Read Iloko John 11 Bible Online

John 11 - Iloko bible

John 11

¹Nagsakit ti maysa a lalaki nga agnagan iti Lazaro. Agnaed ni Lazaro iti maysa nga ili a managan Betania a pagnanaedan met da Maria ken Marta. Kakabsat ni Lazaro ida. (

²Daytoy Maria a kabsat ti masakit ti nangibukbok idi iti bangbanglo kadagiti saka ti Apo sana pinunasan iti buokna.)

³Nangibaon ngarud dagiti agkabsat iti mangipakaammo ken ni Jesus. “Apo,” pinaibagada, “masakit ti patpatgem a gayyem.”

⁴Idi mangngeg ni Jesus daytoy, kinunana, “Saan nga ipatay ni Lazaro ti sakitna. Maaramid daytoy tapno maidaydayaw ti Dios, ket isunto met ti pakaidayawan ti Anak ti Dios.”

⁵Ay-ayaten ni Jesus dagiti agkakabsat a Marta, Maria ken Lazaro.

⁶Nupay nadamagna a masakit ni Lazaro, nagyan pay laeng iti dua nga aldaw iti lugar a yanna.

⁷Kalpasanna, kinuna ni Jesus kadagiti adalanna, “Agsublitayo idiay Judea.”

⁸“Maestro,” insungbat dagiti adalan, “nabiit pay laeng a kayatdaka a batoen dagiti tattao sadiay. Apay nga inka manen sadiay?”

⁹“Saan aya nga adda sangapulo ket dua nga oras iti agmalem?” kinuna ni Jesus. “Saan a maitibkol ti tao no magna iti aldaw, ta makitana ti silaw ti lubong.

¹⁰Ngem maitibkol no magna iti rabii, ta awan ti lawag kenkuana.”

¹¹Kalpasan ti panangibaga ni Jesus iti daytoy, insarunona a kinuna, “Matmaturog ni gayyemtayo a Lazaro, ngem innak riingen.”

¹²“Apo,” insungbat dagiti adalan, “no matmaturog laeng, umimbagto.”

¹³Kayat a sawen ni Jesus a natayen ni Lazaro ngem impagarupda a nagsao maipapan iti gagangay a pannaturog.

¹⁴Iti kasta, inlawlawag ni Jesus kadakuada, “Natayen ni Lazaro.

¹⁵Ngem gapu kadakayo, maragsakanak ta awanak iti ayanna, tapno mamatikayo. Ala, intayon iti yanna.”

¹⁶Kinuna ni Tomas (a managan Singin) kadagiti kaduana nga adalan, “Intayo met tapno mairamantayo ken ni Maestro a matay!”

¹⁷Idi sumangpet ni Jesus, nadamagna nga uppat nga aldawen a naitanem ni Lazaro.

¹⁸Agtallo a kilometro ti kaadayo ti Betania manipud Jerusalem,

¹⁹ket adu a taga-Judea ti napan nangliwliwa kada Marta ken Maria gapu iti ipapatay ti kabsatda a lalaki.

²⁰Idi nadamag ni Marta a sumungsungad ni Jesus, rimmuar a nangsabat kenkuana. Ngem nagbati ni Maria iti uneg ti balay.

²¹Kinuna ni Marta ken Jesus, “Apo, no addaka koma ditoy idi, saan a natay ni kabsatko!

²²Nupay kasta, ammok nga uray ita, ited ti Dios ti aniaman a dawatem kenkuana.”

²³“Mapagungarto ni kabsatmo,” kinuna ni Jesus.

²⁴“Ammok a mapagungarto inton maudi nga aldaw,” insungbat ni Marta.

²⁵“Siak ti panagungar ken ti biag,” kinuna ni Jesus. “Ti siasinoman a mamati kaniak, uray no matay, agbiagto pay.

²⁶Ket ti siasinoman nga agbiag ken mamati kaniak, pulos a dinto matay. Patiem daytoy?”

²⁷“Wen, Apo,” insungbatna. “Patiek a sika ti Cristo, ti Anak ti Dios nga umay ditoy lubong.”

²⁸Apaman a naisao ni Marta daytoy, nagsubli ket inayabanna a sililimed ni Maria a kabsatna. “Adda ni Maestro,” kinunana, “ket paayabannaka.”

²⁹Idi mangngeg ni Maria daytoy, rimmuar a dagus a mangsabat ken Jesus. (

³⁰Saan pay a nakadanon ni Jesus iti barrio, ta adda pay laeng iti disso a nangsabatan kenkuana ni Marta.)

³¹Simmurot dagiti tattao nga adda iti balay a mangliwliwa ken ni Maria idi timmakder ken nagdardaras a rimmuar. Impagarupda a mapan agsangit ni Maria iti ayan ti tanem.

