Read Iloko John 1 Bible Online

John 1 - Iloko bible

John 1

¹Idi punganay, addan ti Sao, ket ti Sao kadua ti Dios, ket ti Sao, Dios.

²Manipud idi punganay, ti Sao kadua ti Dios.

³Pinarsua ti Dios dagiti isuamin babaen kenkuana. Ket awan ti naparsua no saan a gapu kenkuana.

⁴Ti Sao isu ti gubbuayan ti biag, ket daytoy a biag isu ti silaw dagiti tattao.

⁵Agraniag ti silaw iti sipnget, ket di mabalinan ti sipnget nga iddepen.

⁶Imbaon ti Dios ti maysa a tao nga agnagan iti Juan.

⁷Immay a mangpaneknek kadagiti tattao maipapan iti silaw tapno mangngegda ti mensahe ket mamatida.

⁸Saan nga isu a mismo ti silaw, ngem immay tapno paneknekanna ti maipapan iti silaw.

⁹Daytoy ti pudno a silaw, ti silaw nga umay ditoy lubong ken manglawag kadagiti amin a tattao.

¹⁰Adda idin ti Sao ditoy lubong. Pinarsua ti Dios ti lubong babaen kenkuana; nupay kasta, saan a binigbig ti lubong.

¹¹Napan iti ilina, ngem saan nga inawat dagiti kailianna.

¹²Ngem adda met dagiti immawat ken namati kenkuana, isut' gapuna nga inikkanna ida iti kalintegan nga agbalin nga annak ti Dios.

¹³Saanda a nagbalin nga annak ti Dios kas iti gagangay a pannakaipasngay ti tao; ta ti Dios a mismo ti Amada.

¹⁴Nagbalin a tao ti Sao ket nakipagtaeng kadatayo; napnoan iti parabur ken kinapudno. Nakitami ti dayagna, ti dayag nga inawatna kas kakaisuna nga Anak ti Ama.

¹⁵Pinaneknekan ni Juan ti maipapan kenkuana ket impukkawna: “Isu daytoy ti ibagbagak idi kinunak, ‘Umay a sumarsaruno kaniak, nupay kasta, natantan-ok ngem siak, ta addan sakbay a nayanakak.’”

¹⁶Gapu ta nabuslon ti paraburna, inawattayo amin ti bendisionna. Wen, nawadwad a bendision ti impaayna kadatayo.

¹⁷Inted ti Dios ti Linteg babaen ken ni Moises, ngem immay ti parabur ken kinapudno babaen ken Jesu-Cristo.

¹⁸Awan pay ti nakakita iti Dios. Ti laeng Bugbugtong nga Anak, a kadua ti Ama, isu ti nangipakaammo kenkuana.

¹⁹Nangibaon dagiti Judio a papangulo idiay Jerusalem iti sumagmamano a papadi ken Levita a mapan ken ni Juan tapno saludsodenda kenkuana, “Siasinoka?”

²⁰Saan a nagkedked ni Juan a nangibaga iti pudno, “Saan a siak ti Cristo,” kinunana a sibabatad.

²¹“Siasinoka ngarud?” sinaludsodda manen. “Sika kadi ni Elias?” “Saan,” insungbat ni Juan. “Sika kadi ti Profeta?” kinunada. “Saan,” insungbatna.

²²“Ibagam ngarud no siasinoka,” kinunada. “Masapul nga adda isungbatmi kadagiti nangibaon kadakami. Ania ti masaom maipapan kenka?”

²³Simmungbat ni Juan babaen iti panangibagana iti padto ni profeta Isaias: “Siak ti timek ti maysa nga agpukpukkaw iti let-ang: ‘Palintegenyo ti dalan a pagnaan ti Apo!’”

²⁴Adda met dagiti Fariseo a naibaon ken ni Juan.

²⁵Sinaludsodda ngarud kenkuana, “No saan a sika ti Cristo, wenno ni Elias, wenno ti Profeta, apay ngarud a mamumbuniagka?”

²⁶“Mamumbuniagak iti danum,” insungbat ni Juan, “ngem makipulpulapol kadakayo ti maysa a diyo am-ammo.

²⁷Sumarsaruno kaniak, ngem diak pay maikari a mangwarwar iti sandaliasna.”

²⁸Napasamak amin dagitoy idiay Betania, iti ballasiw ti karayan Jordan a pangbumbuniagan ni Juan.

