³“Kinuna pay kaniak ti Apo: ‘Ammok a nasukir dagitoy a tattao.

¹⁴Dinak lapdan. Panggepko a dadaelen ida tapno awanen ti makalagip kadakuada. Kalpasanna, pagbalinenkanto nga ama ti maysa a nasion a dakdakkel ken nabibileg ngem isuda.’

¹⁵“Simmalogak ngarud a siaawit kadagiti dua a tapi a bato a nakaisuratan ti tulag; gumilgil-ayab idi ti bantay.

¹⁶Nakitak a sinukiryo ti bilin kadakayo ti Apo a Diosyo. Nagbasolkayo kenkuana gapu iti panangsukogyo iti balitok a sinan-toro a pagdaydayawanyo.

¹⁷Imbarsakko ngarud dagiti tapi a bato iti sangoananyo ket naburburakda.

¹⁸Kalpasanna, nagpaklebak manen iti imatang ti Apo ket saanak a nangan ken imminum iti las-ud ti 40 nga aldaw ken rabii. Inaramidko daytoy gapu ta nagbasolkayo iti Apo ket pinagpungtotyo.

¹⁹Nagbutengak ta amangan no pukawennakayo ti Apo gapu iti bumarbara a pungtotna. Ngem impangagnak manen ti Apo.

²⁰Nakapungtot met ti Apo ken ni Aaron ket kayatna idi a pukawen. Iti kasta, indawdawatak met ni Aaron.

²¹Innalak dayta makarimon a banag nga inaramidyo—ti balitok a sinan-toro—ket impurruakko iti apuy. Binurburakko agingga a timmapok ket imbellengko iti ubbog nga aggapu iti bantay.

²²“Saan la a dayta. Pinagpungtotyo ti Apo a Diosyo idi addakayo idiay Tabera, Massa ken Kibrot Hataava.

²³Idi imbaonnakayo manipud Kades Barnea tapno inkay tagikuaen ti daga nga intedna, sinukiryo ti bilinna ket dikay nagtalek wenno nagtulnog kenkuana.

²⁴Sinuksukiryon ti Apo manipud pay naam-ammokayo.

²⁵“Ngarud, nagpaklebak iti imatang ti Apo iti las-ud ti 40 nga aldaw ken rabii, gapu ta inkeddengna a pukawennakayo.

²⁶Inkararagko: ‘Apo Dios, pangngaasim ta dimo pukawen dagitoy a tattaom; kukuam ida. Inruarmo ida idiay Egipto babaen iti naindaklan a bileg ken pannakabalinmo.

²⁷Laglagipem dagiti adipenmo, da Abraham, Isaac ken Jacob; dimo ikankano ti kinasukir, ti kinadakes ken ti basol dagitoy a tattao.

²⁸No kasta ti aramidem, kunanto dagiti Egipcio a dimo kabalen nga ipan dagiti tattaom iti daga nga inkarim kadakuada. Kunadanto nga impanmo ida iti let-ang tapno matayda gapu iti guram kadakuada.

²⁹Ngem pinilim ida a tattaom; inruarmo ida idiay Egipto babaen iti naindaklan a bileg ken pannakabalinmo.’”