Read Iloko John 12 Bible Online

John 12 - Iloko bible

John 12

¹Innem nga aldaw sakbay ti Fiesta ti Paskua idi mapan ni Jesus idiay Betania nga ili ni Lazaro, daydi lalaki a pinagungarna.

²Insaganaanda sadiay iti pangrabii. Nagserbi ni Marta ket maysa ni Lazaro a nakisango ken ni Jesus iti panganan.

³Iti saan a mabayag, nangala ni Maria iti kagudua a litro ti nangina unay a bangbanglo a naaramid iti puro a nardo. Imbukbokna kadagiti saksaka ni Jesus sana pinunasan iti buokna. Napno ti entero a balay iti ayamuom ti bangbanglo.

⁴Maysa kadagiti adalan ni Jesus, ni Judas Iscariote a mangliputto kenkuana ti nagsao.

⁵“Apay a di nailako daytoy a bangbanglo iti 300 a denario ket maited ti kuarta kadagiti napanglaw?” kinunana.

⁶Sinaona daytoy, saan a gapu ta isakitna dagiti napanglaw, no di ket gapu ta mannanakaw. Isu ti agig-iggem iti kuarta, ket masansan a mangala iti maurnong.

⁷Ngem kinuna ni Jesus, “Palubosam a salimetmetan ni Maria ti adda kenkuana para iti aldaw a pannakaitanemko.

⁸Kankanayon nga adda dagiti napanglaw iti dennayo, ngem saan a kankanayon nga addaak iti arpadyo.”

⁹Adu a tattao ti nakadamag nga adda ni Jesus idiay Betania. Iti kasta, napanda sadiay, saan laeng a gapu ken ni Jesus, no di ket kayatda pay a kitaen ni Lazaro a pinagungarna.

¹⁰Isut' gapuna a nagtutulag dagiti panguloen a papadi a patayenda met ni Lazaro.

¹¹Gapu iti napasamak kenkuana, adu kadagiti Judio ti simmina kadagiti panguloda ket namatida ken ni Jesus.

¹²Iti sumuno nga aldaw, nadamag dagiti adu a tattao a napan dimmar-ay iti Fiesta ti Paskua a sumungsungad ni Jesus idiay Jerusalem.

¹³Iti kasta, nagalada kadagiti sangsanga ti palma ket napanda simmabat kenkuana. “Madaydayaw ti Dios!” impukpukkawda. “Bendisionan koma ti Dios ti umay iti nagan ti Apo! Bendisionan koma ti Dios ti Ari ti Israel!”

¹⁴Nakasarak ni Jesus iti urbon ti asno ket nagsakayanna, kas kuna ti Nasantoan a Surat:

¹⁵“Dika agbuteng, siudad ti Sion! Ita, umayen kenka ti Arim, A sisasakay iti urbon ti asno.”

¹⁶Iti dayta a tiempo, saan a naawatan dagiti adalanna ti kaipapanan daytoy, ngem idi naitan-oken ni Jesus, nalagipda a naisurat maipapan kenkuana ket naaramid daytoy.

¹⁷Adda idi tattao a nakaimatang ken ni Jesus idi awaganna ni Lazaro iti tanem ket pinagungarna. Impadamagda ti napasamak.

¹⁸Dayta ti gapuna nga adu a tattao ti napan simmabat kenkuana, agsipud ta nadamagda nga isu ti nangaramid iti daytoy a milagro.

¹⁹Isut' gapuna a kinunkuna dagiti Fariseo, “Makitayo, awanen ti maaramidtayo! Sumursuroten kenkuana ti sangalubongan!”

²⁰Bayat ti Fiesta, adda sumagmamano a Griego a napan nagdaydayaw idiay Jerusalem.

²¹Napanda ken ni Felipe a taga-Betsaida, iti probinsia ti Galilea. “Apo,” kinunada, “kayatmi koma a kitaen ni Jesus.”

²²Napan imbaga ni Felipe daytoy ken ni Andres, ket napanda a dua ken ni Jesus tapno ipakaammoda kenkuana.

²³Kinuna ni Jesus kadakuada, “Dimtengen ti oras a maitan-ok ti Anak ti Tao.

²⁴Ibagak ti pudno kadakayo: Saan nga umadu ti bukel ti trigo no di maregreg iti daga ket matay. Ngem no matay, agbunga iti adu.

²⁵Ti agayat iti biagna, mapukawnanto, ket ti gumura iti biagna ditoy lubong, salimetmetannanto iti biag nga agnanayon.