³²Apaman a nakadanon ni Maria iti ayan ni Jesus, nagparintumeng iti sakaananna ket kinunana, “Apo, no addaka koma ditoy idi, saan a natay ni kabsatko!”

³³Nakita ni Jesus nga agsangsangit ni Maria ken dagiti tattao a kimmuyog kenkuana. Natignay ti pusona ket kasta unay ti ladingitna.

³⁴“Sadino ti nangitanemanyo kenkuana?” sinaludsod ni Jesus. “Umaymo kitaen, Apo,” insungbatda.

³⁵Nagsangit ni Jesus.

³⁶Iti kasta, kinuna dagiti Judio, “Kitaenyo ti napalalo a panangipategna kenkuana!”

³⁷Ngem kinuna dagiti dadduma kadakuada, “Saan aya nga isu ti nangted iti panagkita iti daydi lalaki a bulsek? Nabalinanna koma met nga inlisi ni Lazaro iti patay.”

³⁸Kasta unay manen ti ladingit ni Jesus idi umasideg iti tanem a rukib a naserraan iti bato.

³⁹“Ikkatenyo ti bato,” imbilinna. Kinuna ni Marta a kabsat ti natay, “Apo, nabuyoken, ta uppat nga aldawnan a naitanem!”

⁴⁰“Diak kadi imbaga kenka a no mamatika, makitamto ti dayag ti Dios?” kinuna ni Jesus.

⁴¹Inikkatda ti bato. Timmangad ni Jesus ket kinunana, “Ama, agyamanak ta impangagnak.

⁴²Ammok nga ipangagnak a kanayon, ngem kunak daytoy gapu kadagitoy a tattao tapno patienda nga imbaonnak.”

⁴³Kalpasan ti panangisaona iti daytoy, impukkawna, “Lazaro, rummuarka!”

⁴⁴Rimmuar ni Lazaro. Naputipotan iti lupot dagiti ima ken sakana ken naabungotan ti rupana iti panio. “Warwarenyo dagiti patapatna,” kinuna ni Jesus, “ket palubosanyo.”

⁴⁵Adu kadagiti tattao a simmarungkar ken Maria ti nakaimatang iti inaramid ni Jesus, ket namatida kenkuana.

⁴⁶Ngem sumagmamano kadakuada ti napan kadagiti Fariseo ket impadamagda ti inaramid ni Jesus.

⁴⁷Iti kasta, nakitaripnong dagiti Fariseo ken panguloen a papadi kadagiti kamkameng ti Sanhedrin. “Ania ti aramidentayo?” kinunada. “Adu ti nakaskasdaaw nga ar-aramiden daytoy a tao!

⁴⁸No baybay-antayo, mamatinto dagiti amin a tattao kenkuana, ket umayto dagiti agtuturay a taga-Roma a mangdadael iti Templo ken iti entero a nasiontayo!”

⁴⁹Ngem nagsao ti maysa kadakuada nga agnagan Caifas, ti Kangatoan a Padi iti dayta a tawen. “Awan ammoyo,” kinunana.

⁵⁰“Saanyo aya a maawatan a nasaysayaat no matay ti maysa a tao, ngem ti madadael ti entero a nasion?”

⁵¹(Saanna a sinao daytoy a naknakemna, ngem agsipud ta isu ti Kangatoan a Padi iti dayta a tawen, impadtona ti ipapatay ni Jesus a maipaay kadagiti Judio

⁵²ket saan laeng a gapu kadakuada no di ket tapno pagkaykaysaenna amin dagiti naiwaraswaras nga annak ti Dios.)

⁵³Manipud iti dayta nga aldaw, nagtutulagan dagiti agtuturay a Judio a papatayenda ni Jesus.

⁵⁴Isut' gapuna a saanen a nagnagna a silalatak ni Jesus idiay Judea, ngem pimmanaw sadiay ket napan iti asideg ti let-ang, iti ili a managan Efraim. Nagyan sadiay agraman dagiti adalan.

⁵⁵Asideg idin ti Fiesta ti Paskua ket adu a tattao a naggapu kadagiti barbarrio ti simmang-at idiay Jerusalem tapno aramidenda ti seremonia ti pannakadalus sakbay ti fiesta.

⁵⁶Sinapsapulda ni Jesus ket idi naguurnongda idiay Templo, nagsisinnaludsodda, “Ania ti makunayo? Umay ngata makifiesta?”

⁵⁷Imbilin dagiti panguloen a papadi ken dagiti Fariseo a no adda makaammo iti ayan ni Jesus, ipakaammona koma kadakuada tapno patiliwda.