²⁹Iti sumuno nga aldaw, nakita ni Juan nga agturong ni Jesus iti yanna. “Daytoy ti Kordero ti Dios a mangikkat iti basol ti lubong!” kinuna ni Juan.

³⁰“Isu daytoy ti sarsaritaek idi kinunak, ‘Sumarsaruno kaniak ti maysa a tao a natantan-ok ngem siak, ta addan sakbay a nayanakak.’

³¹Diak am-ammo idi no siasino, ngem immayak mamuniag iti danum tapno ipakaammok iti Israel.”

³²Daytoy ti pammaneknek nga inted ni Juan: “Nakitak ti Espiritu a bumabbaba a kasla kalapati manipud langit ket nagdisso kenkuana.

³³Diak pay am-ammo idi no siasino, ngem ti Dios a nangibaon kaniak a mamuniag iti danum, kinunana kaniak, ‘Makitamto ti Espiritu a bumaba ken agdisso iti maysa a tao. Daytoy ti mamuniag iti Espiritu Santo.’

³⁴Wen, nakitakon daytoy, ket paneknekak kadakayo nga isu ti Anak ti Dios.”

³⁵Iti sumuno nga aldaw, agtaktakder manen ni Juan ken ti dua kadagiti adalanna.

³⁶Idi makitana a lumabas ni Jesus, kinunana, “Daytoy ti Kordero ti Dios!”

³⁷Nangngeg dagiti dua nga adalan ti kinuna ni Juan, ket sinurotda ni Jesus.

³⁸Idi tumalliaw ni Jesus, nakitana ida a sumursurot kenkuana. “Ania ti sapsapulenyo?” sinaludsodna. “Sadino ti pagtaengam, Rabbi?” insungbatda. (“Maestro” ti kayat a sawen ti “Rabbi.”)

³⁹“Umayyo kitaen,” kinuna ni Jesus kadakuada. Nakikuyogda ken ni Jesus ket nakitada ti pagtaenganna. Gapu ta dandanin alas kuatro iti malem, nakidagusda kenkuana.

⁴⁰Ni Andres a kabsat ni Simon Pedro ti maysa kadagiti dua a nakangngeg iti imbaga ni Juan ken simmurot ken ni Jesus.

⁴¹Sinapulna a dagus ni Simon a kabsatna ket imbagana kenkuana, “Nasarakanmi ti Mesias!” (Kayatna a sawen, “Cristo.”)

⁴²Impanna ni Simon iti ayan ni Jesus. Minatmatan ni Jesus ni Simon sana kinuna, “Sika ni Simon nga anak ni Juan. Managanankanto iti Cefas.” (Kayatna a sawen, “Bato” wenno “Pedro.”)

⁴³Iti sumuno nga aldaw, inkeddeng ni Jesus ti mapan idiay Galilea. Nasarakanna sadiay ni Felipe ket kinunana kenkuana, “Surotennak.”

⁴⁴Taga-Betsaida ni Felipe, iti ili da Andres ken Pedro.

⁴⁵Nasarakan ni Felipe ni Natanael ket kinunana kenkuana, “Nasapulanmi ti tao a sinarita ni Moises iti libro ti Linteg, ken dagiti Profeta. Isu ni Jesus a taga-Nazaret nga anak ni Jose.”

⁴⁶“Adda aya naimbag a tumaud idiay Nazaret?” sinaludsod ni Natanael. “Umaymo kitaen,” insungbat ni Felipe.

⁴⁷Idi makita ni Jesus nga agturong ni Natanael iti ayanna, kinunana maipapan kenkuana, “Adtoy ti pudno nga Israelita. Awan kenkuana ti aniaman a kinaulbod.”

⁴⁸“Kasano ti pannakaam-ammom kaniak?” sinaludsod ni Natanael. “Nakitaka idi addaka iti sirok ti kayo nga igos, sakbay nga inayabannaka ni Felipe,” insungbat ni Jesus.

⁴⁹“Maestro,” insungbat ni Natanael. “Sika ti Anak ti Dios! Sika ti Ari ti Israel!”

⁵⁰“Mamatika kadi gapu ta kinunak a nakitaka iti sirok ti kayo nga igos?” kinuna ni Jesus. “Makitamto dagiti daddadakkel pay a bambanag ngem daytoy!”

⁵¹Ket kinunana kadakuada, “Ibagak kadakayo ti pudno: makitayonto nga aglukat ti langit ken dagiti angheles ti Dios nga umuli-umulog iti ayan ti Anak ti Tao.”