²⁶Ti siasinoman nga agtarigagay nga agserbi kaniak, masapul a surotennak. Ta no sadino ti ayanko, addanto met sadiay ti adipenko. Ket padayawan ti Ama ti siasinoman nga agserbi kaniak.”

²⁷Intuloy ni Jesus ti nagsao: “Ita, mariribukak. Ania ti aramidek? Kunak kadi, ‘Ama, ilisinak koma iti daytoy nga oras’? Ngem daytoy met ti gapu ti immayak tapno lasatek daytoy nga oras ti panagsagaba.

²⁸O Ama, itan-okmo ti naganmo!” Ket kinuna ti maysa a timek a naggapu sadi langit, “Intan-okkon, ket itan-okkonto manen!”

²⁹Nangngeg dagiti tattao nga agtaktakder sadiay ti timek ket impagarupda a naggurruod. “Kinasao ti maysa nga anghel!” kinuna met ti dadduma.

³⁰Ngem kinuna ni Jesus kadakuada, “Nagsao daytoy a timek saan a gapu kaniak, no di ket gapu kadakayo.

³¹“Itan ti pannakaukom daytoy a lubong. Itan ti pannakaparmek ti agturay iti daytoy a lubong.

³²Inton maibayogak ditoy daga, guyugoyekto nga umay kaniak dagiti amin a tattao.” (

³³Kinunana daytoy a pangipakaammo no kasano ti ipapatayna.)

³⁴“Kuna ti Linteg nga agbiag nga agnanayon ti Cristo,” insungbat dagiti tattao. “Apay a kunam a masapul a maibayog ti Anak ti Tao? Siasino daytoy nga Anak ti Tao?”

³⁵“Bassit laengen a tiempo ti kaadda ti silaw kadakayo,” insungbat ni Jesus. “Agawaanyo ti agbiag ta adda pay la ti silaw kadakayo tapno dinakayo makamakam ti sipnget. Ta ti magna iti sipnget, dina ammo ti turturongenna.

³⁶Ngarud, mamatikay iti silaw bayat ti kaaddana kadakayo tapno agbalinkayo a tattao ti lawag.” Idi naisaon ni Jesus daytoy, pimmanaw ket inlemmenganna ida.

³⁷Uray no inaramidna amin dagitoy a milagro iti imatangda, saanda a namati kenkuana

³⁸tapno matungpal ti kinuna ni profeta Isaias: “Apo, siasino ti namati iti mensahe nga inkasabami? Siasino ti nangipakitaan ti Apo iti pannakabalinna?”

³⁹Gapu iti daytoy, saanda a nabalinan ti namati. Ta kinuna pay ni Isaias:

⁴⁰“Pinagbulsek ti Dios ida, kinullaapanna dagiti isipda, tapno saanda a makakita, ken saanda a makaawat, ket saanda nga agsubli kaniak, kuna ti Dios, tapno paimbagek ida.”

⁴¹Kinuna ni Isaias daytoy ta nakitana ti dayag ni Jesus, ket nagsao iti maipapan kenkuana.

⁴²Uray no kasta, adu kadagiti papangulo a Judio ti namati ken ni Jesus. Ngem saanda nga inlatlatak gapu iti butengda kadagiti Fariseo amangan no mapagtalawda iti sinagoga.

⁴³Ad-adda nga ayatenda ti pammadayaw dagiti tattao ngem ti pammadayaw ti Dios.

⁴⁴Kinuna ni Jesus iti napigsa a timek, “Ti mamati kaniak, saan la a sisiak ti patienna, no di pay ket ti nangibaon kaniak.

⁴⁵Ti makakita kaniak, makitana met ti nangibaon kaniak.

⁴⁶Immayak ditoy lubong a kas silaw tapno saan nga agtaeng iti sipnget dagiti amin a mamati kaniak.

⁴⁷Saanko nga ukomen ti siasinoman a dumngeg iti mensahek ngem dina met tungpalen; ta diak immay tapno ukomek ti lubong no di ket tapno isalakanko.

⁴⁸Adda mangukom iti mangumsi kaniak ken iti di umawat iti mensahek. Ti sao nga imbalikasko ti mangukomto kenkuana iti maudi nga aldaw!

⁴⁹Wen, ta diak nagsao iti bukbukodko a turay no di ket imbilin ti Ama a nangibaon kaniak no ania ti sawek ken ibagak.

⁵⁰Ket ammok a makaited iti biag nga agnanayon ti bilinna. Ngarud, no ania ti sawek, sawek ti imbilin kaniak ti Ama.”