Read Iloko John 13 Bible Online

John 13 - Iloko bible

John 13

¹Bisperas idi ti Fiesta ti Paskua. Ammo ni Jesus a dimtengen ti oras nga ipapanawna ditoy lubong ken isusublina iti Ama. Inay-ayatna dagiti tattaona ditoy lubong. Wen, ay-ayatenna ida agingga iti panungpalan.

²Madama idi ti panangrabii ni Jesus ken dagiti adalanna. Inserrek ti Diablo iti panunot ni Judas nga anak ni Simon Iscariote ti panggep a mangliput ken ni Jesus.

³Ammo ni Jesus nga inted ti Ama kenkuana ti amin a pannakabalin. Ammona met a naggapu iti Dios ket agsublinto iti Dios.

⁴Iti kasta, timmakder ni Jesus iti panganan ket inikkatna ti kagayna sa nangibarikes iti tualia.

⁵Kinargaanna ti maysa a palanggana iti danum ket binuggoanna dagiti saksaka dagiti adalan sana pinunasan ida iti imbarikesna a tualia.

⁶Idi dumanon ni Jesus ken ni Simon Pedro, kinuna ni Pedro, “Apo, buggoam aya dagiti sakak?”

⁷“Saanmo pay a maawatan ita no ania ti ar-aramidek, ngem maawatamto met laeng,” insungbat ni Jesus.

⁸Kinuna ni Pedro, “Uray kaano, dimonto buggoan dagiti sakak!” “No diak buggoan dagiti sakam, saankan a maibilang nga adalak,” insungbat ni Jesus.

⁹“Apo,” kinuna ni Simon Pedro, “saan la ngarud a dagitoy sakak ti buggoam. Buggoam pay dagiti imak ken ti ulok!”

¹⁰Kinuna ni Jesus, “Ti nakadigosen saanna a masapul ti agbuggo, ta nadalusen, malaksid dagiti sakana. Nadaluskay aminen—malaksid iti maysa.” (

¹¹Ammon ni Jesus ti mangliput kenkuana, isu a kinunana, “Nadaluskay aminen malaksid iti maysa.”)

¹²Idi nabuggoanen ni Jesus dagiti saksakada, nagkagay manen ket nagsubli iti lugarna iti panganan. “Maawatanyo kadi ti kalkalpasko nga inaramid kadakayo?” sinaludsodna.

¹³“Awagandak iti ‘Maestro’ ken ‘Apo,’ ket pudno la ketdi ti kunayo.

¹⁴Ngarud, no siak nga Apo ken Maestroyo, binuggoak dagiti saksakayo, rebbengyo met ti agbibinnuggo iti saka.

¹⁵Inikkankayo iti pagtuladan tapno aramidenyo met ti inaramidko kadakayo.

¹⁶Ibagak ti pudno kadakayo: Saan a natantan-ok ti adipen ngem ti apona. Saan met a natantan-ok ti naibaon ngem ti nangibaon kenkuana.

¹⁷Ita, ammoyon daytoy a kinapudno. Nagasatkayo no aramidenyo!

¹⁸“Saan a dakay amin ti pakaiturongan dagiti sasawek. Ammok dagiti pinilik. Ngem masapul a matungpal ti adda a naisurat, ‘Kinugtarannak ti nakipangan kaniak.’

¹⁹Ibagakon kadakayo daytoy sakbay a maaramid tapno inton mapasamak, mamatikayo a siak ti siak.

²⁰Ibagak ti pudno kadakayo: Ti umawat iti siasinoman nga ibaonko, awatennak met. Ket ti umawat kaniak, awatenna met ti nangibaon kaniak.”

²¹Kasta unay ti pannakariribuk ni Jesus idi nasaonan daytoy ket impalgakna, “Ibagak ti pudno kadakayo: Maysanto kadakayo ti mangliput kaniak.”

²²Nagkikinnita dagiti adalan ta dida ammo no siasino kadakuada ti sarsaritaenna.

²³Iti abay ni Jesus, agtugtugaw ti idumdumana unay nga adalan.

²⁴Sineniasan ni Simon Pedro ti adalan ket kinunana, “Saludsodem man kenkuana no siasino kadatayo ti sarsaritaenna.”

²⁵Immasideg dayta nga adalan ket nagsadag ken ni Jesus sana dinamag, “Siasino ti kunam, Apo?”

²⁶“Ti pangtedakto iti isawsawko a tinapay,” insungbat ni Jesus. Nangala ngarud iti tinapay ket insawsawna sana inted ken Judas nga anak ni Simon Iscariote.

²⁷Apaman nga inawat ni Judas ti tinapay, simrek ni Satanas kenkuana. “Aramidem a dagus ti masapul nga aramidem,” kinuna ni Jesus kenkuana.

²⁸Saan a naawatan dagiti sisasango iti lamisaan no apay a kasta ti imbaga ni Jesus ken ni Judas.

²⁹Agsipud ta ni Judas ti agig-iggem iti kuarta, impagarup dagiti dadduma kadagiti adalan nga imbaga ni Jesus kenkuana a mapan gumatang iti kasapulanda iti fiesta. Adda met dagiti nangipagarup a mapan mangted ni Judas iti kuarta kadagiti napanglaw.

³⁰Innala ni Judas ti tinapay, ket rimmuar a dagus. Rabii idi.

³¹Kalpasan ti ipapanaw ni Judas, kinuna ni Jesus, “Ita, dandanin maitan-ok ti Anak ti Tao, ket maitan-ok met ti Dios kenkuana.

³²Ket no maitan-ok ti Dios kenkuana, ti Dios met laeng ti mangitan-ok iti Anak ti Tao, ket aramidennanto a dagus.

³³Annakko, bassit laengen a tiempo ti kaaddak kadakayo. Sapulendakto, ket kas iti imbagak kadagiti agtuturay a Judio, kunak met ita kadakayo, ‘Dikay makaumay iti papanak.’

³⁴“Adda baro a bilin nga itedko kadakayo: Agiinnayatkayo. Kas iti panagayatko kadakayo, kasta met koma ti panagiinnayatyo.

³⁵No agiinnayatkayo, maammoanto ti amin a tao a dakayo dagiti adalak.”

³⁶“Apo,” sinaludsod ni Simon Pedro ken ni Jesus, “sadino ti papanam?” “Dimo mabalin ita ti sumurot kaniak, ngem sumurotkanto met laeng,” insungbat ni Jesus.

³⁷“Apo, apay a diak mabalin ita ti sumurot kenka?” kinuna ni Pedro. “Sisasaganaak a matay gapu kenka!”

³⁸“Pudno kadi a sisasaganaka a matay gapu kaniak?” insungbat ni Jesus. “Ibagak ti pudno kenka: Sakbay nga agtaraok ti kawitan, mamitlonton nga imbagam a dinak am-ammo.”