Read Iloko John 10 Bible Online

John 10 - Iloko bible

John 10

¹Sinarita ni Jesus daytoy a pangngarig kadakuada: “Ibagak ti pudno kadakayo: Ti tao a saan a sumrek iti ruangan ti pagaponan dagiti karnero, ngem kumalay-at ketdi iti sabali a pagnaan, maysa a mannanakaw ken tulisan.

²Ti sumrek iti ruangan, isu ti pastor dagiti karnero.

³Isu ti ilukatan ti agay-aywan iti ruangan. Denggen dagiti karnero ti timekna no awaganna dagiti nagnaganda, ket iruarna ida.

⁴No mairuarnan dagiti karnero, magna iti sangoda ket sumurotda kenkuana, agsipud ta mailasinda ti timekna.

⁵Saanda a sumurot iti ganggannaet no di ket itarayanda, agsipud ta saanda a mailasin ti timekna.”

⁶Ngem saan a naawatan dagiti tattao ti kaipapanan daytoy a pangngarig.

⁷Kinuna manen ni Jesus kadakuada, “Ibagak ti pudno kadakayo: Siak ti ruangan a pagserkan dagiti karnero.

⁸Mannanakaw ken tulisan dagiti amin nga immay nga immun-una ngem siak, ngem saan a dinengngeg ida dagiti karnero.

⁹“Siak ti ruangan. Maisalakanto ti siasinoman a sumrek kaniak; sumrek ken rummuarto ket makasarakto iti pagaraban.

¹⁰Umay ti tulisan tapno agtakaw, agpapatay ken agdadael. Immayak tapno maaddaankay iti biag—biag nga awan pagkuranganna.

¹¹“Siak ti naimbag a pastor. Ti naimbag a pastor itedna ti biagna nga agpaay kadagiti karnerona.

¹²Ti makitangtangdan panawan ken itarayanna dagiti karnero no makitana nga umay ti lobo, ta saan a pastor ken saanna a kukua ida.

¹³Agtaray ti makitangtangdan agsipud ta patangtangdanan laeng ket awan ti panangisakitna kadagiti karnero.

¹⁴“Siak ti naimbag a pastor. Am-ammonak ti Ama, ket am-ammok met ti Ama. Am-ammok dagiti karnerok ket am-ammodak met. Madadaanak a mangipaay iti biagko gapu kadakuada.

¹⁶Adda pay dagiti karnerok nga awan ditoy a pagaponan. Masapul nga yaponko met ida. Ipangagdanto ti timekko, ket agbalindanton a maymaysa nga arban nga aywanan ti maymaysa a pastor.

¹⁷“Ay-ayatennak ti Ama agsipud ta sisasaganaak a mangipaay iti biagko, tapno alaekto met laeng.

¹⁸Awan ti makaala iti biagko. Itedko kas pagayatak. Adda kalintegak a mangited iti biagko, ket adda met kalintegak a mangala met laeng. Daytoy ti imbilin ti Amak nga aramidek.”

¹⁹Rimsua manen ti panagsusupadi kadagiti Judio gapu kadagitoy a sasao.

²⁰Adu kadakuada ti nagkunkuna, “Linuganan ti demonio. Agmauyong! Apay a dumngegkayo kenkuana?”

²¹Ngem kinuna ti dadduma, “Saan a kastoy ti panagsao ti linuganan ti demonio! Mabalin aya ti demonio ti mangted iti panagkita kadagiti bulsek?”

²²Tiempo ti lam-ek idi rambakanda ti Fiesta ti Panagidaton idiay Jerusalem.

²³Magmagna ni Jesus iti Pasilio ni Solomon idiay Templo

²⁴idi inaribungbongan dagiti tattao. “Kaanonto aya ti panangibagam iti pudno?” sinaludsodda kenkuana. “Ibagamon ti agpayso! Sika kadi ti Cristo?”

²⁵“Imbagakon kadakayo,” insungbat ni Jesus, “ngem didak met patien. Dagiti aramidko babaen iti turay ni Amak ti mangpaneknek iti maipapan kaniak.

²⁶Ngem dikayo mamati, ta saan a dakayo ti karnerok.

²⁷Denggen dagiti karnerok ti timekko. Ammok ida, ket surotendak.

²⁸Ikkak ida iti biag nga agnanayon, ket pulos a didanto matay. Awan ti makarabsut kadakuada kaniak.

²⁹Natantan-ok ti inted kaniak ni Amak ngem dagiti isuamin, ket awan ti makarabsut kadakuada iti panangaywan ti Ama.

³⁰Siak ken ti Ama, maymaysakami.”

³¹Pimmidut manen dagiti tattao kadagiti batbato a panguborda kenkuana.

³²“Adu ti naimbag nga aramid nga impaaramid kaniak ti Ama iti imatangyo,” kinuna ni Jesus kadakuada. “Ania kadagitoy ti gapu a panguboranyo kaniak?”

³³“Saandaka nga uboren gapu kadagiti naimbag nga aramid, no di ket gapu iti saom a maikontra iti Dios,” insungbatda. “Maysaka la a tao, ket pagbalinem ketdin a Dios ta bagim!”

³⁴“Naisurat iti Lintegyo a kinuna ti Dios: ‘Dakayo ket didioskayo!’” insungbat ni Jesus.

³⁵“Ammotayo nga agnanayon a pudno ti kuna ti Nasantoan a Surat, ket inawagan ti Dios a dios dagiti tattao a nakaitedan ti saona.

³⁶No maipapan kaniak, pinilinak ti Ama ket imbaonnak ditoy lubong. Gapu ta kinunak a siak ti Anak ti Dios, kunayon a nagsaoak iti maikontra iti Dios?

³⁷No diak ar-aramiden dagiti aramid ni Amak, saan koma a masapul a patiendak.

³⁸Ngem no aramidek ida, uray no didak patien, patienyo koma dagiti ar-aramidko tapno mapaneknekanyo nga adda ti Ama kaniak, ket addaak iti Ama.”

³⁹Pinadasda manen a tiliwen ngem nakalapsut kadakuada.

⁴⁰Napan manen ni Jesus iti ballasiw ti karayan Jordan, iti disso a namumbuniagan ni Juan ket nagyan sadiay.

⁴¹Adu a tattao ti napan kenkuana. “Awan ti milagro nga inaramid ni Juan,” kinunada, “ngem pudno amin nga imbagana maipapan iti daytoy a tao.”

⁴²Adu ti namati kenkuana sadiay.